4
Temat misak pis Iesu
Mak 1:12-13; Luk 4:1-13
Melele xa Iesu baptaes bus, Ninin Eo dela be uruvuol tengan vahur sakpisien vaxo he Temat. Hib 2:18; 4:15 Ba de uruvuol e di bal ni anien. Melengien hanutap lu (40) mei mitavi, Eks 34:28 e mae nggati tova tang. Di, Temat xa di misak pis moletin xil bemei visali. Xi biteni mi Iesu bit, “Xosxa reitin xa obe Nat Hi, Mat 4:6; 27:40 ma usemae ni hat xil ak tengan lihiles mei lihe beret am.”
E Iesu bit rilomun ni mini bit, “!E‑e! Ninapol ni ti, vengan xa Vanuvei Eo biteni bit,
‘Moletin misakras vameul e anien kestang.
Xi di meul e sepinien xil vus xa mistal nggo vulonge Hi.’ ” (Dut 8:3)
Di, Temat nggur Iesu lube Serusalem, taon eo na Hi. Neh 11:1; Mat 27:53; Rev 11:2; 21:2,10; 22:19 Xi miling Iesu misoh e ramut Nim Eo xa be nesao pupu. E melele xa ludi nesao, Temat biteni mini bit, “Xosxa obe nat Hi reitin, Mat 4:3; 27:40 hut he tan. Vengan xa Vanuvei Eo na Hi biteni bit,
‘Iahova isemae ni masxaxa nan xil
tengan lilaxat kuh xouk.
Xil lipo xatuk ni hexil,
tengan xouk onatun lem ti e hat.’ ” (Sam 91:11-12)
E Iesu bit rilomun ni mini bit, “!E‑e, ninapol ni ti! Vengan xa Vanuvei Eo biteni mun bit,
‘Munasak pis Iahova ti xa be Hi namim
tengan mukameti xa xi di mi xamim.’ ” (Dut 6:16) 1Kor 10:9
Di, Temat nggur Iesu lube vathu tei xa be nesao xa be nesao. E rute ak, pisen kantri xil vus te ut etan mini e neta xil xa bos di en. Xi biteni mini bit, “Holesok xil vus ak, nisa lelaxatien te xil minuk xosxa utingeiril tang e umot minou.” Eks 20:3; Dan 3:5,10,15; Rev 13:4
10 E Iesu bit rilomun ni mini bit, “!Setan, he reling nou! Ninapol ni ti vengan xa Vanuvei Eo biteni bit,
‘!Mumot mi Iahova xa be Hi namim
e muteong xat xi kestang!’ ” (Dut 6:13)
11 Di, Temat be relingi, e masxaxa xil mei ladutou ni.
Iesu pol kokot ni polien nan e provins te hal Kaleli
Mak 1:14-15; Luk 4:14-15
12 Melele xa Iesu di tamu e uruvuol, milongeong ni xa Herod Antipas, xa be suv toto te provins te hal Kaleli, xi tetal xat Sion Baptis e teso ni tehe nim te xeih. Mat 14:3; Mak 6:17; Luk 3:20; Sion 3:24 Ma, Iesu dilomun be provins te hal Kaleli. 13 E xi tava ti mun e metimal te hal Nasaret, xi ba sung di taon te hal Kapaniam Sion 2:12 xa be sangas ni Oei Kaleli. Taon ak de tan na vatimol na Sebiulon xal Navtali tetiamu. 14 Ngan ak mistal tengan vapol ni naha xa Hi tehit lelen ni texo provet Aesea mei mistal be reitin xa tehit,
15  “Nanggur longeongen tei ba mi moletin xil
xa ladi e tan na vatimol xil na Sebiulon e tan na vatimol xil na Navtali.
Longeongen ak iha mi ngan xil xa ladi sangas ni Oei Kaleli xa de ist ni Oeisal Sodan.
Reitin, iha mi moletin xil te hal Kaleli, e rute xil xa ngan xil xa latave Siu ti lapolu en.
16  Ngan xil xa ladi e maluxoluken te tesaen,
xil lipus miehen na Hi xa mahulong. Luk 1:79
Reitin, moletin xil xa lalonge, tetiamu lateti pe mamel te maten,
e taxeak, xil lipusi xa ut milan sung xiak.” (Aes 9:1-2)
17 E melele nen ak ba, Iesu ba di bithiteni mi moletin xil bit, “!Muhiles ra tesaen namim xil, vengan xa Hi Suv dat sangas visal xamim e bit mei vahe suv toto e meulien namim!” Mat 3:2; 10:7
Iesu mikes moletin hat te sar meseo en tengan lathusili
Mak 1:16-20; Luk 5:1-11
18 Vatei, Iesu mikakao nggusil seri Oei Kaleli. E melele xa mikakao ba, pus timue lu xa di luso net nalu be oei. Hisealu Saemon (xa laling hisen tei mun be Pita) e Andru (xa be tunali), Sion 1:40-41 e lube moletin te sar meseo en. 19 E Iesu biteni mi xalu bit, “Lumei luhusil nou. Xosali di mulihi meseo xil tang, e inou nisak ni xamil ti mulihi moletin xil.” 20 Vatei takes, lustokovein net xil nalu e lunggusili.
21 E melele xa latkakao latoba, Iesu pus timue lu mun, hisealu Temis xal Sion, xa lube nat Sepeti. Ludi bot del tamealu e di latdil pilei net natel xil. E melele xa Iesu mikes xalu, 22 vatei takes, lube reling bot e tamealu, e lunggusil Iesu.
Iesu pol ni polien na Hi e provins te hal Kaleli
Luk 6:17-19
23 Melele xa Iesu mikes moletin hat (4) ak, xatel latnggusili e labe rute xil holu e provins te hal Kaleli. E rute xil vus xa laba en, Iesu pispisi mi moletin xil e nim te pispisienna Siu xil. Xi di bithiten longeongen hos xa Hi di bemei tengan vahe suv toto na moletin nan xil, e di dal rerat moletin xil ra mesien nae xil vus. Mat 9:35; Mak 1:39 24 E longeongen usili mikapis e provins te hal Siria mun. Misak ni, moletin xil te rute ak laleh ngenexil xa lamesei ni mesien savsav xil: ngan xil xa tenbexil pangas, ngan xil xa ninin tesa xil ladi e xil, ngan xil xa di lamemat, e ngan xil mun xa rut tenbexil mat. Laleh xil lamei visal Iesu e xi midal rerat xil vus ra mesien nae xil. Mak 6:55-56 25 E melele xa Iesu di mikakao, vanut moletin xil holu di langgusili. Mak 3:7-8 Xil langgo provins te hal Kaleli e provins te hal Sudea. Langgo taon te hal Serusalem, e provins te hal Dekapolis. E langgo ut xil mun xa ladi ist te Oeisal Sodan.

4:1: Hib 2:18; 4:15

4:2: Eks 34:28

4:3: Mat 4:6; 27:40

4:5: Neh 11:1; Mat 27:53; Rev 11:2; 21:2,10; 22:19

4:6: Mat 4:3; 27:40

4:7: 1Kor 10:9

4:9: Eks 20:3; Dan 3:5,10,15; Rev 13:4

4:12: Mat 14:3; Mak 6:17; Luk 3:20; Sion 3:24

4:13: Sion 2:12

4:16: Luk 1:79

4:17: Mat 3:2; 10:7

4:18: Sion 1:40-41

4:23: Mat 9:35; Mak 1:39

4:24: Mak 6:55-56

4:25: Mak 3:7-8