17
Minehinen te xeihen na Hi bemei e Iesu
Mak 9:2-13; Luk 9:28-36
1 Melele xa melengien tei e he sav (6) mei mitavi, Iesu nggur Pita, Temis del Sion (xa be tua na Temis) e del xatel latobe nesao e vathu tei tengan xatel ak kestang latiti vituei en. 2 E inggak, latopus tenbe Iesu biles. Valnaon mihinehin nggoni eai, e eising nan xil mei mieh pupu e mihinehin nggoni laet.✡ 2Pit 1:16-18 3 Vatei takes, latpus Mosis e Ilaetsa lustal e ba lusepin del Iesu.
4 Melele xa Pita pus xalu, biteni mi Iesu bit, “!Suv, bos xa xametel matodi inggak! Xosxa iem bei, ma matikili ni horao ihe tol: tei ihe mam, tei ihe ma Mosis, e tei ihe ma Ilaetsa.”
5 Melele xa di tamu misepin, momah tei xa mihinehin pupu mei mikutaxol xatel. E latlong rae tei mistal nggo en xa bit, “Ngan ak be Natuxoli reitin xa eheien navan di en.✡ Sam 2:7; Mat 3:17; 12:18; Mak 1:11; Luk 3:22; 2Pit 1:17 Inou nabesi nou pupu ven. !Muteong xati!”✡ Dut 18:15; Pol 3:22
6 Melele xa Pita xatel latlong rae ak, uli xatel mikan pupu, e latomot latobe tan. 7 Melele xa ladi tamu e tan, Iesu bemei e duxol xatel bit, “Totamea. Ulimitel nakan ti mun.” 8 E melele xa latpet rat metexatel, lattapus ti mun moletin xalu ak, Iesu kestang de visal xatel.
9 Melele xa di latsuvul ra vathu ak, Iesu misep xol xatel bit, “Mutnahiteni ti mi moletin tova usil naha xa mutepusi ituxoh melele xa inou, Nat Moletin, nimea rilomun ra maten.”
10 E moletin nan xatel latsisi latbit, “?Veneh ma titsa xil te rae na Mosis labiteni xa Ilaetsa imei itiamu ni Mesaea xa Hi tehit xati?”✡ Mal 4:5-6
11 E Iesu bit rilomun ni bit, “Reitin xa Ilaetsa imei tengan ipol ni holesok xil vus mei imal rilomun. 12 E nabiteni mi xamitel xa Ilaetsa temei ngamu✡ Mat 11:14; Luk 1:17 e moletin xil latnapus kil ti. Xil latepol tesa mini texoni ngan xa iexil tehei. E ixo suse nen tak, nave nousav ti, inou mun, Nat Moletin, nihur longpangasien ixo hexil.” 13 Melele xa Iesu biteni mak, ma latlong kila sung xa xi di bit usil Sion Baptis.
Iesu pol ni horamue tei xa ninin tesa tei da en mei bos rilomun
Mak 9:14-29; Luk 9:37-43
14 Melele xa Iesu xatel latsuvul ra vathu ak, latbisu mi vanut moletin xil. E moletin tei bemei visal Iesu, mitingeiril pe meten, 15 e biteni mini bit, “O suv, iem isae li e natuxoli, vengan xa xi di memat e milong pangas xi pupu ven. Melengien holu, xi di mot be upang mu oei. 16 Natehuri temei visal moletin nam xil, e xil lasakras lapol ni mei vahos rilomun.”
17 Melele xa Iesu milonge mak, biteni bit, “!Iva! !Xamim moletin xil te xosali ak, mukavui e neketen namim tovuol vari!✡ Dut 32:5,20 ?Niti visal xamim ituxoh vilieh? Veok buol ni xamim xa neketen namim tovuol. Muhur horamue ak vamei visal nou inggak.” 18 E melele xa Iesu pus horamue ak, minggol rat ninin tesa be relingi, e vatei takes, horamue ak mei bos rilomun.
19 Dutou ni melele nen ak, melele xa Iesu ba da sen tang, moletin nan xil lamei visali e lasisi labit, “?Veneh ma xamem matesakras mavol rerat ninin tesa ak?”
20 E Iesu bit rilomun ni mi xil bit, “Vengan xa neketen namim hokorong pupu. Reitin nabiteni mi xamim, xosxa munggur neketen xa hokorong nggoni utut mastad, mukila muviteni mi vathu ak muvit, ‘Umea ra rute ak, e uha xor,’ ma iha xor. Xosxa neketen namim di, ma neta tovuol vaxeih tengan mupol ni.” 21 * Rut vanuvei xil na Matiu lateling sepinien ak teti en xa bit, “Moletin mikila vahol rerat hisit ninin tesa ak melele xa misis e di bal ni anien.”
22 Di, lamea reling rute ak e lakakao labe provins te hal Kaleli. E melele xa di lakakao laba, Iesu biteni mi xil bit, “Nave nousav ti, inou, Nat Moletin, limaen ni nou ihe he moletin xil te ut etan. 23 Xil lihas vin nou. E, e melengien tol nen, nimea rilomun ra maten.”✡ Mat 16:21 Melele xa moletin nan xil lalonge mak, lanexo pupu.
Iesu nggal takis te Nim Eo nggo merekel tei
24 Vatei, Iesu del moletin nan xil di lakakao e lamei e taon te hal Kapaniam. Inggak, moletin xil xa laleh mani te takis te Nim Eo† Takis te Nim Eo tehe drakma lu na tiramue xil kekes xa texoni vatu taosen lu (2000 vatu). lamei visal Pita e lasisi labit, “?Midep? ?Titsa nam di nggal takis te Nim Eo, mu taxali ti?”✡ Eks 30:13; 38:26
25 E Pita bit rilomun ni mi xil bit, “Io, xi di nggale.”
Di, Pita dilomun be tim. Xi tasepin ti mu, e Iesu misis bit, “?Saemon Pita, onemi midep? ?Suv toto xil te ut etan di laleh takis e duti‡ Duti nggoni vat, takis xa lalingi da xat praes te holesok xil xa langguri ra ut sav xil. ra moletin si xil? ?Lalehi ra horamue nae xati, mu ra moletin sav xil tang?”
26 E Pita bit rilomun ni mini bit, “Lalehi ra moletin sav xil.”
Iesu biteni mini bit, “Imak, ma horamue nae xati xil linaxal ti takis. 27 E tave ti neta xa Hi xa be suv toto te holesok xil vus be Tata naralu, ralixal takis te Nim Eo nan vengan xa tavos ti xa ralosak ni moletin xil ak tine vasoh xat ralu. Ma ha, uhe Oei Kaleli e uso huk. Meseo xa usare itiamu, usah vulongen, e ukamet mani tei xa ipin tengan uxal rat takis naralu ni. Ti, uhuri e ha usa ni mi moletin xil ak.”
✡17:5: Sam 2:7; Mat 3:17; 12:18; Mak 1:11; Luk 3:22; 2Pit 1:17
✡17:10: Mal 4:5-6
✡17:17: Dut 32:5,20
*17:21: Rut vanuvei xil na Matiu lateling sepinien ak teti en xa bit, “Moletin mikila vahol rerat hisit ninin tesa ak melele xa misis e di bal ni anien.”
†17:24: Takis te Nim Eo tehe drakma lu na tiramue xil kekes xa texoni vatu taosen lu (2000 vatu).
✡17:24: Eks 30:13; 38:26
‡17:25: Duti nggoni vat, takis xa lalingi da xat praes te holesok xil xa langguri ra ut sav xil.