139
Rehehati lat isen Ahi koa kilea revi sise keil orer
Asuv houlu Deved mutisi
1 O Iahova, keik kolei kirisil en asa koa mul en tinok ka kokilea revi inau.
2 Kokilea inau navong narondan ka navong namea.
Kokilea vasin rendemien keil onak, avaseini koro soutin.
3 Kokilea inau navong namual ka navong namuseh.
Kokilea revi sakien keil onak.
4 Navong narselustei veah,
keik, Iahova, kokilea selusien vasi keil onak tuai.
5 Keik kovi vieh koa mul en usite vasi keil onak,
ka ral min keihoen onom, koring koe moulien onak.
6 Navong namundem usil tounah keil koa komumoni en usite onak,
ileilien enek mariso ramat, ka nasakras mailea vasi.
7 ?Munak nihit malohosai ran Ninin onom, nakilea maha en out kave?
?Out kave niha ien koa keik kormultei ien? Out tovuol.
8 Munak nimat ka niha en out nesa, keik komul ien tuai.
Ka munak niha en out ten matien en huinev ten atan, en out enek emun, inau nilesuk.
9 Munak nakilea maka vaha vio … matokol out koa meteiai kistal ien,
vuo maha en out koa va munu ien,
10 en out keilu enek emun, komul mulamu enau ka komul katau enau.
Veni komul ien tuai keke kovakataun inau vatal min keihoen koa mul en hem.
11 Munak namundemi navit mankoli kilea vaav koe inau,
vuo nakilea mahiles meneai vamai vahi vongien, nasakras mato suai ranuk.
12 Nasakras, veni vongien rovitei mankoli enuk.
Anatin, en metom, vongien rovopolitei,
ka mankoli suval meneai enges.
13 Vi keik, Ahi, koa komum vasin avek.
Navong namul semau en vangen mama onak, keik komumon inau.
14 Navong namundem usil sise koa keik komum revi inau ka ien,
namutimanin ka navati lat isom.
Nakilea revi keke tounah vasi keil koa komumoni
tahos vis tahos imok.
15 Navong naro suai en vangen mama onak,
nasakras mato suai ranuk.
Veni navong sik keil amul semau asisur en keil,
keik kolei kilea enau tuai.
16 Navong avek rovus revitei veah,
komul koles inau tuai.
Avong keil vasi koa koling kati venau,
keik komutis lat keil tuai mul en tus onom mulamu en avong koa avasi inau eni.
17 O Iahova, rendemien keil onom amariso vareis ka nasakras mandem kilea keil vasi.
!Keil avi houlu vis avi houlu mok!
18 Vahit masak visi mahuli keil,
hulien teni vahi houlu mok valin veien vasi keil ten out netan.
Munak namatil ka namule eris,
nalesi keke namul veah ral minuk.
19 O Ahi, ek vati mok keke ku vini koakeil amum kalkali lises,
ka kisakin meatin keil koa e vati avouas inau mamat, iha ranau.
20 Meatin keil ekek amul aselus kutut usiluk,
ka aselus karen isom.
21 O Iahova, tinok tisa va kat koakeil tine tisa katuk,
koakeil asesein losilkatien onom, atisaso enges en metok.
22 Tinok vepeng va kat keil
ka avi vativieh ral minau.
23 O Ahi, kilei kirisil en moulien onak,
kisak vis inau ka kilea rendemien keil onak.
24 Munak kovotini keke namul namusil sise ten tisaen,
kilamun inau en more sise onom koa mul lisenges.