3
Iesu sakin hen meatin tai mai tahos en Sabat Mat 12:9-14; Luk 6:6-11
Iesu va ris en eim tahihiseien, ka en out enek meatin tai hen kali. Ka koakeil aro en out enek, amul alei mamah eni keke avalesi munak kei houmon hen meatin enek hetahos en Sabat veni alekat tounah koa akilea avasan selusien tisa vaha kati. Ka Iesu viteni min meatin enek helomal en meten meatin keil. Evus, vis keil vit, “?Mengkatien onen Mosis maen ir keke rovoumon sa en Sabat? ?Maeni keke rovakataun meatin, vuo rovapuruni? ?Maeni keke rovoutut moulien onen meatin tai, vuo rovou vini?” Ka keil aro raeng enges. Luk 14:3
Navong Iesu lei rahit keil, tin kat keil. Ka longe tisa keke rendemien one koteh en tounah onen Ahi. Evus, Iesu viles ka viteni min meatin koa hen tisa vit, “!Kitea hem!” Ka navong mutea eni, hen mai ris tahos. Mak 6:52; 8:17; Sion 12:40; Rom 11:25; Efes 4:18 Ka navong Farasi keil ales asa koa mumoni, amea ran out enek, ka, hatte tas, uva alah ruai ral min Siu keil koa asuv kat hiasuvien onen asuv houlu Herod. Ka alekat vis sise tai koa akilea avouas Iesu vamat vaka ien. Mat 22:15-16; Mak 12:13
Meatin houlu amusil Iesu
Iesu ral min meatin onen keil uva en Mari Oai ten out Kaleli, ka meatin keil houlu amusili. Tei en meatin keil aka en provins ten out Kaleli, Sudea, Mat 4:25 ka Itumea. Ka koakeil emun aka en taon ten out Serusalem, Taer ka Saedon. Ka teisav en keil aka en usite sav ten Oaisal Sodan. Meatin vasi keil enek umai ven Iesu, veni araengon asa koa kei mul mumoni. Meatin keil avi houlu ramat, sakini Iesu viteni min meatin keil onen vit isak mesein vot veni keke meatin keil anating kattei kei. Mak 4:1; Luk 5:3 10 Koakeil amesai amul amuting keil avatokol Iesu, veni kei mumon meatin houlu atahos eris. Mat 14:36; Mak 6:56 11 Ka navong meatin keil koa ninin tisa mul en keil alesi, uva netan mini, ka amis kai avit, “!Keik, kovi Natin Ahi!” Mak 1:34; Luk 4:41 12 Ka Iesu vul kat ninin tisa keil vit anahitentei min meatin keil anahit kei vi isei.
Iesu rie lat meatin teindan elu (12) keke avahi eiloheh keil onen Mat 10:1-4; Luk 6:12-16
13 Evus, Iesu vina en vatihou nesa ka rie lat meatin koa kei en vati avousili, ka umai veni. 14 Ka kei rie lat meatin teindan elu (12) keke avousili avamai avahi eiloheh keil onen, avaha avahitehiten more longlongien min meatin keil, 15 ka avahile lat ninin tisa ran meatin keil vatal min keihoen ten isen.
16 Koanik vi isen eiloheh teindan elu (12) koa Iesu rie lat keil: Saemon (koa Iesu ling isen tamun vi Pita); Mat 16:17-18; Sion 1:42 17 Tiemes ka tunali Sion koa Iesu vise keilu en ‘natin voulul’ (koa tata onealu Sepeti); Luk 9:54 18 Andru, Pilip, Batolomiu, Matiu, Tomas, Tiemes (natin Alveas), Tatios,* Tatios, isen tamun vi Sudas, natin Tiemes. Saemon (koa vi lariken Saemon mul en usite tai koa en vat Siu keil avamea ran hen kavmen ten out Rom.), 19 ka Sudas Eskariot koa hemae lat Iesu heha en hen meatin tisa keil. Mat 26:25; 27:3; Sion 18:2,5
Farasi keil avise Iesu en Temat Mat 12:22-32; Luk 11:14-23; 12:10
20 Iesu rie lat eiloheh teindan elu (12) onen evus, uva en teim tai en taon ten out Kapaniam. Ekonek, meatin houlu umai avalesi, sakini avong tovuol keke Iesu ka meatin keil onen avaanian. Mak 6:31 21 Navong mama onen ral min tunali keil akur longlongien usil asa koa Iesu mul mumoni ka mukave meatin keil amul aviteni keke mul mum vau, uva keke avaselus koe ka avahuli kati. Sion 10:20
22 Tei en tiser keil ten mengkatien onen Mosis aka en out Serusalem. Ka keil asan selusien va kat Iesu avit, “Belsepul ‘Belsepul’ vi isen tisa onen Temat koa aneite teni vi ‘asuv onen angolu keil.’ koa vi asuv onen ninin tisa keil mul ien ka mul san keihoen mini keke vahile lat ninin tisa keil ran meatin keil.” Mat 9:34
23 Sakini, Iesu vise Farasi keil umai veni ka selus min keil ka en tatavolien keil vit, “?Temat kilea vahile lat kei eris hemukave? 24 Munak meatin keil onen asuv houlu tai amul uvae min keil eris, keihoen onen asuv houlu enek sakras val vataveah. 25 Ka munak vatiamal tai mul vae ral min keil eris, isen vatiamal enek heha hevuol varei. 26 En vati sakien enek, munak Temat mul vile lat ninin tisa keil onen ka mul vae ral min keil eris, keihoen onen sakras val vataveah ka hevuol varei rani.
27 “Mahit kilea min kami vaka en tatavolien tai. Meatin sakras vaha en teim sen avkeih tai keke vahenan tounah keil onen navong avkeih koanek mul veah lei kokoe eni. Helamu, heha hepar kat avkeih enek. Hevus, meatin enek kilea vaha en teim sen ka valah vasin tounah keil onen.§ En tatavolien enek, eim vi out netan ka avkeih koa mul ien vi Temat. Ka navong Iesu mai en out netan, keihoen onen mulin keihoen onen Temat. Suval koa Iesu par kati ka lah lat meatin keil ran keihoen onen ka ninin tisa keil onen.
28 “Anatin eli naviteni min kami, Ahi kilea voumon methos onen vatal min meatin keil koa amumon vati tisaen keil houlu, vuo aselus karen isen Ahi varei. 29 Ka methos onen Ahi sakras val en meatin koa mul selus karen Ninin Votut ka tounah koa kei mul mumoni. Sakien tisa enek heha kat usite onen ka mahien koa hekuri veni sakras vavus.” 1Sion 5:16 30 Iesu viteni mukok veni Farasi keil aviteni keke kei mul mum ral min keihoen onen ninin tisa koa mul ien. Sion 7:20; 8:48,52; 10:20
Iesu vit lat isei vi mama ka tunali keil Mat 12:46-50; Luk 8:19-21
31 Mama onen Iesu ka tunali keil umai keke avalesi, ka amules hae. Asan selusien va neim keke Iesu vaha hae vales keitel. Mak 6:3; Sion 2:12; Umen 1:14 32 En avong enek, meatin keil houlu aro rahit Iesu ka aviteni mini avit, “Lesi, mama onom ral min tumali keil aro hae, ka e vati avalesuk.”
33 Ka Iesu vit kesi min keil vit, “?Isei vi mama onak? ?Isei vi tuak keil?” 34 Evus, lei rahit meatin keil enek ka viteni min keil vit, “Milesi. Koakeil enek avi mama onak ka tuak keil. 35 Koakeil amumon asa koa Ahi en vati avi mama onak ral min tuak ka ahinkuli keil.” Sion 7:17; 9:31

^ Mat 12:9-14; Luk 6:6-11

3:4: Luk 14:3

3:5: Mak 6:52; 8:17; Sion 12:40; Rom 11:25; Efes 4:18

3:6: Mat 22:15-16; Mak 12:13

3:7: Mat 4:25

3:9: Mak 4:1; Luk 5:3

3:10: Mat 14:36; Mak 6:56

3:11: Mak 1:34; Luk 4:41

3:12: Mat 10:1-4; Luk 6:12-16

3:16: Mat 16:17-18; Sion 1:42

3:17: Luk 9:54

*3:18: Tatios, isen tamun vi Sudas, natin Tiemes.

3:18: Saemon mul en usite tai koa en vat Siu keil avamea ran hen kavmen ten out Rom.

3:19: Mat 26:25; 27:3; Sion 18:2,5

3:19: Mat 12:22-32; Luk 11:14-23; 12:10

3:20: Mak 6:31

3:21: Sion 10:20

3:22: ‘Belsepul’ vi isen tisa onen Temat koa aneite teni vi ‘asuv onen angolu keil.’

3:22: Mat 9:34

§3:27: En tatavolien enek, eim vi out netan ka avkeih koa mul ien vi Temat. Ka navong Iesu mai en out netan, keihoen onen mulin keihoen onen Temat. Suval koa Iesu par kati ka lah lat meatin keil ran keihoen onen ka ninin tisa keil onen.

3:29: 1Sion 5:16

3:30: Sion 7:20; 8:48,52; 10:20

3:30: Mat 12:46-50; Luk 8:19-21

3:31: Mak 6:3; Sion 2:12; Umen 1:14

3:35: Sion 7:17; 9:31