Sepinien xa diamu te
Polien
?Visi iaxa tetis vanuvei ak?
Moletin xa tetis vanuvei ak, hisen Luk. Luk tehe tokta tei✡ Kol 4:14 xa tesukul kuhi. Xi tenave eloheoh tei ti xa latehe lu e le tei (12). Xi tehe timue tei na Pol xa lutekakao vituei e lutepol vituei tehe holu✡ Kol 4:14; 2Tim 4:14; Plp 1:24 Luk tenave Siu tei ti, e tave ti neta xa tehe Sentael tei, mei teneket e Iesu Kristo.
Hi vari tesak ni Luk tetis vanuvei xalu ak te ‘Longeongen hos xa Luk tetisi’ e ‘Polien na eloheoh xil.’ Xi tekil kuh holesok xil xa testal e meulien na Iesu,✡ Luk 1:3 e tekil kuhi mun xa Sias testal tetep e taon te hal Serusalem e teha tetuxoh rute sav xil mun texo suse eah.✡ Pol 1:8 Xi tekapis e ut xil holu tetel eloheoh Pol.✡ Kol 4:14; 2Tim 4:14; Plp 1:24; Pol 16:10-17; 20:5–28:16 Luk tetis vanuvei ak te ‘Polien’ e huram hanutap tol e tol mun AD (huram 63 tetutou ni poten na Iesu), e melele xa Pol tete taon xa mahulong te hal Rom e di tetatil melele xa suv toto xa mahulong te hal Rom ilepis rin nan.✡ Pol 28:30
?Visi iaxa tevuli vanuvei ak tetiamu?
Luk tetis vanuvei ak teha mi timue tei nan xa hisen Teopolis.✡ Luk 1:1; Pol 1:1 Koute te his ak be ‘moletin xa eheien nan di e Hi.’ Luk tetis vanuvei ak teha mi moletin ak, e tekila mun xa moletin xil holu xa latave Siu ti livuli.
?Luk tetis vanuvei ak veneh?
Luk tehit vapisen kila xa Sias testal tetep - Vanuvei te Polien di misep usil sexien xa Sias testal kokot e Serusalem. Xi misep usil polien xa Iesu tesa ni mi eloheoh xil e mi Kristin xil ngasen.✡ Pol 1:7-8 Di pisen ni mun xa xeihen na Ninin Eo di bemei e moletin xil xa laneket e Iesu, e di misak ni neketen nae mei nggeih mak mu.✡ Pol 2:1-12 Luk tesep kil sexien xa Kristin xil latepol vituei tetiamu, e tetep iaxa latetutou ni moletin xil.✡ Pol 2:43-46 Luk tesep usil sexien xa Sias di meul en e mei be mahulong e rute xil holu.✡ Pol 2:47; 8:4
Luk tehit vapisen kila xa xeihen na Ninin Eo tesak ni Sias temeul tetep - E vanuvei ak, Luk tesep kila xa melele xa Sias testal e Serusalem, moletin xil latepus Hi xa tesak ni hisit merekel xil ak latestal:✡ Pol 2:14–7:60 moletin na Iesu xil latesepin ni sepinien sav xil xa tenave nae xati ti xa mosav xil latelong kila,✡ Pol 2:4,7-12 eloheoh xil latetal rat moletin xil holu ra mesien nae,✡ Pol 3:1-10; 5:15-16 e latesepin e latesetu tetel xeihen.✡ Pol 4:8-13,30-31 Di, sakpurunien tei xa mahulong mei tepurun Kristin xil e hal Serusalem, e holu e xil latelesae latehe rute sav xil e provins te hal Sudea e provins te hal Sameria✡ Pol 8:1,4-5 xa lutenave sotin pupu ti ra hal Serusalem. E melele xa Iesu tehiles meulien na Pol, Hi tesila tetel Kristin sav xil teha tengan lavur longeongen hos usil Iesu Kristo vaha mi Siu sav xil xa lateti e ut sav xil e ut etan xa kavmen te hal Rom di telaxat xil. E ngan xil xa latave Siu ti xa latexo Afrika, Siria, Esia, Masedonia e Rom mun✡ Pol 12:1–28:30 mei laneket.
Luk tehit vasep kil vatit neketen na Kristin xil - Luk di tetis xat rut sepinien na Hi xa Pita tesetu ni mi Siu xil usil vatit neketen nan,✡ Pol 2:14-41; 4:8-12; 10:34-48 tetel rut sepinien xa Pol tesetu ni mi moletin xil xa latave Siu ti.✡ Pol 13:16-41; 17:22-32; 22:1-21; 26:1-29 Luk tepisen ni xa longeongen hos usil Iesu Kristo di tekapis e ut xil holu, e sepinien teni momal tengan moletin xil te kantri xil vus lakila mei lineket en. Luk teta tetel Pol e melele xa Pol di tetatil suv toto xa mahulong te hal Rom tengan ilepis rin nan e kot.✡ Pol 28:30 Misak ni, moletin holu lanemi labit Luk tetis uvei xalu ak te ‘Longeongen hos usil Iesu Kristo xa Luk tetisi’ e ‘Polien na eloheoh xil’ tengan vahit kil vatit neketen na Pol tengan vatutou ni rin nan.
Luk tehit vapisen kila xa sakpurunien xil misakras vahas tan ni Sias na Iesu Kristo - Luk tepisen ni xa Kristin xil holu xa di lavithiten longeongen hos na Hi di labisu ni melele te xeih xil e meulien nae (nggoni Pita✡ Pol 4:3; 12:3-17 e Pol✡ Pol 16:22-40). Rut moletin xil di labas vin xil (nggoni Stivin✡ Pol 7:59-60 e Temis✡ Pol 12:2). Rute ngan xil mun, moletin xil di lapurun xil (nggoni Pol✡ Pol 15:19; 17:5-9; 18:6; 19:23-41). E sakpurunien xil xa nggeih xiak misakras vahas tan ni Sias na Iesu Kristo vengan xa Ninin Eo di e moletin xil teni. E xi iaxa di misak ni Sias meul mei be mahulong e nggeih mak mu.
Vatit nenemien tei te vanuvei ak de Polien 1:8
Iesu biteni bit, “Xamim mukil ngan ak kestang, melele xa Ninin Eo imei e xamim, mupolu ni xeihen. Ma ti musep usil nou e hal Serusalem, e ut xil xa di provins te hal Sudea, e provins te hal Sameria, e ut sav xil mun iha ihur vuol ni ut etan.”
?Naha iaxa di e vanuvei ak?
1. Polien na Pita del Siu xil. (1:1–12:25)
a. Sias na Iesu Kristo testal kokot e Serusalem. (1:1–7:59)
b. Sias ba duxoh provins te hal Sameria e Siria. (8:1–12:25)
2. Polien na Pol del ngan xil xa latave Siu ti. (13:1–28:31)
a. Kakaoen kokot na Pol tengan vahithiten longeongen hos mi moletin xil e provins xalu te hal Kalesia e Pampilia. (13:1–14:28)
b. Kaonsel te Sias te hal Serusalem lamaen ni tengan Kristin xil xa latnave Siu ti mei lamos e Sias, neta sav xa latahusil rae na Siu xil ti. (15:1-35)
c. Kakaoen na Pol xa tehe valu nen xa tetuxoh provins te hal Esia e Masedonia. (15:36–18:28)
d. Kakaoen na Pol xa tehe vatol nen xa tetuxoh provins te hal Esia e Masedonia mun. (19:1–21:14)
e. Pol tesep usil vatit neketen nan e von koten e hal Serusalem, Sesaria, e teha tetuxoh taon xa mahulong te hal Rom. (21:15–28:25)
Map - Kakaoen hat na Pol
1
Sepkilaen na Luk usil vanuvei ak
1 Tuxoli Teopolis,✡ Luk 1:3
Nadis vanuvei ak bat minuk.
E tisen xa natetisi tehat minuk tetiamu,* Luk tetis vanuvei tei nggusil meulien na Iesu teha mi Teopolis ngamu. natehit usil holesok xil xa Iesu di tepol ni e di tepispisi ni e melele xa tepol kokot ni polien nan xil 2 ba duxoh melele xa Hi tehur rati tehe ut nesao. E melele xa Iesu teta tamu e ut etan, texo xeihen na Ninin Eo, xi tepispisi mi moletin xil xa tehosei xil mei latehe eloheoh nan xil.✡ Mak 16:19; Luk 24:49-51 3 Melele xa Iesu tehur longpangasien nan e temat, xi testal mi moletin nan xil melengien hanutap lu (40) e suse holu xa tepisen ni xa xi temeul rilomun reitin ra maten. E, e melele nen xil ak, Iesu tesepin tetel xil usil suse xa Hi mei ihe suv toto na moletin xil en.✡ Luk 24:36-42; Sion 20:19-20,26-27; Mat 28:18-20; Luk 24:46-49; Sion 20:21-23 4 E melele xa Iesu teta tamu tetel moletin nan xil, tesel xat xil tehit, “Munahe reling Serusalem ti mu. E mutatil sanien te Ninin Eo xa natehiteni mi xamim xa Tata navan tehit xati tengan isa ni mi xamim.✡ Luk 24:49; Sion 14:16-17; 15:26; Pol 2:33 5 Vengan xa, tetiamu, Sion tebaptaes ni moletin xil ni oei tang, e navehi ti, Hi ibaptaes ni xamim ni Ninin Eo.”† Melele xa labaptaes ni moletin tei ni oei, ngan ak pisen ni xa mei mineket e Iesu e biles meulien nan ra sexien tesa nan xil, e misa sen meulien nan mi Hi. E melele xa Kristin tei misa meulien nan mi Iesu, Hi Tamen di baptaes ni e Ninin Eo. Misak ni, Ninin Eo mei polu e meulien nan, di misa xeihen mini, e di pisen suse xa momal tengan ihusili. ✡ Mat 3:11; Mak 1:8; Luk 3:16; Sion 1:33
Hi nggur rat Iesu be ut nesao
6 Di, e melengien tei mun, eloheoh xil lamei vituei del Iesu e lasisi labit, “?Suv midep? ?Taxeak, melengien momal tengan xouk omei ove suv toto na mol‑Isrel xil vaxoni suv toto Deved tetiamu, mu tamal ti mu?”✡ Luk 24:21
7 E Iesu bit rilomun ni mi xil bit, “Melengien ak, Tata kestang nggur xeihen tengan ihosei. Tave tengan ti xa xamim mukil melele xa xi teling xati tengan istal en.✡ Mak 13:32 8 E xamim mukil ngan ak kestang, melele xa Ninin Eo mei ise xat xamim, mupolu ni xeihen. Ma ti muhithiten holesok xil xa natehiteni e natepol ni. Mupol ni e taon te hal Serusalem, e rute sav xil mun e provins te hal Sudea. Ivus, ti muhithiteni e provins te hal Sameria, e ut sav xil mun iha ihur vuol ni ut etan.”✡ Efes 3:16; Luk 24:48; Sion 15:27; Pol 2:32; 3:15; 5:32 9 Melele xa bit sepinien ak bus e xil dit tamu lapusi, Hi nggur rat Iesu be ut nesao, e momah tei mei da xole e latapus ti mun.✡ Mak 16:19; Sion 6:62
10 E melele xa di tamu laketeh be tilang hat, vatei takes, moletin lu xa lusing ni eising te mieh lusoh visal xil.✡ Luk 24:4 11 E lubiteni mi xil lubit, “?Mol‑Kaleli xil, xamim di musoh e di muketeh be nesao mak veneh? Iesu xa Hi nggur rati ra xamim e ngguri be ut nesao, xi vari tang itilomun imei ixo hisit sexien taxa di mupusi be ut nesao iaxai.”✡ Mat 26:64; Luk 21:27; Rev 1:7
Matias mei be eloheoh xa nggoles Sudas Eskariot
12 Di, eloheoh xil labe reling Vathu te Urvatiei te Olip e ladilomun labe Serusalem xa tave sotin ti.‡ Vathu te Urvatiei te Olip be kilomita tei ra hal Serusalem. ✡ Luk 24:50,52 13 Melele xa laduxoh taon, labe von toen xa be nesao e nim xa ladi en. Ngan xil xa ladi vituei e melele nen ak labe Pita, Sion, e Temis; Andru, Pilip e Tomas; Batalomiu e Matiu; Temis (xa be nat Alveas), Saemon (xa lakesi ni Silixin) e Sudas (nat Temis).✡ Mat 10:2-4; Mak 3:16-19; Luk 6:14-16 14 Vehakut, eloheoh xil ak lamei di lasis vituei. E moletin sav xil mun xa mei di lasis vituei del xil labe Meri (nine Iesu), tua na Iesu xatel, del rut atou xil mun.
15 Melengien vahis mei mitavi, e moletin xil xa laling neketen nae e Iesu lamei vituei. Moletin xil vus sangas laduxoh handred tei e hanutap tei (120). Melele xa ladi vituei mak, Pita mitamea misoh pe metexil e biteni mi xil bit, 16 “Tuxoli e hinoxoli xil, sepinien xa suv toto Deved tehit lelen ni e Vanuvei Eo mei mistal be reitin usil Sudas Eskariot xa tetel ngan xil xa latemei latetal xat Iesu.✡ Sam 41:9 17 Sudas tehe tei e xamem xa Iesu tehosei, e xi mun tepol vituei tetel xamem e polien namem.”
18 (Vat xil na pris xil latesa mani mi Sudas ve tesaen xa tepol ni. E melele xa Sudas temat, latehur mani nan e latexal rut tan ni. Ngan ak tehe tan taxa xi temot en, xa tesak ni vangen temesel e tinen xil testal.§ Mat 27:1-10 biteni xa vat xil na pris xil latehur rilomun ni mani xa latesa ni mi Sudas, e latexal tan tei ni. Tumulen ak tehiteni xa Sudas teha tesar hiraen e vatiei xa di misoh de tan ak. E melele xa ao ak temeot, tenben temot tehe tan, e vangen temesel. 19 Melele xa longeongen usil rin xa Sudas temat texo en tekapis e ut xil vus te hal Serusalem, lakes rute ak ni ‘Akeldama,’ xa koute teni be ‘Tan te Ra.’)
20 E Pita biteni mun bit, “Reitin, suv toto Deved tehit lelen ni usil Sudas e Sam tei tehit,
‘Hi Suv, upol ni vatimol nan iha ikesae,
e horamue tovuol mun nati e tim san.’ (Sam 69:25)
Deved tehit lelen ni mun tehit,
‘Bos xa moletin tei mei ixolesi e ihur voninen.’ (Sam 109:8)
21 Ve rin ak, momal tengan moletin sav tei mei imos e xamem, tei xa tehusil xamem tetiamu e melele xa matehusil rohon ni Suv Iesu, e texulehi tehusil xamem e melele xil vus xa matekakao tetela.✡ Luk 1:2; Sion 15:27; Mat 3:13-15; Mak 1:9; Luk 3:21; Mak 16:19; Pol 1:9 22 Reitin, muhosei moletin tova xa teta tetel xat xir e melele xa Sion di tebaptaes ni moletin xil, mei duxoh melengien xa Hi tehur rat Iesu tehe ut nesao. Rihosei tova e xil vari tengan mei ipol itel xamem e ti ihit rati mi mosav xil xa be reitin xa tepus Iesu temea rilomun ra maten.” 23 Ma xil labosei moletin lu: Siosep Barsabas (xa hisen tei mun be Sastas) e Matias.
24 Di, lasis mi Hi labit, “Suv, xouk okil nenemien na moletin xil vus. Ma upisen ni mi xamem xa visi e moletin xalu ak iaxa otehosei✡ Sion 2:24-25 25 tengan mei ipol ixoni eloheoh nam. ?Visi e xalu mei ixoles von Sudas, xa testokovein polien ak tengan ha ihe voninen xati te maten?” 26 ✡ Pro 16:33Di, lasis xalu tengan mei lalitis hisealu iti e hat lu. Di, laso hat xalu ak lube valit neta tei. E melele xa lalihi rat hat tei, lakameti xa be ngan xa his Matias da en.✡ Pro 16:33 Misak ni, be Matias iaxa langguri mei mos e eloheoh xil xa latehe tei e le tei (11).
✡^ Kol 4:14; 2Tim 4:14; Plp 1:24
✡^ Kol 4:14; 2Tim 4:14; Plp 1:24; Pol 16:10-17; 20:5–28:16
✡^ Pol 2:14-41; 4:8-12; 10:34-48
✡^ Pol 13:16-41; 17:22-32; 22:1-21; 26:1-29
✡^ Pol 15:19; 17:5-9; 18:6; 19:23-41
*1:1: Luk tetis vanuvei tei nggusil meulien na Iesu teha mi Teopolis ngamu.
✡1:3: Luk 24:36-42; Sion 20:19-20,26-27; Mat 28:18-20; Luk 24:46-49; Sion 20:21-23
✡1:4: Luk 24:49; Sion 14:16-17; 15:26; Pol 2:33
†1:5: Melele xa labaptaes ni moletin tei ni oei, ngan ak pisen ni xa mei mineket e Iesu e biles meulien nan ra sexien tesa nan xil, e misa sen meulien nan mi Hi. E melele xa Kristin tei misa meulien nan mi Iesu, Hi Tamen di baptaes ni e Ninin Eo. Misak ni, Ninin Eo mei polu e meulien nan, di misa xeihen mini, e di pisen suse xa momal tengan ihusili.
✡1:5: Mat 3:11; Mak 1:8; Luk 3:16; Sion 1:33
✡1:8: Efes 3:16; Luk 24:48; Sion 15:27; Pol 2:32; 3:15; 5:32
✡1:11: Mat 26:64; Luk 21:27; Rev 1:7
‡1:12: Vathu te Urvatiei te Olip be kilomita tei ra hal Serusalem.
✡1:13: Mat 10:2-4; Mak 3:16-19; Luk 6:14-16
✡1:16: Sam 41:9
§1:18: Mat 27:1-10 biteni xa vat xil na pris xil latehur rilomun ni mani xa latesa ni mi Sudas, e latexal tan tei ni. Tumulen ak tehiteni xa Sudas teha tesar hiraen e vatiei xa di misoh de tan ak. E melele xa ao ak temeot, tenben temot tehe tan, e vangen temesel.
✡1:21: Luk 1:2; Sion 15:27; Mat 3:13-15; Mak 1:9; Luk 3:21; Mak 16:19; Pol 1:9
✡1:26: Pro 16:33
✡1:26: Pro 16:33