3
Sion Baptis misak mesen suse na Iesu
Mak 1:1-8; Luk 3:1-18; Sion 1:19-28
Huram xil holu mei mitavi, e moletin tei ba de uruvuol e provins te hal Sudea, hisen Sion. Xi di baptaes ni moletin xil e di bithiteni bit, “!Muhiles ra tesaen namim xil, vengan xa Hi Suv dat sangas visal xamim e bit mei vahe suv toto e meulien namim!” Mat 4:17; 10:7; Mak 1:15 Xi vari be ngan xa Hi tesep usili texo provet Aesea melele xa tehit,
“Lalong rae tei di mikei e uruvuol xa bit,
‘!Musak mesen suse na Suv!
!Mupol ni suse nan imal!’ ” (Aes 40:3)
Sion, eising nan lapol ni ni hili kamel e mituatu ni mavulut hilbe buluk. Anien an be kelmenamen xil del hani.* 2King 1:8biteni xa Sion mising nggoni provet Ilaetsa tetiamu. Kelmenamen be hisit grashopa tei xa eilep xa lakila lava ni, e hani be oei tei xa mikas xa sukabug xil di lapol ni. 2King 1:8 Moletin xil hao di lateha tengan lateong ni. Rute langgo taon te hal Serusalem e rute sav xil mun langgo ut sav xil e provins te hal Sudea. E ngan tesav xil mun, langgo rute xil sangas ni Oeisal Sodan. E melele xa lapusi, labit rerat tesaen nae xil mini, e Sion baptaes ni xil e Oeisal Sodan.
Farasi e Satusi xil holu mun lamei visal Sion tengan vabaptaes ni xil. E melele xa Sion pus xil, misepin nggeih mi xil bit, “!Xamim munggoni vanut tetal sasa xil xa di langas vin moletin xil ni vulongexil! ?Visi misel xat xamim tengan mulesae ra longpangasien xa Hi isa ni mi moletin xil te ut etan? Mat 12:34; 23:33; Luk 3:7; Mat 23:33; Luk 21:23; Rom 1:18; 2:5; 5:9; Efes 5:6; Kol 3:6; 1Tes 1:10; Rev 6:16-17 Bos mak mu xa itiamu, mupol ni sexien xil xa ipisen ni xa mubiles ra tesaen namim xil ngamu. E munanemi ti munahit mutit ihos vengan xa Ebraham be vatit avu namim. Sion 8:33,37,39; Rom 4:12 !E‑e! Nabiteni reitin mi xamim, Hi ikila isak ni hat xil ak mei lihe moletin xil xa labe vatimol na avu Ebraham. 10 Taxeak, akis mese tuei ve vatit vatiei xil vus. E ngan xil xa latahur huit hosien ti, lite rat xil e liso ni ihe upang. Mat 7:19; Luk 13:7,9; Sion 15:6
11 “Inou nabaptaes ni xamim ni oei tang tengan vapisen ni xa mubiles ra tesaen namim, e ngan xa itutou ni nou, xi ibaptaes ni xamim itel xat Ninin Eo Sion 1:26,31,33; Pol 1:5; 11:16; 13:24; 19:4 e upang. Xeihen nan mili navan, e natapin ti tengan name slev nan e naleh rat sandel nan. 12 Xi bue xat xi ngamu tengan vaseti moletin xil vus. Xi ipol ni ixoni moletin tei xa po savel nan e di miso rerat utut uit ra valite. Utut uit xil xa labos, ileh viton ni ha ilingi e nim nen, e valite xa misa, itin ni ni upang tei xa mahulong xa misakras vamat.” Mat 13:30
Sion baptaes ni Iesu
Mak 1:9-11; Luk 3:21-22
13 E melele nen ak, Iesu nggo provins te hal Kaleli e xi mun bemei e Oeisal Sodan tengan Sion vabaptaes ni. 14 E melele xa Sion pusi, misak pisi tengan vahiles nenemien na Iesu, ma biteni bit, “!E‑e! ?Xouk di omei visal nou veneh? Momal tengan xouk ubaptaes ni nou vengan xouk obe eilep mak mu oli nou.”
15 E Iesu bit rilomun ni mini bit, “Bos xa ubaptaes ni nou taxeak. Vengan xa, imak, ti ralipol ni holesok xil vus xa imal pe met Hi.” Misak ni, Sion maen ni, e baptaes ni Iesu.
16 E melele xa Sion baptaes ni Iesu bus, Iesu mea ra oei. Vatei takes, tilang hat misaha, e xi pus Ninin na Hi mingga merou nggoni mae e mei dotan en. Sion 1:32 17 E rae tei mistal nggo ut nesao bit, “Ngan ak be Natuxoli reitin xa eheien navan di en. Inou nabesi nou pupu ven.” Sen 22:2; Sam 2:7; Aes 42:1; Mat 12:18; 17:5; Mak 9:7; Luk 9:35; 2Pit 1:17

3:2: Mat 4:17; 10:7; Mak 1:15

*3:4: 2King 1:8biteni xa Sion mising nggoni provet Ilaetsa tetiamu. Kelmenamen be hisit grashopa tei xa eilep xa lakila lava ni, e hani be oei tei xa mikas xa sukabug xil di lapol ni.

3:4: 2King 1:8

3:7: Mat 12:34; 23:33; Luk 3:7; Mat 23:33; Luk 21:23; Rom 1:18; 2:5; 5:9; Efes 5:6; Kol 3:6; 1Tes 1:10; Rev 6:16-17

3:9: Sion 8:33,37,39; Rom 4:12

3:10: Mat 7:19; Luk 13:7,9; Sion 15:6

3:11: Sion 1:26,31,33; Pol 1:5; 11:16; 13:24; 19:4

3:12: Mat 13:30

3:16: Sion 1:32

3:17: Sen 22:2; Sam 2:7; Aes 42:1; Mat 12:18; 17:5; Mak 9:7; Luk 9:35; 2Pit 1:17