10
Iesu misil lelen moletin nan xil xa labe lu e le tei (12) tengan ha lipol
Mak 3:13-19; Mat 6:7-13; Luk 6:12-16; 9:1-6
Iesu mikes viton moletin nan xil xa labe lu e le tei (12). Melele xa lamei visali, misa xeihen mi xil tengan likila lihol rerat ninin tesa xil e lital rerat mesien ihe reling ngan xil xa lamesei ni mesien savsav xil. Mak 6:7; Luk 9:1
E ngan ak be his na eloheoh xil xa labe lu e le tei (12) na Iesu: Sion 1:40-51
Ngan xa diamu, Saemon (xa hisen tei mun be Pita)
e Andru (xa tuneli Pita).
Temis (nat Sepeti)
e Sion (xa tuneli Temis).
Pilip,
Batalomiu,
Tomas,
Matiu (xa teleh takis),
Temis (nat Alveas),
e Tatios.
Saemon (xa temos e vanut moletin tei xa iexil bei pupu tengan lameluv ra he mol‑Rom xil),
e Sudas Eskariot (xa tesa rat Iesu tehe he moletin tesa xil). Mat 26:25; 27:3; Mak 14:44; Sion 6:64; 12:4; 13:11; 18:2,5
Moletin lu e le tei (12) nen ak, Iesu misil lelen xil tengan ha lipol itel xat sepinien ak xa bit, “Xamim munava ti visal ngan xil xa latave Siu ti, mu ngan xil xa ladi taon xil na mol‑Sameria xil. Muha visal mol‑Isrel xil kestang xa langgoni sipsip xil xa lakesae. Ser 50:6; Mat 15:24 E melele xa di muba, muhithiten longeongen hos ak mi xil muhit, ‘!Hi di bemei tengan mei vahe suv toto na moletin xil!’ Muleh rerat mesien xil ihe reling moletin xil xa lamesei, e ngan xil xa lamat, mutal rerat xil ra maten. Ngan xil xa langgur mesien leporsi, mupol ni hilbexil mei imese rilomun, e muhol rerat ninin tesa ihe reling moletin xil. E melele xa ti mututou ni moletin xil, xil linaxal xamim ti, vengan xa holesok xil vus xa xamim mungguri, mutaxale ti ra Hi. E kakaoen namim, munahur ti mani 10 mu ateli. Munahur ti mun eising, sandel mu eitingil. Nabiteni mak vengan xa momal tengan moletin te polien xil lianien ixo he ngan xil xa lapol mi xil. Nam 18:31; Luk 10:4,7; 1Kor 9:14; 1Tim 5:18
11 “Melele xa mumei e taon mu metimal tei, mukamet moletin tei xa momal pe met Hi tengan vahur pilei xamim. Muti kat mutit tim san ituxoh melele xa muhe reling rute ak. 12 E melele xa muba tengan muti e tim tei, itiamu, musa tuxolxatien tei mi ngan xil xa ladi en muhit, ‘Tomat na Hi iti mi xamim.’ Luk 10:5-6 13 Xosxa moletin xil te tim ak lamal pe met Hi, ma mupus kila xa tomat namim iti mi xil. E xosxa xil mupus kila xa latamal ti pe met Hi, ma tomat namim itilomun imei mi xamim, e muhe reling xil. 14 E xosxa moletin tovuol xa ien vahei tengan vahur pilei xamim mu valong sepinien namim, muhe reling xil. E melele xa mumea ra tim sae mu taon nae, muhas rerat meas te rute ak ra lemim pe met xil. Ngan ak ipisen ni mi xil xa lapol misa pe met Hi. Luk 10:10-12; Pol 13:51 15 Reitin mak nabiteni mi xamim, e Melengien te Lepisien, pangasien xa Hi isa ni mi moletin xil xa ladi e taon ak ixeih mak mu ili ngan xa isa ni mi ngan xil xa lateti e taon te hal Sodom e Komorah tetiamu.” Mat 11:24; Luk 10:12; Sen 18:20–19:28; 2Pit 2:6; Siud 7
Iesu misel xat moletin nan xil bit melengien xil te xeih di bemei
Mak 13:9-13; Luk 21:12-17; 12:2-9; 12:51-53; 14:26-27; Mak 9:41
16 Iesu misel xat moletin nan xil bit, “!Muteong ni nou! Inou di nasil lelen xamim tengan muha e muxoni sipsip xil xa di mube hilaep te kuli reran xil. Luk 10:3; Sion 10:12; Pol 20:29; Rom 16:19 Ma xamim muxuxou kuhi tengan sexien namim imese kuhi. 17 Reitin, muxuxou kuhi ve xamim vengan xa vat xil na Siu xil lital xat xamim e liling xamim musoh e von lepisien nae. E xil limeas pangas xamim ni ao te xeih xil e nim te pispisiennae xil. Mak 13:9; Luk 21:12-13; Mat 24:14 18 E vengan xa di munggusil xat nou, lipol ni xamim ha musoh pe met vat xil te kavmen, e pe met suv toto xil mun. Imak, ma mukila muhithiten longeongen hos mi xil e mi ngan xil mun xa latave Siu ti. 19 E melele xa xil lital xat xamim, munanexo ti ve naha xa ti muviteni mi xil mu ti musa sepinien mi xil itep. Vengan xa, e melele nen ak, Ninin Eo iaxa isa naha xa mukila muhithiteni. Mak 13:11-13; Luk 12:11-12; Luk 21:14-19 20 Reitin, nave xamim ti xa ti musepin, e ihe Ninin Eo na Tamemim iaxa isepin ixo xamim.
21 “Moletin xil limaen tuexil tengan ha lihas vin xil, e tata xil mun ti lipol ni imak tang mi horamue nae xil. E horamue xil mun lihiles ni tamexil e ninexil mun, e limaen xil lihe he ngan xil xa lihas vin xil. Maek 7:6 22 Moletin xil vus iexil iat xamim vengan di munggusil xat nou. Mat 24:9; 24:13 E xamim xa musoh ixeih ituxoh hoxalite te sakpurunien xil ak, ma Hi iteh meulien e xamim. 23 Melele xa moletin xil ti lipurun xamim e metimal tei, ha mulesae muhe metimal sav. Reitin mak nabiteni mi xamim xa munahe taon xil vus ti mu te hal Isrel, e Nat Moletin itilomun imei. Mat 16:27-28; 24:27,30,37,44; 25:31; 26:64; Mak 13:26; 14:62; Luk 9:26; 17:30; 18:8; 21:27
24 “Moletin tei xa nggur pispisien nggo titsa tei, xi nanemi ti nahit xi be eilep mak mu mili titsa nan. E suse nen ak, slev tei nanemi ti nahit xi be eilep mak mu mili suv nan. Luk 6:40; Sion 13:16; 15:20 25 Ma xamim xa di munggur pispisien xil navan, muhesi xamim tengan mumei muxoni inou, titsa namim. Reitin, xamim xa munggoni slev navan, mumaal tengan mei muxoni nou, suv namim. E xosxa lakes inou, suv namim, ni ‘Belsepul,’* ‘Belsepul’ be his tei te xaren xa Siu xil di lakes Temat ni, xa koute teni be ‘Suv na angelu xil.’ his tei xa misa, ma mukila xa likes xamim ni his xil mun xa isa mak mu vengan xa mube navan.
26 “Misak ni, ulimim nakan ni xil ti. Holesok xil xa moletin tei bit vakutaxole, Hi isak ni mei iti kesao. Reitin, neta ngan xa miling xuxus ni, Hi ileh rerati imei e valkesao tengan moletin xil lipus kila. Mak 4:22; Luk 8:17 27 Holesok xil xa inou di nabiteni mi xamim melele xa ut maluxoluk, xamim ti muhit lelen ni mi moletin xil e miehen. E neta xa di nabit xuxus ni mi xamim, ha muhithiteni pe met moletin xil holu.
28 “Ulimim nakan ni ngan xil ti xa lakila lavas vin tiei namim e lasakras lavas vin ninin namim. Ulimim ikan ni Hi kestang, vengan xa xi mikila ihas vin moletin tei, e nggo xeihen mun tengan iso ninin nan mun Tem 4:12 ihe Upang xa misakras vamat. 29 Munem usil tutut tuman xil ak. Mukila muxal lu ni mani tei xa be hokorong tang. E xosxa Hi Tamemim namaen ni ti, ma ti e xil misakras vamot vamat. 30 E xamim, Hi buli sen hilumim xil vus xa di e vatumim. Pol 27:34 31 Misak ni, ulimim nakan ti vengan xa, pe met Hi, meulien namim be eilep mak mu mili meulien na tutut tuman xil ak. Mat 6:26; 12:12
32 “Moletin xa bit rati xa xi be moletin navan pe met moletin sav xil, ma inou mun, nihit rati xa xi be moletin navan pe met Tata navan xa de ut nesao. Rev 3:5 33 E ngan xa di bit rati pe met moletin xil xa xi misin nou, inou mun, nihit rati pe met Tata navan xa de ut nesao xa nasin moletin ak. Mak 8:38; Luk 9:26; 2Tim 2:12
34 “Munanemi ti munahit inou namei tengan niling tomat e ut etan. E‑e. Natamei ti tengan niling tomat, e namei tengan nisak ni moletin xil ti livae mi xil mun tang. 35 Nggoni ngan taxa Vanuvei Eo na Hi di biteni, inou namei tengan nisak ni …
‘tiramue xil lihiles livae itel tamexil,
atuli xil lihiles livae itel ninexil,
e havnahin xil lihiles livae itel avu sasa atou nae xil.
36  Reitin, moletin ihe elu mi ngan xil
xa ladi vituei dela e tim san xati.’ (Maek 7:6)
37 “Ngan xil xa eheien nae di e tamexil mu ninexil mak mu mili nou, ma latapin ti tengan mei lave moletin navan xil. E ngan xil xa eheien nae di e horamue mu atuli nae xil mak mu mili nou, ma xil mun latapin ti tengan mei lave moletin navan xil. 38 Ngan xil xa latapo eivave te longpangasien nae ti tengan lavusil xat nou, xil latapin ti tengan mei lave moletin navan xil. Mat 16:24; Mak 8:34; Luk 9:23 39 Ngan xil xa di lasak pisi tengan lakenin meulien nae ve xil tang, ma meulien nae ikesae reling xil. E ngan xil xa ti limaen meulien nae ikesae vengan di langgusil xat nou, ma, e ut nesao, xil likamet meulien sal. Mat 16:25; Mak 8:35; Luk 9:24; 17:33; Sion 12:25
40 “E kakaoen namim, ngan xil xa ti lihur pilei xamim, ixoni ngan taxa ti lihur pilei nou. E ngan xil xa ti lihur pilei nou, ixoni ngan xa ti lihur pilei Tata navan xa misil nou namei. Mat 18:5; Mak 9:37; Luk 10:16; Sion 12:44; 13:20; Kal 4:14 41 Reitin, moletin xa ihur pilei provet tei na Hi vengan xa mikila xa be provet tei, Hi isa huite teni mini ixoni ngan xa xi mun be provet tei nan. 1King 17:9-24; 2King 4:8-37 E moletin xa ihur pilei moletin xa momal vengan mikila xi momal pe met Hi, Hi isa huite teni mini ixoni ngan xa xi mun momal pe meten. 42 E moletin xa misa tutouen mi moletin tei navan xa be hokorong tang pe met moletin sav xil vengan mikila xi di nggusil xat inou, tave ti neta xosxa be oei te merir tang, reitin li nabiteni mi xamim, e ut nesao, moletin ak ihur sen huite teni.” Mak 9:41

10:1: Mak 6:7; Luk 9:1

10:2: Sion 1:40-51

10:4: Mat 26:25; 27:3; Mak 14:44; Sion 6:64; 12:4; 13:11; 18:2,5

10:6: Ser 50:6; Mat 15:24

10:10: Nam 18:31; Luk 10:4,7; 1Kor 9:14; 1Tim 5:18

10:12: Luk 10:5-6

10:14: Luk 10:10-12; Pol 13:51

10:15: Mat 11:24; Luk 10:12; Sen 18:20–19:28; 2Pit 2:6; Siud 7

10:16: Luk 10:3; Sion 10:12; Pol 20:29; Rom 16:19

10:17: Mak 13:9; Luk 21:12-13; Mat 24:14

10:19: Mak 13:11-13; Luk 12:11-12; Luk 21:14-19

10:21: Maek 7:6

10:22: Mat 24:9; 24:13

10:23: Mat 16:27-28; 24:27,30,37,44; 25:31; 26:64; Mak 13:26; 14:62; Luk 9:26; 17:30; 18:8; 21:27

10:24: Luk 6:40; Sion 13:16; 15:20

*10:25: ‘Belsepul’ be his tei te xaren xa Siu xil di lakes Temat ni, xa koute teni be ‘Suv na angelu xil.’

10:26: Mak 4:22; Luk 8:17

10:28: Tem 4:12

10:30: Pol 27:34

10:31: Mat 6:26; 12:12

10:32: Rev 3:5

10:33: Mak 8:38; Luk 9:26; 2Tim 2:12

10:38: Mat 16:24; Mak 8:34; Luk 9:23

10:39: Mat 16:25; Mak 8:35; Luk 9:24; 17:33; Sion 12:25

10:40: Mat 18:5; Mak 9:37; Luk 10:16; Sion 12:44; 13:20; Kal 4:14

10:41: 1King 17:9-24; 2King 4:8-37

10:42: Mak 9:41