Acts
Sepinien xil xa diamu te Polien Xil na Eloheoh Xil
Visi iaxa tetis vanuvei ak?
Moletin xa tetis vanuvei ak, hisen Luk. Xi tenave tei ti e eloheoh xil xa latehe lu e le (12), xi tenave Siu tei ti e mei teneket e Iesu Kristo. Luk tehe dokta tei (Kol 4:14) xa tesukul kuhi, e di teketeh kuhi ve holesok xil xa testal e meulien na Iesu (Luk 1:3). Xi teketeh kuhi xa Sias testal tetep e Serusalem e teha tetuxoh rute sav xil mun tetep (Polien 1:8). Xi di tekapis ut xil holu tetel eloheoh Pol (Kol 4:14; 2 Tim 4:14; Pil 1:24, e Polien 16:10-17; 20:5-21:18; 21:1-28:16). Xi tetis vanuvei xalu ak: 'Longeongen Hos xa Luk Midisi' e 'Polien Xil na Eloheoh Xil'. Polien Xil, Luk tetisi e 63 AD, e melele xa Pol teti Rom e di tetatil melele xa suv toto tahal Rom ilepisi (Polien 28:30).
Visi iaxa tevuli vanuvei ak tetiamu?
Luk tetis vanuvei ak teha mi timue tei nan xa hisen Teopolis (Luk 1:1; Polien 1:1). Luk tetis vanuvei ak teha mini, e tekila xa moletin xil holu xa latave Siu ti livuli.
Luk tetis vanuvei ak veneh?
Luk tehit vapisen kila xa Sias testal tetep — Vanuvei te Polien Xil misep usili xa Sias testal kokot e Serusalem. Xi misep usil polien xa Iesu tesa ni mi eloheoh xil e mi Kristin xil ngasen (1:7-8). Xi pisen ni mun xa xeihen na Ninin Eo temei e moletin xil xa laneket e Iesu tetep, e tesak ni neketen nae te xeih mu (2:1-12). Luk misep kil sexien xa Kristin xil latepol vituei tetiamu, e di latetutou ni moletin xil tetep (2:43-46). E misep usil sexien xa Sias meul e mei be mahulong e rute savsav xil (2:47).
Luk tehit vapisen kila xa xeihen na Ninin Eo tesak ni Sias temeul tetep — E vanuvei nan, e rut sepinien xa diamu, Luk misep kila xa Sias testal e Serusalem texo hisit merekel xil (2:14-7:60) xa mak: moletin na Iesu xil lasepin ni sepinien sav xil xa mosav xil lalong kila (2:4,7-12); eloheoh xil ladal rat moletin xil holu ra meseien nae (3:1-10; 5:15-16); e sepinien nae del setuen nae xil nggur xeihen (4:8-13,30-31). Di, sakpurunien tei xa mahulong mei misak ni Kristin xil lalesae ra Serusalem, labe ut sav xil e provins tahal Sudea e provins tahal Sameria (8:1,4-5) xa latave sotin ti ra hal Serusalem. E melele xa Iesu biles meulien na Pol, Hi misila del Kristin sav xil tengan lavur longeongen hos usil Iesu Kristo vaha mi mol Siu sav xil xa lade ut sav xil e ut etan xa kavmen tahal Rom di telaxat xil. E ngan xil xa latave Siu ti xa ladi Afrika, Siria, Esia, Masedonia e Rom mun (12:1-28:30) mei laneket.
Luk tehit vasep kila vatit neketen na Kristin xil — Luk di midis rut setuen xa Pita tesetu ni mi Siu xil usil vatit neketen nan (2:14-41; 4:8-12; 10:34-48), del rut setuen xa Pol tesetu ni mi moletin xil xa latave Siu ti (13:16-41; 17:22-32; 22:1-21; 26:1-29). Luk pisen ni xa longeongen usil Iesu Kristo di mikapis ut holu, e sepinien teni momal tengan moletin xil te kantri sav xil xa sexien nae misav lakila mei lineket en. Luk teta kat tetel Pol melele xa Pol di tetatil suv toto tahal Rom tengan ikesi ha ilepisi (28:30). Misak ni, moletin holu lanemi labit Luk iaxa tetis uvei xalu ak, ‘Longeongen Hos usil Iesu Kristo xa Luk midisi’ e ‘Polien Xil na Eloheoh Xil’ tengan vatutou ni Pol e vapisen kil vatit neketen nan mi suv toto tahal Rom.
Luk tehit vapisen kila xa sakpurunien xil misakras vahas tan ni Sias na Iesu Kristo — Kristin xil holu xa lasetu ni longeongen hos, xil lakameti nggeih e meulien nae. Rute ngan xil, laso xil labe nim te xeih (nggoni Pita-4:3; 12:3-17; e Pol-16:22-40). Rute ngan xil, labas vin xil (nggoni Stivin-7:59-60 e Tiemes-12:2). Rute ngan xil, vanut Siu xil del vanut moletin xil xa latave Siu ti lapol misa mi xil (nggoni Pol-15:19; 17:5-9; 18:6; 19:23-41). E sakpurunien xil xa nggeih xiak misakras vahas tan ni Sias na Iesu Kristo vengan xa Ninin Eo di mi xil. Xi pol ni Sias meul sung be mahulong e mei nggeih mu.
Nenemien tei xa be eilep e vanuvei ak de 1:8
Iesu biteni bit, “Xamim mukil rin ak kestang, melele xa Ninin Eo imei e xamim, mupolu ni xeihen. Ma ti musep usil nou e hal Serusalem, e ut xil xa di provins tahal Sudea, e provins tahal Sameria, e ut sav xil mun iha ihur vuol ni ut etan.”
Naha xa di vanuvei ak?
1. Polien na Pita del Siu xil (1:1-12:25)
a. Sias na Iesu Kristo testal kokot e Serusalem (1:1-7:59)
b. Sias ba be provins tahal Sameria e Siria (8:1-12:25)
2. Polien na Pol del Ngan xil xa Latave Siu ti (13:1-28:31)
a. Kakaoen kokot na Pol tengan vahit usil longeongen hos mi moletin xil e provins tahal Kalesia e Pampilia (13:1-14:28)
b. Kaonsel te Sias tahal Serusalem misep usil moletin xil xa latave Siu ti xa mei laneket (15:1-15:35)
c. Kakaoen na Pol xa be lu nen ba duxoh provins tahal Esia e Masedonia (15:36-18:28)
d. Kakaoen na Pol xa be tol nen ba duxoh provins tahal Esia e Masetodia mun (19:1-21:14)
e. Pol misep usil neketen nan e von koten tahal Serusalem, Sesaria, e ba duxoh Rom (21:15-28:25)
1
Toxoli Teopolis,
Nadis vanuvei ak bat minuk.
Vanuvei xa natetisi tehat minuk tetiamu* , natehit usil holesok xil xa Iesu di tepol ni e di tepispisi ni e melele xa tepol kokot ni polien nan xil be duxoh melengien xa Hi tehur rati tehe ut nesao. E tetiamu ni ngan xa Hi tehur rati, Iesu tepispisi mi xil texo xeihen na Ninin Eo mi moletin xil xa tehosei xil mei latehe eloheoh nan. Melele xa Iesu tehur longpangasien nan e temat, melengien hanutap lu (40) xi testal mi xil e suse holu xa tepisen ni xa xi temeul rilomun reitin. Xil latepusi, e xi tesepin mi xil usil suse xa Hi mei ihe suv toto na moletin xil en. E melele xa Iesu teti tamu tetel moletin nan xil, tesel xat xil ni sepinien ak tehit, “Munahe reling Serusalem ti mu, e mutatil sanien te Ninin Eo xa natehiteni mi xamim xa tata navan tehit xati xa isa ni mi xamim. Reitin, tetiamu Sion teterir ni moletin xil e oei tang, e navehi ti, Hi iterir ni xamim e Ninin Eo.”
Hi Nggur Rat Iesu Be Ut Nesao
Di, e melengien tei mun, eloheoh xil mei labe vituei del Iesu e lasisi labit, “?Suv, taxeak, melengien momal tengan mei ove suv toto na mol-Isrel xil vaxoni Suv Toto Deved tetiamu, mu tamal ti mu?”
E Iesu biteni mi xil bitene, “Melengien ak, Tata kestang nggur xeihen tengan ihosei. Tave tengan ti xa xamim mukila. Xamim mukil ngan ak kestang, melele xa Ninin Eo imei e xamim, mupolu ni xeihen. Ma ti musep usil nou e hal Serusalem, e ut xil xa di provins tahal Sudea, e provins tahal Sameria, e ut sav xil mun iha ihur vuol ni ut etan.” Melele xa bit sepinien ak bus e xil dit tamu lapusi, Hi nggur rat Iesu be ut nesao, e momah tei mei da xole.
10 E melele xa di tamu laketeh be tilang hat, vatakes, moletin lu xa lusing mieh lusoh visal xil. 11 E lubiteni mi xil lubitene, “!Ei, mol-Kaleli xil! ?Veneh ma di musoh e di muketeh be nesao? Iesu xa Hi nggur rati reling xamim tengan vahe ut nesao, xi mun tang itilomun imei ixoni ngan taxa di mupusi be ut nesao iaxai.”
Labosei Matias Tengan Ixoles Sudas xa Temat
12 Di, eloheoh xil labe reling Vathu te Urvatiei te Olip, ladilomun labe Serusalem xa tave sotin ti. 13 Melele xa laduxoh taon, labe nim tei e labe von toen nen tei mun xa de nesao. Moletin xil ak tehe Pita, Sion, Temis e Andriu; Pilip e Tomas; Batalomiu e Matiu; Temis (xa be nat Alveas), Saemon (xa tevae teha xat kavmen tahal Rom tetiamu), e Sudas (nat Temis). 14 Vehakut, xil mei di lasis vituei, e tetit atou tei lamei lamos del xil. E tua na Iesu xil mun, del ninen, Meri, mei lamos del eloheoh xil ak.
15 Melengien vahis mei mitavi, moletin xil vus xa di laneket e Iesu mei labe vituei. Xil vus sangas laduxoh handred tei e hanutap tei (120). Di, Pita mitamea misoh e misepin mi xil bitene, 16 “Toxoli e hinoxoli xil, Vanuvei na Hi mei mistal be reitin usil Sudas. Ninin Eo tepol ni Suv Toto Deved teke mese ni xa Sudas ileh moletin xil mei lital xat Iesu. 17 Sudas tehe tei e xir xa Iesu tehosei, e xi mun tepol texoni xir.”
18 (Vatu xa Sudas tehuri ve sexien tesa xa tepol ni, xi texal rat tan tahalu ni. E tan nen tak, xi mot en, e vangen mesel e tinen xil mistal.§ 19 Moletin xil vus xa ladi Serusalem latelongeong ni, ma nggo sepinien nae lakes rute ak ni, 'Akeldama,' xa koute teni bit, 'Tan te Ra.')
20 E Pita biteni mun bitene, “E Suv Toto Deved biteni e Sam tei bit,
'Hi Suv, upol ni nim man mei ihe hon tang,
e moletin itovuol iti itilomun en.'*
 
Misepin ni mun bit,
'Bos xa moletin tova ixolesi e ihur von nen.'
 
21 “Mak, ma moletin tova mei imos e xamem, tei xa tehusil xamem tetiamu e melele xil ngasen xa Suv Iesu di tekakao tetel xamem. 22 Tei xa teta tetel xir e melele xa Sion di tekas moletin xil, mei duxoh melengien xa Hi tehur rat Iesu tehe ut nesao. Rihosei tei e xil vari mei ihur polien itel xamem e ti ihit rati mi mosav xil xa tepus Iesu temeul rilomun ra maten reitin.” 23 Ma xil labosei moletin lu: Siosep Barsabas (xa hisen tei mun be Sastas) e Matias.
24 Di, lasis mi Hi labitene, “Suv, xouk okil nenemien na moletin xil vus, ma upisen ni mi xamem xa visi e xalu ak iaxa otehosei 25 tengan mei ipol ixoni eloheoh nam. ?Visi e xalu ihur xoles von Sudas, xa telingi tengan ninin nan iha ihe voninen xati?” 26 Di, tei e eloheoh xil milihi pepa tei xa his Matias da en. Misak ni Matias vari iaxa mos e eloheoh xil xa latehe tei e le sav (11).

*1:1:

1:5:

1:12:

§1:18:

*1:20:

1:20: