9
Di, Hi misa tuxolxatien mi Noah del natneli xatel bit, “Horamue namim xil lihe holu xa lihe holu isak ni ut xil vus e ut etan ipolu ni xil. Holesok xil vus xa lameul e ut etan, uli ikan ni xamim: vongoro xil, tuman xil e meseo xil mun. Xil vus, naling meulien nae di hemim. Tetiamu, natsa utute, huiei e koute te anien kestang mi moletin xil tengan lava ni. E xosali, nisa hisi te vongoro xil mun mi xamim te anien en. E munaxa ngan ti xa ra di tamu en, vengan xa ra be vatit meulien.
“E rin te re moletin, xosxa moletin tei ihas vin moletin sav imat, ma xi mun, lihasi imat. E xosxa vongoro tei ihas vin moletin tei imat, ma vongoro nen ak mun, lihasi imat. Moletin xil, natepol ni xil latexoni nou. Misak ni, xosxa moletin tei ihas vin moletin sav imat, xi mun, muhas vari ni imat.
“E xamim, ieok bei tengan horamue xil namim lihe holu, e mei lipolu e ut etan.”
Di, Hi biteni mun mi Noah del natneli xatel bit, “Xosali ak, inou di napol ni hitxatien te xeih tei del xamim e itel ngan xil xa limei itutou ni xamim. 10 E napol ni mun del xat holesok xil vus xa lameul: vongoro e tuman xil, e holesok xil vus xa latestal tetel xamim ra tuturil ak. 11 Nabit xati xa ninasu lelen ti mun holesok xil vus xa lameul ladi e ut etan ni oei. Reitin, oei nasu lelen ti mun ut etan. 12 Hitxatien ak, di napol ni del xamim e holesok sav xil xa lameul ladi e ut etan, e nipisen ni itel simeleleen tei. 13 ?Mupusi? Naling hinehin ak de momah te tilang hat. Ma melele xil vus xa moletin xil lipusi, linem xati xa hitxatien navan be reitin. 14 Misak ni, melele xa nikutaxol ut etan ni momah te us, hinehin mun istal. 15 E melele xa nipusi, ninem xat hitxatien te xeih navan xa natepol ni tetel xamim e tetel vongoro xil mun xa ninasu lelen xil ti mun ni oei xa mahulong.”