11
Iesu misep usil Sion Baptis
Luk 7:18-35
Melele xa Iesu misel xat moletin nan xil xa labe lu e le tei (12) bus, xi misil rerat xil laba. E xi mun be reling rute ak e ba be taon sav xil e provins te hal Kaleli. E melele xa di mikakao ba, di pispisi mi moletin xil e di bithiten longeongen hos na Hi mi xil.
E melele nen ak, Sion Baptis teta tamu e nim te xeih.* Suv toto Herod miso Sion be nim te xeih e Mat 4:12. Mat 14:3 Xi milongeong usil holesok xil xa Iesu di pol ni. Ma misil rut moletin nan xil tengan liha visal Iesu e lisis pilei usil polien nan. Misak ni, xil lamei visal Iesu e lasisi labit, “?Xouk iaxa obe Mesaea xa Hi tehit xat xa isila imei, Mal 3:1; Mat 3:11; Sion 1:15,27; 6:14; Pol 19:4; Hib 10:37; Rev 1:4,8 mu mutatil tova tesav?”
E Iesu bit rilomun ni mi xil bit, “Mutilomun muha e muhiteni mi Sion naha xa di mulonge e di mupusi. Ngan xil xa mete tevar, di laketeh; ngan xil xa latesakras lakakao, di lakakao; ngan xil latehur mesien leporsi, hilbexil mei bos; ngan xil vurangexil tevon, vurangexil metal; ngan xil latemat, lameul rilomun; e ngan xil xa latehe hoeo di langgur longeongen hos na Hi. Aes 35:5-6; 42:18; 61:1 E Hi ituxol xat ngan xil xa tine nasoh ti ve pispisien mu sexien xil navan.” Rev 3:21; 12:11; 14:12
Melele xa moletin xil na Sion Baptis di laba, Iesu misep usili mi vanut moletin xil bit, “?Melele xa mutehe uruvuol tengan mupus Sion Baptis, Mat 3:5 mutenemi mutehit ti mupus hisit moletin eah? ?Muteha tengan mupus moletin tei xa taxeih ti nggoni husmunae tei xa teviei xa misakras vasomal melele xa votiang di buhi? E‑e. ?Ma muteha tengan mupus naha? ?Moletin tova xa mising ni eising xil xa bos pupu? E‑e. Vengan xa moletin xil xa di lasing mak ladi e nim xil xa mahulong ma suv toto xil. ?Muhiteni minou, muteha tengan mupus naha vari? ?Provet tova? !Reitin! Nabiteni mi xamim xa moletin ak be eilep mak mu mili provet sav xil. Mat 14:5; 21:26; Luk 1:76 10 Vengan Sion be xi xa Vanuvei Eo na Hi di misep usili bit,
‘Upusi. Inou nisil eloheoh navan itiamu ni xouk.
Xi iaxa iha tengan isak mesen suse ve meien nam.’ (Mal 3:1) Mak 1:2; Luk 1:76; 7:27; Sion 3:28
11 “Reitin li nabiteni mi xamim, moletin sav tovuol xa latepesi e ut etan xa be eilep mak mu mili Sion. E xosxa moletin votei tei imaen Hi te ut nesao mei ihe suv toto nan, ma xi ihe eilep mak mu ili Sion pe met Hi. 12 E melele xa Sion di tehithiten sepinien na Hi duxoh xosali, Hi di pol nggeih tengan vasak ni haxot te lelaxatien nan mei vahe eilep mu, e ngan xil xa nenemien nae nggeih di lamos en. Luk 16:16 13 Vengan xa tisen xil na provet xil vus tetiamu tetel rae xil na Mosis teha tetuxoh Sion latesep usil melele xa Hi mei ihe suv toto na moletin xil. 14 E xosxa xamim mubesi xamim tengan muke reitin en, ma Sion be Ilaetsa xa Hi tehit xati tehit isila imei. Mal 4:5; Mat 17:10-13; Mak 9:11-13; Luk 1:17; Sion 1:21 15 Xosxa vurangemim di, muteong kuhi ni naha xa di nabiteni. Mat 13:9,43; Mak 4:9,23; Luk 8:8; 14:35; Rev 2:7; 13:9
16 “?Xamim, moletin xil te xosali, munggoni naha? Xamim munggoni tutut horamue xil xa di ladotan sangas ni von posen e di lake xat xil mun tang labit,
17 ‘Melele xa xamem di mapol ni nggoni ngan xa di mabas kitar e sien,
iemim ti tavei tengan muvol vatel xamem.
E melele xa di mapol ni nggoni ngan xa di madang,
iemim ti tavei tengan mutang vatel xamem.’
18 Xamim munggoni tutut xil ak vengan xa iemim ti tavei nou mu Sion mun. Melele xa Sion Baptis bemei, xi di bal ni anien ve sisen e tamu ti uaen, e xamim iemim ti tavei mubit, ‘!Sion, ninin tesa tei da en!’ Mat 3:4; 9:14 19 Di, melele xa inou, Nat Moletin, namei, nangganien e namu uaen. E xamim iemim ti tavei nou mubit, ‘!Pus ti moletin ak! Xi di ngga vin xi ni anien e di mumun tova tang. E xi di mikes moletin xil te takis e moletin tesa sav xil ni timue.’ Mat 9:14; 9:11; Luk 15:1-2; 19:7 E sexien nar kekes ipisen ni xa visi e xir di nggusil metisouen na Hi.”
Iesu misepin nggeih xat moletin xil xa lasin ni
Luk 10:13-15
20 Di, Iesu misepin nggeih xat moletin xil te taon xil xa xi teha tepol ni merekel xil holu en. Vengan neta sav xa latepusi, latnaviles ti ra sexien tesa xil nae. 21 Xi biteni bit, “!Aue li! !Isa pupu mi xamim, Siu xil te hal Korasin! !E isa pupu mun mi xamim, Siu xil te hal Betsaeta! Vengan xamim mutesin merekel xil xa natepol ni pe metemim, Hi isa pangasien ihe holu mi xamim. Vengan xa vahit moletin xil te hal Taer e Saedon Aes 23:1-8; Soel 3:4-8; Amos 1:9-10; Sak 9:2-4 xa latave Siu ti, lapus hisit merekel xil vaxoni ngan xa mistal mi xamim, ma xil laviles ra tesaen nae xil nousav ngamu. Io, xil lapisen ni xa lalonge vasa vamak: lasing ni talmusu xil e laxul ni vulmeas. Esta 4:1; Rev 18:19 22 Reitin li nabiteni mi xamim xa, e Melengien te Lepisien, longpangasien xa Hi isa ni mi xamim ixeih mak mu ili ngan xa isa ni mi ngan xil xa lateti e taon xalu te hal Taer e Saedon. 23 ?E xamim, Siu xil te hal Kapaniam, munemi xa Hi ipet rat xamim muhe ut nesao? !E‑e! !Xi iso xamim muhe etan e Upang xa misakras vamat! Vengan xa vahit moletin xil te hal Sodom Sen 19:24-28; 2Pit 2:6; Siud 1:7 lapus merekel xil vaxoni ngan xa natepol ni tetel xeihen pe metemim, taon ak vata tang vatuxoh xosali. 24 Reitin li nabiteni mi xamim xa, e Melengien te Lepisien, longpangasien xa Hi isa ni mi xamim ixeih mak mu ili ngan xa isa ni mi ngan xil xa lateti e taon te hal Sodom ili xamim.” Mat 10:15; Luk 10:12
Iesu misa memesien mi Hi ve movotei xil xa laneket en
Luk 10:21-22
25 E melele nen ak, Iesu misis bit, “Tata, xouk obe Suv te ut nesao e ut etan. Namesuk holu vengan xa di oling xuxus ni holesok xil ak ra ngan xil xa labe metisou e lakilakil kuhi. E di opisen koute teni mi ngan xil xa langgoni tutut horamue xil xa latasukul kuhi ti. 1Kor 1:26-29 26 Tata, ngan ak be reitin vengan xa nggusil naha xa xouk iem bei tengan vastal. Reitin.”
27 Di, Iesu misepin mi moletin xil bit, “Tata navan miling holesok xil vus di e heok. Mat 28:18; Sion 3:35; 13:3; 17:2; Plp 2:9 E moletin xil latapus kil ti Nat Hi vengan xa Tamen kestang di pus kila. E moletin xil latakil ti Hi vengan xa Natneli kestang mikila del ngan xil mun xa Natneli bosei xil tengan ipisen ni mi xil. Sion 1:18; 10:15
28 “Mumei visal nou, xamim xa di mulong pangas xamim ve holesok xil xa meas xa di mupoe e meulien namim, e inou nisa ngengelen mi xamim. Hib 4:1,10-11 29 Muteong ni nou e muhusil xat nou, vengan xa inou nabe hanmerou e nenemien navan be tan. Imak, ma mukamet ngengelen e meulien namim. 30 Ve pispisien navan xil taxeih ti e holesok xil xa nilingi e xamim tengan mupol ni memeit tang.” 1Sion 5:3

*11:2: Suv toto Herod miso Sion be nim te xeih e Mat 4:12.

11:2: Mat 14:3

11:3: Mal 3:1; Mat 3:11; Sion 1:15,27; 6:14; Pol 19:4; Hib 10:37; Rev 1:4,8

11:5: Aes 35:5-6; 42:18; 61:1

11:6: Rev 3:21; 12:11; 14:12

11:7: Mat 3:5

11:9: Mat 14:5; 21:26; Luk 1:76

11:10: Mak 1:2; Luk 1:76; 7:27; Sion 3:28

11:12: Luk 16:16

11:14: Mal 4:5; Mat 17:10-13; Mak 9:11-13; Luk 1:17; Sion 1:21

11:15: Mat 13:9,43; Mak 4:9,23; Luk 8:8; 14:35; Rev 2:7; 13:9

11:18: Mat 3:4; 9:14

11:19: Mat 9:14; 9:11; Luk 15:1-2; 19:7

11:21: Aes 23:1-8; Soel 3:4-8; Amos 1:9-10; Sak 9:2-4

11:21: Esta 4:1; Rev 18:19

11:23: Sen 19:24-28; 2Pit 2:6; Siud 1:7

11:24: Mat 10:15; Luk 10:12

11:25: 1Kor 1:26-29

11:27: Mat 28:18; Sion 3:35; 13:3; 17:2; Plp 2:9

11:27: Sion 1:18; 10:15

11:28: Hib 4:1,10-11

11:30: 1Sion 5:3