2
Reheleisungein sakien onen Iesu Kristo koa rendemien onen mul netan
Veni mikapil ral min Iesu Kristo, nakilea kei mul mumon kami mikeih imok en demkatien onami. Veni envatien onen mul en kami, kei mul vati lat rendemien onami. Veni Ninin Votut mul en kami, mivi tinahos ka emi mahis kami eris. Sakini, navis kami keke mihoumon sakien keil ekek vasakinau nihilelau en sien: rendemien onami hetas, envatien koa mul en kami hetas, tinomi hetas, ka mihoum vituai suval meatin tas. Tovuol en kami nahasitei kei vuo naling kei nahina nesa nalin teisav. Tahos imok heling rendemien onen heha netan keke heles meatin sav hetahos helin kei. Kal 5:26; Rom 12:10 Tetai en kami nandemtei kei enges, ka kei hendem usil teisav keil. 1Kor 10:24,33
Rendemien onami heha netan hesuval etin rendemien onen Iesu Kristo mul netan.
Veni avaseini keke Kristo vi Ahi en usite vasi keil, Sion 1:1,2; 17:5
kei romumontei rendemien onen vahit hetetamenien onealu vavinvin.
Ka kei sokovein hetetamenien onen, 2Kor 8:9; Sion 1:14; Hib 2:14,17
ka mita netan mai suval slev tai.
Kei, avasi en out netan,
ka mai vi meatin enges koa aven mul.
 
Kristo mumon rendemien onen va netan
ka long kat Ahi va vio … mat.
Anatin, kei maen kei mat en aiveave suval meatin tisa tai. Sion 10:17; Hib 5:8; 12:2
Sakini, Ahi vati lat isen Kristo vina nesa, Umen 2:33; Hib 1:3
ka san eis ten hetetamenien mini
koa mulin eis sav vasi keil. Efes 1:21; Hib 1:4
10 Sakini, en isen Iesu, tounah vasi iha netan mini: Aes 45:23; Rom 14:11
koakeil ten out nesa,
koakeil ten out netan,
ka koakeil emun amul en out ten matien.
11 Anatin, keil vasi ihitehiteni ihit,
“Iesu Kristo vi Asuv onomai.”
Hemukonek, isen Ahi Tamen hehina nesa mok.
Selkatien keke moulien orer hetolas en meten meatin keil
12 Tuak ka ahinkuli keil, veni mikur rendemien koa netan suval Iesu, mihelong kat inau suval koa lises mimul mimumoni, en avong koa naro ral min kami, ka en avong kosa imok koa narrotei mun vatal min kami. Hetal min metauen, mihoum hekeih keke mihelei kat revi kami keke sakien keil onami hesuval koakeil Ahi mutut keil ran tisaen. Sam 2:11; 1Pit 1:17 13 Veni vi Ahi varei koa mul mum en kami. Kei mul sakin kami emi vati mivousil asa koa en vat kami mivoumoni, ka mul san keihoen emun keke mikilea mivoumoni. Sion 15:5; 1Kor 12:6; 15:10; 2Kor 3:5; 1Tes 2:13
14 En tounah vasi koa mimumoni, minasel kututtei ka minavul kattei kami eris. 1Kor 10:10; 1Pit 4:9 15 Hesakini, sakien onami hetie lati keke mivi natin Ahi keil koa amutolas, ka tounah tovuol vaha kat usite onami en meten meatin tisa keil ten kosa koa sakien one kalkali. Hemukonek, moulien onami hetitin luhu en keil hesuval hitu keil amul avihil en mankoli. Dut 32:5; Mat 10:16; Umen 2:40; Dan 12:3; Mat 5:14; Efes 5:8; 1Tes 2:19; 1Kor 1:8; Plp 1:6,10; Aes 49:4; 65:23; Kal 2:2 16 Mihehitehiten more longlongien min keil koa kilea vasan moulien min keil. Veni, munak hemukonek, nakilea mahasi nau en avong koa Iesu Kristo hemai ris eni. Veni moulien onami hetie lati keke narokol keite ten lohlohien onak ka umen onak son heite, rovitei heisav.
17 Avaseini munak u vini nau, nisi nau ka nimasmas Ahi ven kami vasi. Veni matien onak hesuval sanien votut tai koa nasani min Ahi ven demkatien onami. Rom 15:16; 2Tim 4:6 18 En vati sakien enek, navong kami mimul mikur sakvisien keil onami, kami mun mihemasmas Ahi ka mihesi kami hetal minau. Plp 3:1; 4:4
Selkatien keke me-Pilipae keil ikur revi Timoti ka Epafrodaetas
19 Munak housil envatien onen Asuv Iesu, namundemi keke nisila Timoti hehat ven kami hervitei tuetin. Hesakini, navong hemai ris venau, longlongien usil kami koa hekuri hesan sien minau. 20 Meatin onak tovuol emun vasuval Timoti koa envatien onen mul en kami ka en vati vakataun kami vasuval inau. 21 Meatin sav vasi keil amul amumon tounah keil koa keil enges e vati avoumoni, ka armumontei asa koa Iesu Kristo en vati. 2Tim 4:10 22 Ka Timoti rie lati tuai min kami keke kei mum min Iesu. Veni komal melmum vituai ven more longlongien onen Ahi suval ehon tai mul mum ral min tata onen. 23 Sakini, en avong etin koa nilong kilea asa koa umoni minau en kot, nisila Timoti hehat ven kami. 24 Ka namundesini keke, hervitei tuetin, Asuv hemaenau mun nihat ven kami.
25 Ka namundemi tahos keke nisila tuak Epafrodaetas hehat eris ven kami. Kami misani minau keke vahi eiloheh onami minau ka hekataunau en usite onami. Ka komal melmum vituai ka melvae vituai en umen onen Ahi. Plp 4:18 26 Kami milonge keke kei mesai houlu ka mimundemko veni. Ka navong Epafrodaetas long usil demkoen onami, kei longe tisa ka vit vasao eris en kami. 27 Ka anatin eli keke kei mesai marite ka vesesal vamat. Ka Ahi en mahisi, ka en mahis inau mun. Veni munak kei hemat, inau nilonge hetisa hehi houlu mun. 28 Sakini, ek vati li mok masila kei vahat ven kami keke mivasi kami eris navong mihelesi. Ka hemukonek, demvoen onak hetovuol emun. 29 Hesakini, mihekur revi kei en isen Asuv Iesu hetal min sien. Ka mal keke mihehouhou mok min vati meatin keil koa amukonek. 1Kor 16:16,18; 1Tim 5:17 30 Veni kei san moulien onen ka vesesal vamat ven umen onen Kristo. Kei mundem maen moulien onen, ka mai kataunau en usite onami keke voumon umen koa kami misakras mivoumoni.

2:3: Kal 5:26; Rom 12:10

2:4: 1Kor 10:24,33

2:6: Sion 1:1,2; 17:5

2:7: 2Kor 8:9; Sion 1:14; Hib 2:14,17

2:8: Sion 10:17; Hib 5:8; 12:2

2:9: Umen 2:33; Hib 1:3

2:9: Efes 1:21; Hib 1:4

2:10: Aes 45:23; Rom 14:11

2:12: Sam 2:11; 1Pit 1:17

2:13: Sion 15:5; 1Kor 12:6; 15:10; 2Kor 3:5; 1Tes 2:13

2:14: 1Kor 10:10; 1Pit 4:9

2:15: Dut 32:5; Mat 10:16; Umen 2:40; Dan 12:3; Mat 5:14; Efes 5:8; 1Tes 2:19; 1Kor 1:8; Plp 1:6,10; Aes 49:4; 65:23; Kal 2:2

2:17: Rom 15:16; 2Tim 4:6

2:18: Plp 3:1; 4:4

2:21: 2Tim 4:10

2:25: Plp 4:18

2:29: 1Kor 16:16,18; 1Tim 5:17