7
Pispisien usil rin xa linalepis mosav xil ti
Luk 6:37-42
Iesu pispisi mun mi moletin xil bit, “Onalepis moletin sav ti tengan opisen tesaen nan xil. Vengan xosxa upol ni imak, ma Hi mun ilepis xouk tengan ipisen tesaen nam xil. Rom 2:1; 14:4,10; 1Kor 5:12; Tem 4:11 Vengan Hi ilepis xouk ixo hisit sexien taxa xouk di opol ni mi moletin sav. Ixo sexien xa di olepis mosav xil, Hi iaxa ilepis xouk ihusili. Mak 4:24
“?Veneh ma di opus kil saxut liei tei xa hokorong tang xa de met tumali, e otapus kil ti vari merut liei xa mahulong xa da xat metom?* Koute te liei xalu ak be tesaen. ?Veneh ma di osis tumali obit, ‘Tua li, maen nou namur rat saxut liei xai ra metom,’ melele xa merut liei tei xa mahulong dat e metom? Xouk di opol ni sexien hos xil nggo hilbom tang. Bos mak mu tengan upo rat merut liei xa da xat metom, ti, uketeh kuhi sung tengan ukila uhur rat saxut liei ra met tumali.
“Holesok eo na Hi, munasa ni ti mi kuli xil, maxani, lihiles e lingas rilomun ni xamim. Reitin, munaso holesok xil ti xa bos mi vueili xil vengan lihe tan tang en.” Nggo vole ak, Iesu di pispisi ni xa melele xa di osa nenemien eo xil na Hi xa bos pupu mi ngan xil xa latamese ti pe met Hi, xil linem male ni tang e lihiles lipurun xouk mun tang.
Pispisien usil sexien xa rasis Hi ve neta ngan
Luk 11:9-13
Iesu pispisi mi moletin xil mun bit, “Xosxa iem ihei neta ra Hi, usisi, ma isa ni minuk. Reitin, xosxa ulang vesi, ma ukameti. Sisen nam ixoni ngan taxa ti urei puiteh na Hi, ma xi isaha minuk. Mak 11:24; Sion 14:13-14; 15:7; 16:23-24; Tem 1:5; 1Sion 3:22; 5:14-15 Vengan moletin xil vus xa di lasisi ve neta ngan, xil di langguri; ngan xil xa di lalang ves neta ngan, lakameti; e puiteh di misaha mi ngan xil xa di larei.
“?Visi e xamim tata xil mikila vasa meralihat tei mi horamue nan melele xa misisi ve anien? 10 ?Mu vasa tetal sasa tei mini melele xa misisi ve meseo? 11 Ma, tave ti neta xa mube moletin tesa xil, e mukil kuh sexien mak xa ti musa sanien xa bos mi horamue namim xil. ?E midep ni sexien na Hi Tamemim xa bos pupu xa de ut nesao? Sexien nan bos mili sexien namim, e isa holesok xil xa bos mi ngan xil xa ti lisisi.” Tem 1:17
Pispisien usil suse xa moletin ihusili tengan ihe ut nesao
Luk 13:24
12 E Iesu biteni mun mi moletin xil bit, “E holesok xil vus xa di mupol ni, mupol ni mi moletin sav xil ixoni ngan taxa iemim bei tengan xil lipol rilomun ni mi xamim. Mat 22:40; Rom 13:8-10 Vengan xa nenemien ak be vatite te rae xil na Mosis e Tisen na provet xil tetiamu.”
13 Di, Iesu biteni bit, “Xamim, suse tengan muve ut nesao tave temale ti. Bos tengan muxo puiteh te suse xa hokorong tang. Vengan puiteh tei mun xalu xa eilep da, e moletin xil holu iaxa di langgo en e di langgusil suse nen xa be temale tang. E e hoxalit suse ak, xil likamet longpangasien xa mahulong pupu. 14 E puiteh xa be te suse xa nggeih xa hoxalite teni be meulien sal, puiteh ak hokorong tang. Moletin xil di lalang vesi, e vahis tang likameti e lixo en.” Pol 14:22
Pispisien usil rin xa itep iaxa lipus kil provet te luvosen xil
Luk 6:43-44; 13:25-27
15 Iesu misel xat moletin xil bit, “Mulaxat kuh xamim tengan provet xil te luvosen mei linaluvos xamim ti. Mat 24:11,24; Luk 6:26; 2Pit 2:1; 1Sion 4:1; Rev 16:13; Esek 22:27; Mat 10:16; Sion 10:12; Pol 20:29 Vengan xil langgoni sipsip xil xa labos e lamerou nggo hilbexil tang. E e tinexil, xil langgoni kuli reran xil xa lasa xa di langas purun moletin xil. 16 Xamim mupus kil xil ixo huite te meulien nae. Moletin misakras valeh huit tavu ra vatit ai, mu huit manggo ra vatit vilu. Sepinien xati teni bit, “moletin misakras valeh huit grep ra vatiei xa sanute di en, mu huit fik ra vatiei mun xa misa.” Tem 3:12 17 Usil rin ak, vatiei xil vus xa bos di laso huite xil xa bos, e vatiei xil xa misa di laso huite xil xa misa. Mat 12:33,35 18 Vatiei xil xa bos, lasakras laso huite xil xa misa, e vatiei xa misa lasakras laso huite xil xa bos. 19 E vatiei xil vus xa lataso huite ti vahos, lite rat xil e ha liso xil lihe upang. Mat 3:10; Luk 3:9; 13:6-9; Sion 15:6 20 Usil sexien ak vari, mupus kil provet te luvosen xil ak ixo huite te meulien nae. Mat 7:16; 12:33
21 “Moletin xil hao xa, taxeak, di lakes nou ni ‘suv,’ xil linava ti rute xa Hi te ut nesao be suv toto en. Ngan xil kestang xa di lapol ni naha xa Tata navan e ut nesao ien bei tengan xil ti lipol ni, xil iaxa ha liti visali. Luk 6:46; Mat 21:31; Rom 2:13; Tem 1:22,25; 1Sion 2:17 22 E Melengien te Lepisien, Rev 20:11-15 moletin xil hao limei visal nou e ti lisepin e rin nae lihit, ‘!Suv, Suv! ?Midep? E hisom matehit rat sepinien na Hi, matehol rerat ninin tesa xil, e matepol ni merekel xil holu.’ Ser 14:14; 27:15; Mak 9:38; Luk 9:49 23 Ti, inou nihiteni mi xil kekes nihit, ‘!Muhe reling nou xamim xa di mupol misa! !Natakil ti vari xamim!’ ” Mat 10:33; 2Tim 2:12; Sam 6:8; Mat 13:41-42; 25:41
Pispisien usil rin xa meulien nar ihusil sepinien na Hi itep
Luk 6:47-49
24  Di, Iesu misepin kor mi moletin xil nggo vole tei bit, “Xosxa xamim mulong sepinien navan xil ak e ha mupol ihusili, Tem 1:22 ma xamim munggoni moletin tei xa be metisou xa mikili ni nim man de tan tei xa nggeih. 25 Us mus, oei mileh be eilep, e votiang bas nim ak, e tameru ti vengan misoh e tan xa nggeih. 26 E xamim xa di mulong sepinien navan xil ak e di mutahusili ti, Tem 1:23 munggoni unu tei xa mikili ni nim man dat suhon tang. 27 Us mus, oei mileh be eilep, e votiang bas nim ak. !Ma nim man meru e mikiri lel vari tang!”
28  Melele xa Iesu pispisi mi tatit moletin xil ak bus, xil lamesep pupu ve pispisien nan xil. Mak 1:22; Luk 4:32 29 Vengan xa xi pispisi mi xil nggoni ngan xa pispisien nan xil nggo vulonge Hi vari tang. Pispisien nan xil taxoni na titsa xil te rae na Mosis ti xa dit labit rilomun ni sepinien na titsa sav xil tang.

7:1: Rom 2:1; 14:4,10; 1Kor 5:12; Tem 4:11

7:2: Mak 4:24

*7:3: Koute te liei xalu ak be tesaen.

7:6: Nggo vole ak, Iesu di pispisi ni xa melele xa di osa nenemien eo xil na Hi xa bos pupu mi ngan xil xa latamese ti pe met Hi, xil linem male ni tang e lihiles lipurun xouk mun tang.

7:7: Mak 11:24; Sion 14:13-14; 15:7; 16:23-24; Tem 1:5; 1Sion 3:22; 5:14-15

7:11: Tem 1:17

7:12: Mat 22:40; Rom 13:8-10

7:14: Pol 14:22

7:15: Mat 24:11,24; Luk 6:26; 2Pit 2:1; 1Sion 4:1; Rev 16:13; Esek 22:27; Mat 10:16; Sion 10:12; Pol 20:29

7:16: Sepinien xati teni bit, “moletin misakras valeh huit grep ra vatiei xa sanute di en, mu huit fik ra vatiei mun xa misa.”

7:16: Tem 3:12

7:17: Mat 12:33,35

7:19: Mat 3:10; Luk 3:9; 13:6-9; Sion 15:6

7:20: Mat 7:16; 12:33

7:21: Luk 6:46; Mat 21:31; Rom 2:13; Tem 1:22,25; 1Sion 2:17

7:22: Rev 20:11-15

7:22: Ser 14:14; 27:15; Mak 9:38; Luk 9:49

7:23: Mat 10:33; 2Tim 2:12; Sam 6:8; Mat 13:41-42; 25:41

7:24: Tem 1:22

7:26: Tem 1:23

7:28: Mak 1:22; Luk 4:32