138
Iahova marite mok mulin tounah sav keil
Asuv houlu Deved mutisi
1 O Iahova, navati latuk ral min moulien vasi onak.
Ka en meten ahi sav keil, nisan masmasien hehat minuk.
2 Inau nitetengeiril ka nilele hemal en Eim Votut onom.
Nihou lat Isom veni korie lat envatien onom min meatin keil onom ka komum vasin hatkatien keil onom.
Anatin, nihati latuk veni korie lati
keke Isom ka selusien onom luvi hetetamen imok lumulin tounah sav vasi keil.
3 Mal en avong koa naviso vat minuk,
keik kolong hisoen onak ka kosan kataunien minau.
Kokulat metauen ranau
ka kosan keihoen minau.
4 O Iahova, asuv houlu vasi keil ten out netan ihati latuk
veni along selusien keil onom.
5 Keil isau usil more sakien keil onom,
veni keihoen onom, Iahova, marite mok.
6 Avaseini keik, Iahova, koro en out nesa,
komul komalingling vita ka kolele tahos en koakeil rendemien one mul netan.
Ka min koakeil amul avut sase en keil,
kokilea vasin sakien keil one ka koro soutin ran keil.
7 Avaseini nales tounah keil takeih amul akarahit inau,
nakilea keik komul koring koe inau.
Avaseini vativieh keil onak atisa kat inau,
keik komumoni keih va kat keil ka komutut inau ran he.
8 Tounah keil koa koling kati keke vakur out en moulien onak,
komum vasi.
O Iahova, konalokoveintei tounah keil koa komul komumoni en moulien onak.
Kumoni veni envatien onom mul lisenges.