17
Ngan ak be sepinien na Iahova xa texo provet Seremaea xa bit,
“Pangasien iti mi ngan xil xa eheien nae tara ti e nou e labiles ra nou.
Xil di laling nenesien nae di e xeihen na moletin xil kestang.
Xil langgoni holiei xil xa ladi e uruvuol,
lasakras lapus ti hosien e meulien nae.
Meulien nae ihe hihon ixoni tan tei xa bue,
e ixoni rute tei xa sol tepurun tan nen tengan neta ti nameul en.
 
E ngan xil xa di laling nenesien nae di e nou,
inou nituxol xat xil.
Xil lixoni vatiei xil xa lalih xil ladi seri oeisal,
xa amulut xil meul ba duxoh oei ak.
Melele xa pangasien xil limei ixoni melele xa eai nggan nggeih,
ulikanen ihe tovuol e xil vengan lipus hosien ixoni liei tei xa ute xil memaas vehakut.
Tave ti neta xa us namus ti vehakut,
e xil tit litaxao tang iha.
 
“Tin moletin di miluvos vehakut,
di mesei e neta tovuol mikila vapol ni vahos rilomun.
Sexien nen nggeih tengan moletin vanem kila.
10 E inou, Iahova, di nale kil nenemien na moletin xil,
e di napus kil holesok xa di e tine xil.
Nisa xolesi mi xil ihusil sexien nae xil,
e nisa huite te hisit polien eah xil xa di lapol ni.