1 Timoti
Sepinien xa Diamu te 1 e 2 Timoti del Taetas
Tisen xatel ak, 1 e 2 Timoti del Taetas, lakes xatel ni 'tisen tol xa ba mi pasta xil.' Labiteni mak vengan latesep usil sexien na Kristin xil e sias e sexien xa momal tengan elda e dikon xil lipol ni e meulien nae (1 Tim 3:2-13, Taet 1:6-9). Pol tetis uvei tei teha mi Timoti (1 Timoti), di, tetis tei mun teha mi Taetas tetutou ni melengien xil xa Polien sapta 28 tesep usili.
Polien sapta 28 biteni bit melele xa Pol tete Rom, tete pe he kavmen tahal Rom e di lateling moletin te vaeen xil di lateketeh xole e nim tei (Polien 28:30-31). E tisen sav xil xa di e Vanuvei Eo e vanuvei sav xil mun labiteni labit kavmen tahal Rom lamaen ni ba ven mase.
E kakaoen xil nan xa tetutou ni melele nen ak, Taetas, Timoti e moletin sav xil mun latemos en. E melele xa ba latesao ni moletin xil e aelan tahal Krit, Pol teling Taetas tengan ilaxat kuh Kristin hu xil ixoni pasta nae (Taet 1:5). E melele xa latetuxoh taon tahal Efeses, Pol teling Timoti tengan ilaxat Kristin xil e rute ak (1 Tim 1:3). Di, Pol tehe reling xalu e ba tesao ni Kristin xil e taon sav xil. Melele xa tetuxoh taon tahal Pilipae, Pol tetis uvei xalu ak, 1 Timoti e Taetas, tengan vatutou ni xalu e polien nalu.
Di, Pol tetilomun tehe Rom. Melele xa tetuxoh Rom, ngan xil te kavmen latetal xati rilomun e lateso ni tehe nim te xeih. Melele xa latelepisi e kot, latehit navehi ti lihasi imat. Melele xa tehur longeongen teni, tetis uvei tei mun teha mi Timoti (2 Timoti) e tehiteni mini tengan itemanon mei isao ni. Tave ti neta xa tekila xa imat, neketen nan texeih tamu. Tisen kor na Pol ak tepisen ni xa neketen nan te xeih (2 Tim 1:3-14), en tehei pupu tengan pispisien xil te sias imal tevi (2 Tim 3:10-17), e en tehei mak mu tengan vat xil na moletin xil te sias, meulien nae imese ra tesaen vehakut (2 Tim 2:1-26).
Sepinien xa Diamu te 1 Timoti
Visi tetis uvei ak?
Tetutou ni tumulen xil xa di e vanuvei te Polien na Eloheoh Xil, kavmen tahal Rom latemaen ni Pol tehe reling nim te xeih. Pol teha tengan vasao ni Kristin xil e ut xil ngasen. E melele nen ak, Timoti xal Taetas lutehusili. Pol teling Taetas tengan ilaxat ngan xil te sias tahal Krit (Taet 1:5). E teling Timoti tengan ilaxat Kristin xil xa lateti e taon tahal Efeses (1Tim 1:3). Melele xa Pol di tamu tepol e provins tahal Masedonia, telongeong ni xa xalu lutekameti texeih e polien nalu. Tesak ni, tetis sepinien xil ak teha mi Timoti tengan vatutou ni (1:1) e huram xa tehe sangas ni 64 AD (ngan ak huram 32 tetutou ni maten e mea rilomunen na Iesu). Melele xa tetisi tevus, Pol tehe Rom. E rute nen ak, moletin xil te vaeen tahal Rom latetal xati, e lateso ni tehe nim te xeih vatei mun.
Visi iaxa tevuli uvei ak tetiamu?
Pol tetis sepinien ak teha mi Timoti (1:2). Timoti tehe moletin hu tei xa testal texo taon tahal Listra (Polien 16:1). Ninen tehe ate-Siu tei e tamen tehe ngan Kris tei (Polien 16:1). Timoti tehusil xat Hi e tetutou ni Pol e polien nan (Polien 16:3; 17:14; 18:5), e lutepol vituei e taon tahal Efeses (Polien 19:22). Pol, eheien nan teti Timoti pupu e tekes xati texoni horamue nan xati (1:2).
Pol tetis uvei ak veneh?
Pol en tehei tengan vasel xat Timoti usil moletin xil te luvosen - E taon tahal Efeses, rut moletin ngan xil di lateluvos Kristin xil. Latehiteni latehit holesok xil vus te ut etan tesa pupu (4:4). Tesak ni latepispisi mi moletin xil latehit rut anien xil tenavos ti te anien en (4:3) e Kristin xil linateli ti (4:3). Ngan xil ak latehiteni mi moletin xil xa xil kestang latekil sepinien xil na Hi xa koute teni di minggus, tesak ni moletin xil latehusil rae nae xil (1:4-11).
Pol en tehei tengan pispisien xil vus na Timoti imal tevi - Pol tesel xat Timoti tengan ihur xat neketen nan e Iesu, ipispisi ni pispisien xa momal, e isak ni meulien nan mun imal tevi pe met Hi (3:14-16; 4:9-16; 6:20-21).
Pol en tehei tengan vahit kil sexien hos xil na pasta tei mi Timoti - Pasta tei ipol ixeih e meulien nan melele xa ihit valaxat kuh moletin xil na Hi (1:18-19; 4:6; 4:9-12; 6:11-16). Ikil kuh Vanuvei Eo e ihusil xat sepinien xil teni (4:13-16), e ihe moletin tei te pispisien. Vehakut, nenemien nan ihos mi moletin xil vus (5:1-2) e meulien nan imal tevi.
Pol en tehei tengan vahit kil sexien hos na vat xil te sias mi Timoti - Xosxa moletin tei mei be elda mu dikon tei te sias, sexien nan imal (3:1-13; 5:17). Xosxa sexien nan imal, ipet rat his Hi ihe nesao e holesok xil te sias iloh imal.
Pol en tehei tengan vahit kil polien hos te sias mi Timoti - Vat xil te sias lilaxat kuh moletin nae xil. Lipol ixeih tengan lilaxat ngan xil xa lamesei, ngan xil xa labe hoeo, e tunau xil mun (5:3-10). Melele xa moletin xil xa latakil ti Hi lapus sexien hos nae xil, lipus kila sung xa eheien na Hi be reitin (3:7; 4:15).
Pol en tehei mun tengan vahit kil suse te sisen - Melele xa ramei vituei ve sisen, nenemien nar e Hi imal e iexir naxat mosav ti (2:1-8; 4:4-5).
Vatit nenemien tei te uvei ak de 1 Timoti 4:12
Onamaen moletin xil ti linanem male ni xouk vengan xa obe horam maxoe tei tang. !E-e! Uhe vat tei na ngan xil xa laneket ixo sexien hos xil ak: ixo sepinien nam, kakaoen nam, eheien nam e mosav xil, e ixo neketen nam mun. E holesok xil vus xa di opol ni, meulien nam imese tevi.
Naha iaxa de sepinien ak?
1. Pispisien xil xa momal tengan rihusili (1:1-20)
2. Pispisien xil usil polien te sias (2:1-3:16)
3. Pispisien usil sexien na vat xil te sias (4:1-6:21)
1
Sepinien xa Diamu
Inou Pol iaxa nadis uvei ak. Nabe eloheoh tei xa di napol e his Iesu Kristo. Hi xa di miteh meulien e xir e Iesu Kristo xa neketen nar di en, xalu iaxa luling nou e polien ak.
Bos makoe minuk Timoti. Ve neketen naralu, nalonge nggoni ngan xa xouk obe horamue navan xati. E nasis tengan eheien hos, esaeen e tomat na Hi Tamer e Iesu Kristo, Suv nar, iti minuk.
Selxatien Tengan Timoti Nahusil ti Pispisien Te Luvosen
Timoti, ieok bei xa xouk otat e hal Efeses, nggoni ngan xa natehiteni minuk tuei melele xa natelinguk oteta en e inou natehe provins tahal Masedonia. Rut moletin xil xai di lapispisi ni hisit pispisien sav xil xa tamal ti usil suse te neketen, e ieok bei xa uhiteni mi xil tengan linapol ni ti mun namak. Uhiteni mun mi xil tengan linapispisi ni moletin xil ti mun naxo tumulen te luvosen nae xil mu naxo vanut his avu na mol-Siu xil xa hoxalite teni tovuol. Hisit tumulen xil ak di pol ni ngongoren xil tang, e tahusil pispisien xil na Hi ti xa rakila nggo neketen nar kestang. Vatit selxatien ak be tengan isak ni eheien iti e xamim xa di mistal nggo nenemien xa memese, nggo neketen xa be reitin, e nggo sexien xil xa mukila mubit momal pe met Hi. Rut moletin namim xil latehusil hisit sexien hos xil ak tetiamu. E taxeak, xil lakavitou ni sexien xil ak e dit lapurun melengien nae xil e sepinien xil xa be neta sav tang. Xil di labiteni labit labe tisa xil te Rae na Hi. E tave ti neta xa di lamangang vehakut nggoni ngan xa lakilakil kuhi, xil latakil ti vari koute te holesok xil xa di labiteni.
Rakila xa Rae na Hi bos mak mu xosxa ranggusil kuhi nggo sexien xa momal. Rakila xa Rae xil ak, Hi tenapol ni ti tengan ti vamal ni ngan xil xa langgusil sexien xil xa momal ngamu. E-e. Hi tepol ni xil tengan vamal ni ngan xil xa sexien nae xil misa: ngan xil xa langgur xoteh rae xil e labe vatxeih xil; ngan xil xa lapol misa e latakil ti Hi; ngan xil xa latamerere ni Hi ti e meulien nae di sotin rani; ngan xil xa di labas vin mosav xil e labas vin tamexil e ninexil mun; 10 ngan xil xa di lapat vituei e latateli ti mu e tiramue xil xa di lapat vituei del tiramue mun tang; ngan xil xa di lakan ni moletin xil e lapos ni xil mei labe slev; ngan xil xa di laluvos vehakut e ngan xil xa di laluvos ni his mosav e koten; e ngan xil xa di lapol ni neta sav xil mun xa misav ni pispisien xil te reitinen na Hi. 11 Pispisien xil na Hi nggusil longeongen hos xa xi misa ni minou tengan nihithiteni mi mosav xil. Longeongen hos ak bos pupu e nggo Hi xa be eilep xa be eilep pupu.
Pol Memes Hi ve Eheien Hos Nan
12 Inou nasa memesien mi Iesu Kristo, Suv nar, vengan xa xi miling nenesien nan e nou tengan nipol mini, e misa xeihen minou tengan nikila nipol itela. 13 Tetiamu, natesepin tesa teha xati, natepol ni texeih mi ngan xil xa latehusili e natehe vat xaren tei. E neta sav xa temak, Hi en tesae e nou vengan xa natnaneket ti mu e Iesu e natnakil ti xa di natepol tesa. 14 E Iesu Kristo, Suv nar, tepisen eheien hos nan minou xa eilep pupu, e tesak ni nou nateling neketen e eheien navan teti en. 15 Nisep usil neta tei xa be reitin, ma bos uhur xati: 'Iesu Kristo temei e ut etan tengan iteh meulien e moletin tesa xil.' E inou nasa mak mu mili mosav xil. 16 Ve rin ak, Hi tehosei nou tengan en isae e nou e nasa pangasien ti minou. Xi tepol ni minou tengan ngan teisav xil xa mei lineket e Iesu e lihur meulien xa misakras vavus, xil lipus kil nenemien hos nan xa teviei pupu minou. 17 !Reitin mak! !Ripet rat his Hi! !Xi kestang be Hi e be Suv Toto vehakut! Metexir misakras vapusi, e xi dat nggoni ngan tang, misakras vamat. !Bos mak mu xa xir rimerere ni e rimesi! !Reitin!
Pol Misel Xat Timoti tengan Isoh Ixeih e Neketen Nan
18 Timoti, natuxuli, di nasa selxatien ak minuk xa nggusil sepinien xa provet nar xil lateke mese ni usiluk tetiamu. Xosxa unem xat sepinien xil ak e uhusil xati, ma mei uhe moletin te vaeen hos tei na Hi xa ivae ixeih e rin nan. 19 E melele xa upol ni, usoh ixeih e neketen nam e uhusil kes ni sexien xil xa okila obit momal pe met Hi. Rut moletin xil latapol ni ti sexien xil xa lakila xa momal, e di lapurun neketen nae. Xil langgoni vatihos te tuturil tei xa mikil suse xa momal e tahusili ti. E misak ni tuturil nan merir e meulien nan mikesae. 20 Moletin lu xa lupol mak, tei hisen Haemeneas, e tei mun xalu, hisen Aleksanda. Mak ma, inou nasil rat xalu ra xir tengan ha lalihur pangasien e he Temat. E suse ak, xalu lalipus kila xa lalnapispisi ti mun ni luvosen usil Hi.