2
Xosxa ranem male ni longeongen hos na Hi, rasakras ralesae reling ekaten na Hi
Mak, ma vengan xa Nat Hi be eilep mak mu mili masxaxa xil, xir rixuxou kuhi tengan riteli ixeih e reitinen ak e rinamaen nenemien nar ti nasal nave relingi. Rae xil tetiamu xa Hi tehithiteni mi avu nar xil texo masxaxa xil tehe reitin. E ngan xil xa latnahusili ti mu latnalong xati ti latehur pangasien xa momal tengan lavuri. Pol 7:38,53; Kal 3:19 ?E xosxa avu nar xil lasakras lalesae reling pangasien ak, ma itep mi xir xosxa di ranem male ni longeongen xa eilep xiak usil midep iaxa Hi di miteh meulien e moletin xil? Pangasien xa imei mi xir ihe eilep pupu. E Suv Iesu vari tehithiten kokot ni longeongen hos ak. Di, ngan xil xa lateteong ni latehit rati temei e valkesao tengan mei rikila xa be reitin. Hib 10:29; 12:25 E Hi tepisen ni xa be reitin texo merekel xil e holesok sav xil xa tellep. E rapusi mun xa be reitin nggo sanien xil xa Ninin Eo di misa kekes ni mi moletin xil nggusil nenemien na Hi. 1Kor 12:4,11
Hi tehosei Iesu Kristo tengan mei ihe eilep mak mu ili holesok xil vus nggo longpangasien e maten nan
Melele xa di nasep usil ut etan xa Hi isak ni mei ihe neta hu, bos tengan mukila xa tenahosei masxaxa xil ti tengan valing holesok xil ak ha vati pe hexil. Vengan nggoni ngan xa Vanuvei Eo tehiteni e ut tei tehit,
“?O Hi, moletin xil labe naha iaxa di onem usil xil mak?
?Veneh ma di olaxat kuh nat moletin xil mak?
Otesak ni xil mei latehe etan mak mu ni masxaxa xil tehe vuteili tang.
E tetutou sung, otesa von merereen mi xil e oteling vat luvoluv te lelaxatien teti e vatixil.
Xouk oteling holesok xil vus xa otepeas ni
ladi pe hexil tengan lilaxati.” (Sam 8:4-6) 1Kor 15:27
Melele xa biteni bit, Hi “teling holesok xil vus xa tepeas ni ladi pe hexil tengan lilaxati,” rakila xa neta tovuol xa latalaxati ti. Tave ti neta xa ngan ak be reitin, taxeak di ratapus xil ti xa holesok xil di lalong xat rae moletin xil. E rapus Iesu xa tehe vuteili tang mei tehe tan mu ni masxaxa xil. E taxeak, rakila xa di nggur von merereen e vatluvoluv te lelaxatien de vatin vengan xa tehur longpangasien xil e temat tehinat xir. Reitin, ve eheien hos nan, Hi teling xati tengan Iesu imat ve rin na moletin xil vus. Plp 2:8-9
10 Holesok xil vus xa Hi tesak ni xil ladi, ladi tengan lapisen xeihen nan e lapet rat hisen. E momal tevi xa Hi temaen Iesu tengan vahisu ni longpangasien xil tengan vasak ni mei vamal tevi tengan, itutou ni, ha imat e iteh meulien e moletin xil. Ve rin ak, Hi tesak ni Iesu mei tehe eilep mak mu ni horamue sav nan xil tengan itiamu ni xil ha liti visali e minehinen te xeihen nan. 11 Ma Iesu del ngan xil xa tekas moten xil lamese ra tesaen nae, Tamexil tei takes. Misak ni, Iesu tave unoun ti tengan vakes xil ni tuneli mu hineli xil. Mat 25:40; Mak 3:35; Sion 20:17 12 Vengan xa xi tehiteni mi Hi tehit,
“Inou nihithiten usiluk mi tuxoli e hinoxoli xil.
Melele xa xamem mumei vituei, inou nisa memesien ihat minuk.” (Sam 22:22)
13 Xi tehiteni mun tehit,
“Inou niling nenesien navan e Hi.” (Aes 8:17) 2Saml 22:3; Aes 12:2
E xi tehiteni mun tehit, “Inou xiak, del horamue xil xa Hi tesa ni minou.” (Aes 8:18)
14 Vengan xa horamue xil ak labe moletin xil xa tenbexil e rexil di, Iesu mun temei texoni xil. Tepol ni temak tengan, texo maten nan, xi mikila vahas tan ni Temat xa di tetal xat xeihen te maten. Sion 12:31; 1Sion 3:8; Rev 12:10 15 E texo rin ak, Iesu telal rat ngan xil xa ulikanen te maten tevar xat xil e melengien xil vus te meulien nae tengan ha lameluv.
16 Makila xa Iesu tenamei ti tengan vatutou ni masxaxa xil. Xi temei “tengan vatutou ni ngan xil xa lastal langgo vatimol na Ebraham.” (Aes 41:8-9) 17 Mak, ma momal xa xi temei texoni tuneli e hineli xil e rin xil vus. E, texo suse ak, xi mei tepolu ni esaeen ve xil e mikila vatutou ni xil nggoni vatixar na pris xil xa tepol vuol ni holesok xil xa Hi teling xati tengan ipol ni. Xi tesa xoteh meulien nan texoni sanien eo tei tengan vaserev rin na moletin xil pe met Hi e vasak ni Hi mei vaketeh vahos rilomun mi xil e nanem ti mun usil tesaen nae xil. Plp 2:7; Hib 2:14; 1Sion 2:2; 4:10 18 E vengan xa xi mun tehur sakpisien e longpangasien xil, xi ikila itutou ni ngan xil xa di langgur sakpisien xil. Hib 4:15

2:2: Pol 7:38,53; Kal 3:19

2:3: Hib 10:29; 12:25

2:4: 1Kor 12:4,11

2:8: 1Kor 15:27

2:9: Plp 2:8-9

2:11: Mat 25:40; Mak 3:35; Sion 20:17

2:13: 2Saml 22:3; Aes 12:2

2:14: Sion 12:31; 1Sion 3:8; Rev 12:10

2:17: Plp 2:7; Hib 2:14; 1Sion 2:2; 4:10

2:18: Hib 4:15