19
Iesu visein meatin keil keke meatin koa retalihe natasiltei ran ahin onen Mak 10:1-12
Navong Iesu selus en tounah keil enek evus, kei ka onen keil alokovein provins ten out Kaleli ka uva en provins ten out Sudea en usi Oaisal Sodan. Marmari vangi meatin keil amusili en out enek, ka kei sak revi keil.
En avong enek, Farasi keil koan umai veni keke avasak visi. Mat 16:1 Sakini avisi avit, “Hit visi min komai. ?Mengkatien orer maen meatin hetasil ran ahin onen ven rendemien vasi enges?”
Ka Iesu vit kesi min keil vit, “?Mukave, kami mirvulitei Tus Votut onen Ahi? Veni mul viteni keke mulamu, navong Ahi mumon tounah en out netan, kei ‘mumon meatin, tai mumoni vi meahos ka tamun mumoni vi ahin.’ Senesis 1:27 Ka viteni mun vit, ‘Ven koanek, meahos hemea ran tata ka mama onen, ka heapil hetal min ahin onen, ka keilu luhetas.’ Senesis 2:24 Efes 5:31; 1Kor 6:16 Sakini keilu lurovitei mun elu, ka lumai lutas. Sakini asa koa Ahi kap vituaini, meatin enges noumontei natasil.”
Ka Farasi keil avisi avit, “?Mukonek, vensa varei Mosis meng kati vit, ‘Meatin koa vit valokovein ahin onen, hesan Setifiket ten Tasilien mini, evus, kilea vasila lati?’ Duteronomi 24:1
Ka Iesu vit kesi vit, “Mosis maen kami milokovein ahin keil onami veni vatumi keih ramat. Ka sakien enek tovuol en avong Ahi mum rohtoh en tounah vasi. Ka naviteni min kami keke meatin koa lokovein ahin onen, koa romatiltei vatal min meatin sav tai, ka meatin enek kur ahin sav, en meten Ahi, meatin enek mul mum tisa ral mini.” Mat 5:32; 1Kor 7:10-11
10 Navong selus min keil evus, meatin keil onen Iesu aviteni mini avit, “Munak hemukonek en meatin hetal min ahin onen, hetahos imok keke meatin tai heto sasen ka hertetalihetei.”
11 Ka Iesu vit kesi min keil vit, “Rovitei meatin vasi koa kilea vousil hihiseien enek, ka meatin keil koan, Ahi san keihoen min keil keke avousili. 1Kor 7:1-2,7,9,17 12 Ven meatin keil koan asakras avatetalihe veni out lou one tisa navong avasi keil. Ka meatin keil koan mun asakras avatetalihe veni meatin sav purun out lou one. Ka meatin tateisav emun amumon rendemien one keke anatetalihetei keke voum ven hiasuvien onen Ahi. Meatin koa kilea vousil sakien enek, tahos keke housili.”
Iesu san tokolkatien min titiali keil Mak 10:13-16; Luk 18:15-17
13 Evus, meatin keil akur titiali keil umai ven Iesu keke valing hen en keil ka vahis ven keil. Ka navong meatin keil onen ales keil avul kat keil.
14 Ka Iesu selus min keil vit, “Almaen titiali keil avamai venau ka minating koetei keil, veni Ahi vi asuv houlu onen vati meatin keil koa amukonek.” Mat 18:2-3 15 Sakini, navong umai veni, Iesu ling hen en keil ka san tokolkatien min keil. Evus, Iesu ka onen keil alokovein out enek.
Meatin hau tai lesi keih ramat keke valokovein mani onen keke vousil kat Iesu Mak 10:17-31; Luk 18:18-30
16 Navong Iesu mul mual va, meatin tai mai veni ka visi vit, “Tiser, numon sa koa hetahos keke nakilea makur moulien ten lisenges?” Luk 10:25
17 Iesu vit kesi vit, “?Kovis nau usil asa koa tahos vensa? Ahi enges, kei sasen tahos. Ka munak em vati kovakur moulien ten lisenges, kilong kat mengkatien keil onen.” Lev 18:5; Luk 10:28
18 Meatin enek visi vit, “?Ka mengkatien sa en keil?”
Ka Iesu vit kesi vit,
“ ‘Minouastei meatin namat.
Minakurtei ahin vuo meatin onen hanu sav.
Minahenantei tounah onen meatin sav.
Minoumontei luvosien naha kat isen meatin sav.
19  Mihehouhou min tata ka mama onami keil.’ Eksodas 20:12-17 Dut 5:16-20; Rom 13:9
Ka,
‘Envatien onami hel en meatin sav keil hesuval koa kami emi vat kami eris.’ ” Levitikas 19:18 Mat 22:39; Mak 5:43; Luk 10:27; Rom 13:9
20 Ka meatin hau enek vit risi min Iesu vit, “Inau nalong kat mengkatien vasi keil enek. ?Asa tamun narvinvintei veah eni?”
21 Iesu viteni mini vit, “Munak keik em vati kovamal vasi, kiha kisalem en tounah vasi onom ka kisan mani teni min koakeil tounah one tovuol. Luk 12:33; Umen 2:45; 4:34-37 Ka munak kumoni hemukonek, tounah onom hehi houlu en out nesa. Mat 6:20 Hevus, kimai ris ka kusil nau.”
22 Ka navong meatin hau enek raengon selusien onen, kei longe tisa ka va rani veni tounah keil onen houlu ka en rovattei valokoveini. Mat 6:24; Luk 16:13
23 Evus, Iesu viteni min meatin keil onen vit, “Anatin eli naviteni min kami, hekeih vareis min meatin koa tounah onen houlu keke vamaen Ahi vahi asuv houlu onen. 24 ?Mimundemi keke mari kamel tai kilea vakirisil en meten nidil tai koa havivi vis havivi mok? !Vuo, sakras! Ka meatin koa tounah onen houlu hekeih imok helin koanek keke vamaen Ahi vahi asuv houlu onen.”
25 Navong meatin keil onen Iesu araengoni, keil amutimanin houlu ka avisi avit, “?Mukonek, isei suk kilea vakur moulien ten lisenges?”
26 Iesu lei rahit en keil ka vit, “!Keinek! Meatin sakras voumoni, ka Ahi enges kilea voumon tounah vasi.” Sen 18:14; Siob 42:2; Sak 8:6
27 Evus, Pita viteni mini vit, “?Kolesi? Komai melokovein tounah vasi onomai keke mevousil katuk. ?Mukonek, Ahi hesan asa min komai?”
28 Ka Iesu viteni min keil vit, “Anatin eli naviteni min kami, en avong koa tounah vasi ten out netan hehi heite hau, inau, Natin Meatin, Dan 7:9-10; Mat 25:31; 20:21; Mak 10:37; Rev 3:21; Luk 22:30 nitondan en vuluk ten keihoen hetal min muohien. Ka en avong enek, kami mun koa mimusil inau mihetondan retai en vulin ten keihoen teindan elu (12) ka mihelosil kat meatin vasi keil koa amul en mari vatiamal teindan elu (12) ten out Isrel. 29 Ka meatin vasi koa alokovein teim se, vuo tue keil, vuo ahine keil, vuo tata, vuo mama, vuo titiali, vuo ah se keil venau, Ahi hesan ris uite teni hehi houlu vis hehi houlu mok hehi handred tai (100) helin asa koa alokoveini. Ka katau en tounah keil enek, keil ikur moulien ten lisenges emun. Mat 19:16; Luk 10:25 30 Ka houlu koa avi hetetamen kosa, imai ihi heisav enges, ka houlu koa avi meatin heisav kosa, imai suk ihi hetetamen keil.” Mat 20:16; Luk 13:30

^ Mak 10:1-12

19:3: Mat 16:1

19:5: Efes 5:31; 1Kor 6:16

19:9: Mat 5:32; 1Kor 7:10-11

19:11: 1Kor 7:1-2,7,9,17

19:12: Mak 10:13-16; Luk 18:15-17

19:14: Mat 18:2-3

19:15: Mak 10:17-31; Luk 18:18-30

19:16: Luk 10:25

19:17: Lev 18:5; Luk 10:28

19:19: Dut 5:16-20; Rom 13:9

19:19: Mat 22:39; Mak 5:43; Luk 10:27; Rom 13:9

19:21: Luk 12:33; Umen 2:45; 4:34-37

19:21: Mat 6:20

19:22: Mat 6:24; Luk 16:13

19:26: Sen 18:14; Siob 42:2; Sak 8:6

19:28: Dan 7:9-10; Mat 25:31; 20:21; Mak 10:37; Rev 3:21; Luk 22:30

19:29: Mat 19:16; Luk 10:25

19:30: Mat 20:16; Luk 13:30