30
Ahi asuv mul san kataunien min ir
Asuv houlu Deved mutisi ten avong asehen voiteh ten Eim Votut onen Ahi
1 Ahi Asuv, namasmasuk veni keik kokataunau.
Kormaentei koakeil avahu vatal minau avali nau ka avaselus kutut kat nau.
2 Ahi Asuv, napeahik eli ven kataunien onom,
ka kosakinau namoul.
3 Kokur koe nau ran avul ten matien.
Vesesal mamat, ka kosan ris moulien minau.
4 !Kami koa mimusil Ahi Asuv! !Mihesau masmasi!
Ahi vi votut, mihendem kat asa koa kei mumoni min kami, ka mihehiten hihuri veni.
5 Vurohien onen mul tamureis,
ka tahosien onen mul taveah.
Avaseini simetomi houe en vongien;
en meneai teni, mihelonge hetahos eris.
6 Mulamu, navong nales tahosien en moulien onak,
ka navit sasok eni navit, “Tounah hetovuol hesut nau.”
7 Ahi Asuv, en avong koanek, kotahos minau,
ka koring koe nau suval out tatosuaien.
Ka katau suk, koro suai ranau,
ka nametau houlu.
8 Sakini, navisok, Ahi Asuv.
Napeahik ven kataunien onom navit,
9 “?Munak nimat, heite teni hehi asa?
Heite hetovuol munak nihita en avul.
?Koakeil umatmat, imasmasuk?
!Vuo! Asakras avisohiso usil tahosien onom.
10 !Sakini, Ahi Asuv, kitaengonau li ka kisan enmahisien minau!
!Ahi, navit mahisuk kikataunau!”
11 Ka keik, koviles tangien onak
mai vi holien ten sien.
Isien onak, kokulati ranau,
ka kosakinau numai nalonge tahos.
12 Sakini, nirto raengtei,
nimasmas isom lises.
Ahi Asuv, kovi Ahi onak;
nil nihiten hihuri minuk lisenges.