Taetas
Sepinien xa Diamu te Uvei xa Pol Tetisi teha mi Taetas
Visi tetis uvei ak?
Pol tetis sepinien ak e huram xa sangas ni 64 AD (ngan ak huram 32 tetutou ni maten e mea rilomunen na Iesu). Pol tetis uvei ak tetutou ni tumulen xil xa di Polien na Eloheoh Xil (ukila upus rut sepinien ngan xil teni e Sepinien xa Diamu te 1 Timoti). Pol tepol vituei e aelan tahal Krit tetel Taetas melengien vahis (1:5). Di, teling Taetas ti ilaxat Kristin hu xil e rute nen ak (1:5; 2:15; 3:12-13).
Visi iaxa tevuli uvei ak tetiamu?
Pol tetis sepinien ak teha mi Taetas (1:4). Vatei, Pol teha tengan vapus vat xil te sias tahal Serusalem tengan vahit kil polien nan del ngan xil xa latave Siu ti (2 Tim 2:8). E melele nen ak, xi nggur Taetas xa tave ngan Siu ti e be Kristin tei tuei (Kal 2:3). Melengien holu, Taetas tehusil Pol e kakaoen nan: lutepol vituei e Korin (2 Kor 7:6; 8:23), Dalmesia (2 Tim 4:10), e aelan tahal Krit mun (1:5). Pol tehiteni mini tengan ihosei ti elda xil, isel xat Kristin xil linahusil ti mun pispisien xil te luvosen, e ipol ituxoh melele xa Pol isil moletin sav mei ixolesi e polien nan (3:12).
Pol tetis uvei ak veneh?
Pol en tehei tengan vasep kil sexien hos na vat xil te sias mi Taetas - Elda xil, lilaxat kuh moletin xil te sias, lipol ixeih e polien na Hi, e lipispisi mi moletin xil ni pispisien xil xa bos (1:5,9). Pol tehiteni tehit elda tei ihe hisit moletin tei xa ilaxat kuh tim san (1:6) e ixuxou kuhi ve sexien nan xil (1:7-8).
Pol en tehei tengan vasel xat Taetas usil moletin xil te luvosen - Vengan sexien na mol-Krit xil tesa pupu (1:12), Pol tesis Taetas tengan isel xat xil ixeih e ipispisi mi xil ni pispisien xil xa momal (1:10-16). Vanut Siu xil iexil tehei tengan di langor vatel Taetas, e Pol tesel xati tengan xi napol ni ti ngongoren natel xil (3:9-11).
Pol en tehei tengan vasep kil sexien hos na Kristin xil mi Taetas - Pol tesis Taetas tengan ipispisi kuhi mi ngan xil xa labe momatu (2:2), atou xil (2:3-5), tiram maxoe xil (2:6-8) e slev xil mun (2:9-10). Pol tehit kila xa Hi di misa xeihen mi ngan xil xa di langgusil xati (2:11-15).
Pol en tehei tengan vasep kila mi Taetas ni sexien hos xil xa Kristin xil ti lipol ni mi mosav xil - Pol en tehei Kristin xil te sias liti e tomat itel mosav xil, ti lilong xat kavmen (3:1), e linasepin ti nasa mi mosav xil (3:2). Tehiteni mun xa xil linapol ni ti ngongoren natel ngan xil xa nenemien nae misav (3:9-11). Kristin xil iexil nabong ni ti xa, tetiamu, xil mun latepol ni sexien tesa xil ak, e Hi tehiles meulien nae (3:3-7).
Vatit nenemien tei te uvei ak de Taetas 1:5
Melele xa natelinguk otete aelan tahal Krit, natesisuk tengan upol vuol ni rut polien xil xa rutepol lingi teti. E natesisuk tengan ti uhosei elda xil te sias e metimal xil vus xa di olaxati. Unem xat selxatien xil navan.
Vatit nenemien tei mun te uvei ak de Taetas 3:4-5
E tave ti neta xa ratemak, Hi tepisen hosien e eheien nan mi xir e teteh meulien e xir. Xi iaxa teleh rerat xir ra tesaen xil nar, tave ti ve holesok xil xa bos xa xir ratepol ni. !E-e! Xi teleh rerat xir vengan en misae e xir. Ma xi tesa Ninin Eo mi xir xa mikas motin xir ra tesaen nar xil e misa meulien hu e sexien hu xil mi xir.
Naha iaxa de sepinien ak?
1. Pispisien xil usil sexien hos xil na elda xil (1:1-9)
2. Pispisien xil usil moletin xil te luvosen (1:10-16)
3. Pispisien xil usil sexien hos xil na Kristin xil (2:1-15)
4. Pispisien xil usil sexien hos xa lipol ni mi mosav xil (3:1-15)
1
Sepinien xa Diamu
Inou, Pol, iaxa nadis uvei ak e nabe moletin tei te polien na Hi e eloheoh tei na Iesu Kristo.
Hi tehosei nou e tesil nou tengan ha nitutou ni neketen na ngan xil xa Hi tehosei xil mei labe nan. Xi tesil nou mun tengan nipispisi mi xil usil reitinen te suse xa likila mei limal pe meten. Ngan xil ak likila lihusil hisit neketen ak vengan xa lanesi xa Hi isa meulien sal mi xil. Vengan xa, tetiamu ni melele xa Hi tepeas ni ut etan, tehit xati xa isa meulien ak mi xir, e Hi misakras valuvos. E melele xa xi bit momal, Hi xa di miteh meulien e moletin xil misak ni naha xa tehit xati mei mistal be reitin sung. Reitin, naha xa Hi tesoson ni, xi di mikirati nggo sepinien xa tesa ni minou e tesemae ni minou tengan ti nihithiteni mi mosav xil.
Natis bat mi xouk, Taetas, xa onggoni natuxuli xati, ve neketen naralu be tei takes.
Nasisi xa Hi Tamer e Iesu Kristo, xa miteh meulien e xir, lalisa eheien hos itel tomat nalu iti minuk.
Lihosei Elda Xil Itep
Melele xa natelinguk otete aelan tahal Krit, natesisuk tengan upol vuol ni rut polien xil xa rutepol lingi teti. E natesisuk tengan ti uhosei elda xil te sias e metimal xil vus xa di olaxati. Unem xat selxatien xil navan: elda tei, meulien nan imal, e nenemien nan iti atou nan xati kestang. Horamue nan xil lihusil xat Iesu e sexien nae xil ihos tengan moletin sav xil ti linaseputut ni xil linahit vatixil nggeih e di latalong xat tamexil ti. Melele xa uling moletin tei mei ihe vat te sias tengan ti valaxat moletin xil na Hi, sexien nan imese. Nahe moletin te koaien ti, e tinen nasoh ti namanon. Nahe moletin te mumunen ti, nahe moletin te tutuen ti, e nahe ho mani ti. !Namak ti! Ihe hisit moletin xa di nggur pilei moletin sav xil e tim san, e di ien bei neta xil kestang xa bos. Nenemien nan ixeih e polien nan xil, kakaoen nan ihos, meulien nan imal, e mikila ixuxou kuhi ve sexien nan xil. Elda ak, ihur xat kuh pispisien usil Iesu xa xir di rapispisi ni. Ikila xa pispisien xil ak be reitin. Imak, ma xi ikila ti itiamu ni mosav xil e suse te momalen, e ti ipispisi mi xil usil naha xa be reitin. E melele xa mosav xil laseputut ni pispisien nan xil, elda ak ikila ipisen ni mi xil xa naha xa xil di lasepin ni be neta sav tang.
10 Nasepin ni mak vengan xa moletin xil holu latamemere ni vat xil te sias ti. Pispisien na moletin xil ak be votiang tang xa reitinen tovuol en e di laluvos moletin sav xil tengan lihusil xat xil. Xil di lapispisi ni xa moletin xil vus na Hi lihe vexahu ixoni ngan xa Siu xil di lapol ni. 11 Taetas, usikoe xol pispisien nae xil. Vengan, xil di lapispisi ni holesok xil xa tamal ti tengan lavur mani vaxo en. E misak ni, moletin xil vus e tim xil di lastokovein neketen nae. !Ngan ak tamal ti! 12 Tehe provet tei nae tang tahal Krit iaxa tesep usil sexien nae xil tehit,
“Mol-Krit xil, vehakut di laluvos e sexien nae mikavui.
Xil labe mah e, vehakut, di lanem kes ni vange tang.”
13 Sepinien ak be reitin. Ma bos xa xouk usepin ixeih mi xil. Ngan ak isak ni xil lihusil pispisien xil kestang xa momal. 14 Linahusil ti mun tumulen te luvosen xil na Siu xil, mu rae xil na ngan xil xa lasin reitinen na Hi. 15 Ngan xil xa meulien nae momal pe met Hi, holesok xil vus momal tang mi xil.* E ngan xil xa meulien nae tamal ti pe met Hi e lataneket ti e Iesu, ma holesok xil vus tamal ti e xil vengan xa nenemien nae be muis. Ngan xil ak latakil ti naha xa momal e naha xa tamal ti. 16 Nggo valonge, xil labit lakil Hi, e sexien nae xil di pisen ni xa latakil ti. Latalong xat Hi ti, sexien nae pupuru tang, e lasakras lapol ni neta tova vahos e meulien nae.

*1:15: