14
Kei koa suval sipsip ten sanien votut mulomal en Hou Saeon ral min meatin keil onen
Evus nalele, ka nales kei koa suval sipsip mul mulomal en Hou Saeon. Ka meatin onen koa avi taosen handred tai hanumau elu ka ehat (144,000) amulomal ral mini. Koakeil enek akur kat metai en veinae koa isen kei koa suval sipsip ka isen Tamen amutisi ien. Rev 7:4; 14:3; Esek 9:4; Rev 3:12; 7:3 Ka naraengon rea tai ka en out nesa koa musel keih suval navong mari tahe mutarum en ahat keil, vuo suval navong voulul muroh. Verien teni suval navong meatin keil apilei en string keil ten harp one. Esek 1:24; 43:2; Rev 1:15; 19:6 Meatin taosen handred tai hanumau elu ka ehat (144,000) enek amulomal en meten koakeil amul en out nesa, en meten tai koa mul en mari vulin ten keihoen, en meten tounah keil ehat (4) koa amoul, ka en meten elda keil emun. Navong amulomal mukok, amul amusau en souen hau tai koa onen koakeil Ahi kulat keil ran out netan, koakeil enges koa avi taosen handred tai hanumau elu ka ehat (144,000) enek akilea avasau eni. Sam 33:3; 40:3; 96:1; 98:1; 144:9; 149:1; Aes 42:10; Rev 5:9; 7:4; 14:1 Koakeil enek amutolas revi ka armatiltei vatal min ahin keil. Anatin, keil amumon rendemien one keke avousil kat Ahi enges ka irrotei hetal min etai ahin. Amusil kat kei koa suval sipsip en out vasi koa kei mul va en. Ahi lei kan keil ran meatin sav keil ten out netan ral min ran Iesu keke imai ilomal en meten Ahi ka en meten kei koa suval sipsip ten sanien votut keke imai isuval sanien votut ten moei anien heha min keilu. En moulien vasi one, arluvostei meatin ka sakien keil one mutolas. Sam 32:2; Aes 53:9; Sef 3:13
Angelo etel telsan selkatien va min meatin keil ten out netan
Evus, nales angelo tamun muka nesa en mesaiuai. Kei kur kat more longlongien koa ten lisenges vahitehiteni min meatin savsav vasi keil ten out netan: koakeil ten vatiamal vasi keil, koakeil ten selusien vasi keil, koakeil ten kantri vasi keil, ka min vati meatin savsav keil emun. Kei selus en rea takeih tai vit, “!Mihehouhou min Ahi ka mihekur anatin en hetetamenien onen! Ven avong emai keke kei helei rahit usite onen meatin vasi keil. !Miheha netan min kei koa mumon teilang nesa, out netan, atas ka vulioai keil!” Eks 20:11; Sam 146:6
Katau en koanek, angelo koa elu eni muka ka vit, “!Taon tatisa merangle koa avise en Babilon ven hetetamenien onen! Ahi san mahien ten vurohien min meatin teni veni asakin meatin ten kantri vasi keil alokovein sakien tetahos keil ka amusil sakien tatisa keil suval hoeaso tai san uaen min meatin keke voum vatisa vatal mini.” Aes 21:9; Ser 51:8; Rev 18:2; Ser 51:7; Rev 17:2; 18:3
Katau en koanek, angelo koa etel en keitel muka musil koakeilu lumulamu. Kei viteni en rea takeih tai vit, “Kami koa miva netan min tirendan koa mulamu ka min nana onen, ka mikur metai onen mul en veinami vuo en hemi, Rev 13:12-17; 14:11; 16:2; 19:20; 13:17; 20:4; Sam 75:8; Aes 51:17,22; Ser 25:15; Rev 15:7; 16:19; Sen 19:24; Sam 11:6; Esek 38:22; Rev 20:10; 21:18 10 kami varei mihekur mahien ten vurohien onen Ahi koa hekeih vis hekeih imok. Ahi heson kami miheha en ahang takeih keke mihelong mahien tatisa en meten angelo votut keil ka en meten kei koa suval sipsip. 11 Kami koa miva netan min tirendan ka nana onen, ka koa mikur metai ten isen, tupas ten mahien onami hehina nesa lises ka lisenges, mahien onami sakras vavus.” Aes 34:10; Rev 19:3; 13:12-17; 14:9; 16:2; 19:20; 20:4
12 Sakini, meatin keil onen Ahi koa along kat mengkatien onen ka amusil kat Iesu, tahos ilomal hekeih en demkatien one.
13 Evus, naraengon rea tai ka en out nesa koa vit, “Kitis selusien koanik: Kosa heha, tokolkatien hel ven koakeil imatmat ven demkatien one en Asuv Iesu!” Hib 4:10
Ninin vit kesi vit, “!Anatin eli! Keil iseh revi ran umen takeih one, keil ikur uite ten sakien tetahos keil koa amumoni.”
Iesu lei rahit usite onen meatin keil
14 Evus, nalele ka nales mahmah tai koa muoh. Ka meatin tai mul rondan ien koa alesi suval Natin Meatin. En vatin, vatluvoluv mul koa vi gol, ka vuli kat huknaef tai koa kan mul en hen. Dan 7:13 15 Evus, angelo tamun kistal ran Eim Votut ka visohiso keih va min kei koa rondan en mahmah vit, “Kikur kat huknaef onom ka kum hetal mini, veni kosa vi avong koa tounah vasi keil en out netan umen tuai, ka avong vinvin keke kileh vasin meatin keil ka kilei rahit usite one.” Soel 3:13; Mat 13:39-40 16 Evus, kei koa rondan en mahmah sein huknaef onen en out netan, ka kei musuhut en tounah vasi koa mul ien.
17 Evus, nales angelo tamun kistal ran Eim Votut en out nesa, ka kei mun vuli kat huknaef tai koa kan. 18 Evus, angelo tamun, koa lei kat ahang lou ten ahor ten sanien votut ka ven avet enek. Kei viso keih vina ven angelo koa vuli kat huknaef koa kan vit, “!Kikur kat huknaef onom ka kitei lat meatin keil ten out netan veni asuval hei grep keil koa men tuai en nei grep keil!” 19 Sakini, angelo sein huknaef onen en out netan, rei hei grep keil ran vatte. Evus, so ruain keil uva en out koa ave lin site rani koa vi out ten mari vurohien onen Ahi. Aes 63:3; Rev 19:15 20 Hei grep keil enek, ave lin site rani en out hae ten taon ten out Serusalem, ka ara teni mue rani suval oaisal koa taveah teni rokol kilomita handred etel (300 km) ka anev teni vesesal vatokol rokol mita elu (2).

14:1: Rev 7:4; 14:3; Esek 9:4; Rev 3:12; 7:3

14:2: Esek 1:24; 43:2; Rev 1:15; 19:6

14:3: Sam 33:3; 40:3; 96:1; 98:1; 144:9; 149:1; Aes 42:10; Rev 5:9; 7:4; 14:1

14:5: Sam 32:2; Aes 53:9; Sef 3:13

14:7: Eks 20:11; Sam 146:6

14:8: Aes 21:9; Ser 51:8; Rev 18:2; Ser 51:7; Rev 17:2; 18:3

14:9: Rev 13:12-17; 14:11; 16:2; 19:20; 13:17; 20:4; Sam 75:8; Aes 51:17,22; Ser 25:15; Rev 15:7; 16:19; Sen 19:24; Sam 11:6; Esek 38:22; Rev 20:10; 21:18

14:11: Aes 34:10; Rev 19:3; 13:12-17; 14:9; 16:2; 19:20; 20:4

14:13: Hib 4:10

14:14: Dan 7:13

14:15: Soel 3:13; Mat 13:39-40

14:19: Aes 63:3; Rev 19:15