2
Sosua Misil Moletin Xil te Xuxusen tengan Ha Lipus ti Taon tahal Seriko
Sosua 2:1-24
Di, Sosua misil xuxus ni moletin lu tahal Akasia. Xi misemae ni xalu tengan ha lalipus xuxus ni tan tahal Kenan, e taon tahal Seriko mak mu iaxa lalile kuhi. Melele xa ba luduxoh taon ak, xalu luba lube nim ma hoeaso tei, hisen Rehab, e lupat e rute ak. E vongien nen tak, suv toto tahal Seriko milongeong ni xa ngan Isrel lu lumei e tan nan tengan lalole xuxus ni.
Ma misa sepinien ak ba mi Rehab bit, “!Moletin lu xa ludi tim sam, lumei tengan lalopus xuxus ni tan nar xil vus! !Leh rat xalu lalostal!”
4-6 E melele xa milongeong ni xa moletin xil na suv toto lamei, Rehab mileh xalu luba e mikutaxol xalu be vanut flakis* xa xi teserep kuhi teti nim man nesao. Ma melele xa moletin xil na suv toto lamei lasisi, xi biteni mi xil bit, ''Reitin xa rut moletin xil latemei e tim savan, e inou natakil ti xa latexo xave. E melele xa meteneai tenu e sangas xa puiteh te vioh te taon vakoe, xalu luteha. Natakil ti rute xa luba en. E xosxa mutemanon muhusil xalu, ma mukila mutel xat xalu.'' Ma moletin xil na suv toto labe reling taon, e lakoe xol puiteh te vioh teni. Ba lalang ni ngan Isrel xalu ak e labe sotin ba laduxoh rute xa suse nggur xoteh Oeisal Sodan en.
Melele xa moletin te xuxusen xalu ak di lusak xat xalu tengan lalopat, Rehab be nesao tengan vasao ni xalu. Di, biteni mi xalu bit, “Inou nakila xa Iahova misa tan xil ak ngamu mi xamim. Moletin xil vus te kantri ak, ulixil mikan ni xamim. 10 Xamem matelongeong ni xa tetep iaxa Iahova tepol ni Tas te Pili temes ve xamim melele xa mutehe reling Isip. Malongeong ni rin mun xa mutehas vin Sihon e Ok, suv toto lu tahal Amor xa de rin xa be ist ni Oeisal Sodan. 11 E melele xa matelongeong ni, ulimem tekan pupu e himem temat vari. Xeihen xil vus namem tehe tovuol mun. Be reitin xa Iahova, Hi namim, be Hi te ut nesao e ut etan. 12 Xosali, mulpol ni hitxatien tei e his Iahova tengan mulipol ni ihos minou e vatimol navan xil ixoni ngan taxa inou napol ni mi xamil. Mulpol ni simeleleen tova tengan nipus kila e nike reitin e xamil ixo en. 13 Mulihit xati minou xa melele xa moletin namil xil limei inggak, muliteh meulien na tata navan itel nana navan, tua navan xil, hinoxoli xil, itel nae xil mun. !Mulnamaen xil ti li linahas xamem!”
14 Ma xalu lubiteni mini lubit, “Iahova ihur rat meulien namel xosxa malnapol ni ti neta xa mabiteni. Xosxa onaviteni ti mi moletin tova naha xa malpol ni, ma malhit xati minuk xa melele xa Iahova isa tan ak mi xamem, mupol ihos minuk, e malisoh e sepinien xil namel.”
15-16 Rehab biteni bit, “Mulihe vathu xil xa di iaxor tengan moletin xil na suv toto linakamet xamil ti. Mulixus muliti en melengien ihe tol ituxoh melele xa xil litilomun limei. Itutou ni, xamil mulkila sung mulhusil suse namil muliha.” Nim xa Rehab teta en latepol ni tehisten tetel vioh te taon. Ma melele xa latsepin bus, xi miso ao tei mikitel nggo windo man, e maen rumali lusuvul lunggo en lube tan.
 
22 Moletin te xuxusen xalu ak luba lunggus ludi vathu xil ak. Moletin na suv toto xil lalang ves xalu melengien tol, e latakamet xalu ti. Ma ladilomun labe taon tahal Seriko. 23 Di, moletin te xuxus en xalu ak lusuvul lumei etan ra vathu xil ak, lunggur xoteh Oeisal Sodan e ludilomun lube visal Sosua. Melele xa ba lupusi, lubit rat holesok xil vus xa testal mi xalu mini. 24 E lubiteni mun lubit, “Malkila xa Iahova misa sein tan xil vus ak mi xir. Moletin xil vus te rute xil ak, ulixil mikan pupu ni xir.”

*2:4-6: