15
Selkatien keke rehendem usil meatin sav keil helin ir
1 Ir, Kristin keil koa rokeih en demkatien orer, tahos imok rehekataun Kristin keil koa amemerau en demkatien one koa amundemi avit tounah houlu kilea vasakin keil avarmaltei en meten Ahi. Mal keke rehekataun keil avahous measien one, ka rehermundemteis usil ir. 2 Anatin, tetai en ir rehendem usil tuer keil en demkatien, ka rehoumon tounah keil enges koa kilea vakataun keil, vasakin keil avasi keil eni, ka vasuv kat demkatien one. ✡ Rom 14:19; 1Kor 9:19; 10:24,33 3 Veni Kristo emun romundemteis usil kei. Kei mumoni suval koa Tus Votut viteni vit, “O Ahi, selusien keil tatisa koa amul aviteni va katuk, suval koa amumoni va kat inau.” Sam keil 69:9 4 Tounah vasi koa amutisi en Tus Votut mulamu, amutisi vahisein ir ten kosa. Anatin, amutis tounah enek vasuv kat desien orer keke tiner vataveah ka vahati lat rendemien orer. ✡ Rom 4:23-24; 1Kor 10:11 5 Ka vi Ahi koa sakin ir rokilea rovahuli kat tiner ka koa mul vati lat rendemien orer. Sakini, navisi keke hesakin kami miheto vituai hetahos en tomat hesuval koa Iesu Kristo emun mumoni. 6 Hesakini, kami vasi mihehati lat vituai en isen Ahi koa vi Tamen Iesu Kristo, Asuv orer.
More longlongien usil Iesu Kristo vi onen Siu keil ka onen koakeil emun arvitei Siu
7 Sakini, veni Iesu Kristo kur revi kami mivi onen, kami mun mihekur revi Kristin savsav keil hesuval avi tuomi ka ahinami keil en demkatien vasakin koakeil ilesi ihati lat isen Ahi koa hetetamen imok. ✡ Rom 14:1 8 Veni naviteni min kami keke Kristo mai vi meatin takataunien onen Siu keil vasakin tounah keil koa Ahi vat kati min avu keil one telamu vamai vahi anatin. ✡ Mat 15:24; Maek 7:20; Umen 3:25 9 Ka en sise enek, Iesu sakin koakeil emun arvitei Siu keke akilea avamasmas Ahi ven enmahisien koa rie lati min keil. Koanik suval asa koa Tus Votut viteni koa vit,
“Sakini, inau nihitehit usil tahosien onom min koakeil arvitei Siu,
10 En out sav viteni vit,
“!Kami koa mirvitei Siu, mihesi kami hetal min meatin keil onen Ahi!” Duteronomi 32:43
11 Ka en out sav tamun viteni vit,
“Kami vasi koa mirvitei Siu, mihemasmas Iahova.
!Anatin, meatin vasi keil, mihemasmasi!” Sam keil 117:1
12 Ka en avong tamun, provet Aesea vit luvati vit,
“Meatin tai koa heka en vatiamal onen asuv houlu Deved hekistal hemai.
Kei hemai helosil kat koakeil arvitei Siu,
13 Navisi keke Ahi, koa romul roling desien orer mul ien, hesakin kami mihehilelau en sien vasi keil ka miheto en tomat ven demkatien koa mikuri. Navisi houmoni vasakin desien onami eni hemai hekeih imok heka en keihoen onen Ninin Votut en moulien onami.
Pol vit usil umen onen ral min koakeil arvitei Siu
14 Tuak ka ahinkuli keil, inau nakilea keke kami mivilelau en tounah keil tetahos, mivilelau en ileleien vasi keil, ka mikilea mivahisein kami eris. 15 Ka en leta koanik, nasel kat kami keih usil tounah tei keke masisil eni min kami. Ka namumoni mukonek veni Ahi, koa rie lat more envatien minau, san mormore umen enek minau. ✡ Rom 1:5; 12:3 16 Kei ling nau mahi meatin toumien onen Iesu Kristo keke moum vatal min koakeil arvitei Siu. Anatin, namum ral min keil suval navi pris tai onen Ahi keke mahitehiten more longlongien onen min keil, ka nasan moulien one mini suval sanien votut tai vaha mini. Veni kei rie lat keil avahi onen navong san Ninin Votut min keil. ✡ Rom 11:13; Plp 2:17 17 Ka veni nakapil vituai ral min Iesu Kristo, nakilea mahasi nau ven umen koa namumoni ven Ahi. 18 Ka nihasi nau en tounah keil enges koa Kristo mumoni ka enau koa mulamun koakeil arvitei Siu avalong kat Ahi. Iesu mumon koanik ka enau ral min selusien ka umen keil, ✡ 2Kor 3:5 19 ral min keihoen ten merikel ka metai sav keil, ka ral min keihoen onen Ninin onen Ahi. Sakini, nuva namum en out vasi keil keke mahitehiten vasin more longlongien usil Kristo min meatin keil, en out Serusalem va soutin rokol provins ten out Ilirikam. 20 Lisenges, ek vati maha mahitehiten more longlongien enek en out keil koa meatin keil arlongtei veah usil Kristo eni. Namumoni mukonek veni ek rovattei maha moum en out koa meatin sav tai mul mum ien tuai. ✡ 2Kor 10:15-16 21 Koanek musil asa koa Tus Votut viteni navong vit,
“Keil ilei kilea en kei koa arlongtei veah usili,
ka indem kilea suk tounah keil areingeingeni veah mulamu.” Aesea 52:15
Pol vit usil rendemien onen keke vaha vasao en Kristin keil en out Rom
22 Ka milesi keke, avaseini ek vati masao en kami, avong houlu, tounah keil ring koe nau. ✡ Rom 1:10-13 23 Ka kosa, nalesi keke namum vasi umen onak en out keil ekek. Sakini, namul namumon rendemien onak keke mahat masao en kami en out Rom suval ek vati mok moumoni tuetin tuai. 24 Anatin, ek vati keke masao en kami en sise onak maha en kantri ten out Spen. Namundemi keke mato vatal min kami ten avong havivis. Hevus, mikilea mivakataun nau en sise onak keke maha. ✡ 1Kor 16:6
25 Ka keitinek, namul nasak mesein nau maha en out Serusalem keke makataun meatin keil onen Ahi ekonek. ✡ Umen 19:21; 20:22 26 Ven sios keil en provins keilu ten out Masedonia ka Akea asi keil avasan he vakataun meatin keil onen Ahi en sios keil en out Serusalem koa atamurei en tounah. ✡ 1Kor 16:1; 2Kor 8:1; 9:2,12 27 Anatin, tine si avoumoni, ka koanek mal veni suval koa asa kes tounah min keil. Veni Siu keil asan tounah ten demkatien koa Ahi rokol kat keil eni min koakeil arvitei Siu. Sakini, mal keke koakeil arvitei Siu isan hati mani koa Ahi rokol kat keil eni vakataun Siu keil. ✡ Rom 9:4; 1Kor 9:11 28 Navong num vasin umen koanik ka nisa lat mani keil vasi koa aso ruaini ven keil, niha suk en out Spen. Ka en sise onak, nihat nisao en kami. 29 Ka navong nimai ven kami, nakilea keke nimai hetal min tokolkatien vasi onen Kristo keke masani min kami.
30 Tuak ka ahinkuli keil, veni rokapil vituai ral min Iesu Kristo, Asuv orer, ka veni envatien onen Ninin Votut mul en ir, napeah kami keke miheapil en hisien min Ahi hetal minau en usite onak. ✡ 2Kor 1:11; Plp 1:27; Kol 4:3; 2Tes 3:1 31 Mihehis keke Ahi heting koe moulien onak ran hen meatin keil en provins ten out Sudea koa arkurtei anatin en Iesu. Mihehis emun keke umen koa numoni en out Serusalem hemal en meten meatin keil onen Ahi ekonek. 32 Mihehis hemukonek hesakini, munak housil envatien onen Ahi, nihat nisao en kami hetal min sien ka reheto vituai keke nilonge hetahos en vituaien orer. 33 Ka inau navisi keke Ahi, koa vi vatte ten tomat, heto hetal min kami vasi. Anatin.