8
Polien xa Iesu di pol ni ve rin nar bos mak mu mili polien na pris xil tetiamu
1 Vatite te holesok xil vus xa xamem di mabiteni xiak: vatixar tei na pris xil da ngamu xa tepol sen holesok xil vus ak xa di matehit usili, e xi iaxa di pol e rin nar. E xi di dotan de rin metu te von xeihen na Hi e ut nesao. ✡ Hib 3:1; 4:14; 6:20; 7:26; 9:11; Sam 110:1; Mat 22:44; Mak 16:19; Pol 2:34; Efes 1:20; Hib 1:3; 10:12; 12:2 2 Xi nggur polien te vatixar e rute xa be eo xa be eo pupu e vangit Nim Eo na Hi e ut nesao vari. Nim Eo ak be ngan xa Hi vari tekili ni, ngan xa bos mak mu mili Nim Tavolin xa moletin xil te ut etan tang latepol ni xa texoni ngan xa de ut nesao. ✡ Nam 24:6
3 Ngan xil vus xa lateling xil mei latehe vatixar na pris xil latesa sanien eo mi Hi e latehas buluk e nani xil tengan vaserev moletin xil ra tesaen nae xil. Misak ni, momal tengan vatixar nar e ut nesao mun isa neta tova mi Hi. 4 Vahit xi vata tamu e ut etan, xi nave pris tei ti, vengan pris xil ladi ngamu xa di lasa sanien eo xil nggusil naha xa Hi tesemae ni texo Mosis. 5 Melele xa pris xil te ut etan ak di lamot mi Hi, di lapol ni e Nim Tavolin tang. E Nim Tavolin ak nggoni nini neta xa di rapusi e kilas tei xa reitinen teni be nim na Hi xa de ut nesao.✡ Kol 2:17 Ngan ak nggoni naha xa Hi tehiteni mi Mosis e melele xa tesemae ni tengan vakili ni Nim Tavolin nan tehit, “Upol ni holesok xil vus te nim ak ihusil nini Nim Eo xa natepisen ni minuk e Vathu Senae.” (Eks 25:40) 6 E xosali, polien xa Iesu di pol ni nggoni vatixar na pris xil bos mak mu mili ngan xa pris xil tetiamu latepol ni. E melele xa xi di pol pe met Hi e rin na moletin xil, di pol nggusil hitxatien te xeih hu xa bos mak mu mili hitxatien te xeih matu. Vengan melele xa Hi tepol ni, tesuv xati texo hitxatien tei xa tesak ni mei tehos mak mu. ✡ Hib 7:22; 9:15; 12:24 7 Vahit vahe reitin xa hitxatien te xeih matu vamal tevi, ma Hi napol ni ti hitxatien te xeih teimun. 8 E vengan xa Hi tekameti xa moletin nan xil latehur xoteh hitxatien te xeih matu xa tepol ni tetel xil, xi tesep usil hitxatien te xeih teimun tehit, ✡ Ser 31:31-34
“Inou, Iahova, nabiteni xa melengien tei di bemei
xa inou nipol ni hitxatien te xeih hu tei itel mol‑Isrel xil e mol‑Sudah xil.* E huram 930 BC, huram xil tetiamu ni poten na Iesu, mol‑Isrel xil latevae tetel xil mun tang e lateseti xil latehe vanut moletin lu. Ngan xil xa lateti e not, latekes xil ni mol‑Isrel xil. E ngan xil xa latexo vatimol xa mahulong lu na Sudah e Bensamin lateti e saot, sangas visal taon te hal Serusalem, e latekes xil ni mol‑Sudah xil.
9 Hitxatien te xeih hu ak naxoni hitxatien te xeih matu ti
xa natepol ni tetel avu nae xil tetiamu,
e melele xa natetel xil ni heok
e natetiamu ni xil latehe reling kantri te hal Isip.
E vengan xa xil latehur xoteh hitxatien te xeih xa latepol ni tetel nou,
natekavitou ni xil.
10 Hitxatien te xeih hu xa nipol ni itel mol‑Isrel xil e melele nen ak imak:
Inou, Iahova, niling rae navan xil iti e nenemien nae
e nitis xati iti e tinexil.
Inou nihe Hi nae,
e xil lihe moletin navan xil.
11 Isak ni, ti e xil mun napispisi mi tuneli tengan vakil Iahova
vengan xa xil vus likil nou ngamu,
ngan xil xa latereli, ha ituxoh ngan xil xa latellep.
12 Reitin, xil likil esaeen navan vengan xa ninaketeh ti mun nasa mi xil
ve holesok xil xa tamal ti xa latepol ni.
Io, ninanem ti mun usil tesaen nae xil
13 Misak ni, melele xa Hi tesep usil “hitxatien te xeih hu” tepisen ni xa hitxatien te xeih xa tepol ni tetel xil mei be neta matu ngamu. E holesok xil xa be neta matu e tapol ti mun, nave nousav ti ma ha ikesae vari.
✡8:1: Hib 3:1; 4:14; 6:20; 7:26; 9:11; Sam 110:1; Mat 22:44; Mak 16:19; Pol 2:34; Efes 1:20; Hib 1:3; 10:12; 12:2
✡8:2: Nam 24:6
✡8:8: Ser 31:31-34
*8:8: E huram 930 BC, huram xil tetiamu ni poten na Iesu, mol‑Isrel xil latevae tetel xil mun tang e lateseti xil latehe vanut moletin lu. Ngan xil xa lateti e not, latekes xil ni mol‑Isrel xil. E ngan xil xa latexo vatimol xa mahulong lu na Sudah e Bensamin lateti e saot, sangas visal taon te hal Serusalem, e latekes xil ni mol‑Sudah xil.