32
Koakeil methos onen Ahi mul en keil avilelau en sien
Asuv houlu Deved mutisi
Sien hel en koakeil Ahi roleletei mun vatisa en keil ven tisaen one,
en koakeil methos onen mul en keil. Rom 4:7-8
Sien hel en koakeil Ahi Asuv roselus kattei keil ven sakkalkalien one,
en koakeil luvosien tovuol en keil.
 
Munak narvit lattei sakkalkalien onak,
namurang lisenges ka avek mai memerau veni.
Meneai ka vongien,
kosan mahien minau.
Keihoen onak vuol ranau varei,
suval tilep vuol ka memes navong meteiai mutin keih.
 
Sakini, navit lat tisaen keil onak minuk Ahi.
Sakkalkalien keil onak koa namum suai eni, nirmumontei mun.
Ka narendemi navit mahit lat tisaen keil onak minuk,
ka keik, kokulat keil ranau, ka methos onom hel eris enau.
 
Hesakini, koakeil amusiluk ihis venuk en avong takeih keil.
Ka navong mahien hehi houlu hemai hehit vatahin koe keil, hesakras vasut keil.
Keik kovi out tatokusien onak,
kikur koe nau en avong takeih.
Nisau masmasuk houlu mok,
ven koa koring koe moulien onak.
 
Evus, Ahi Asuv mul viteni vit, “Nihiseinuk en sise koa mal kovousili.
Nisan rendemien tahos minuk.
Sakini konoumontei vatkeih onom nasuval hos tai,
koa aling aean tai en ongon vasakini vamah ka voual vamal en sise.”
 
10 ?Milesi? Meatin keil amum kalkali, mahien hehi houlu hemai en keil,
ka koakeil aling desien one en Ahi,
envatien onen mul kav koe keil.
11 Kami koa mimum mal en meten Ahi, mihelonge hetahos ka mihevut kami.
!Kami koa milong kati, mihehisohiso en sien!

32:1: Rom 4:7-8