11
Iesu selus usil Sion Baptis Luk 7:18-35
Navong Iesu sel kat meatin teindan elu (12) onen evus, kei sila lat keil avaha. Ka kei mun lokovein out enek ka va en taon sav keil en provins ten out Kaleli. Ka navong mual va, mul visein meatin keil ka vitehiten selusien onen Ahi min keil.
En avong enek, Sion Baptis mul veah en eim takeih.* Asuv houlu Herod son Sion va en eim takeih en Mat 4:12. Mat 14:3 Kei raeng koteh usil tounah keil koa Iesu mul mumoni. Sakini, kei sila tei en meatin keil onen keke uva ven Iesu ka avahis revi usil umen onen. Sakini, keil umai ven Iesu ka avisi avit, “?Keik varei kovi Mesaea koa Ahi vat kati keke hesila hemai, Mal 3:1; Mat 3:11; Sion 1:15,27; 6:14; Umen 19:4; Hib 10:37; Rev 1:4,8 vuo komai mehetosin meatin etai mun?”
Ka Iesu vit kesi min keil vit, “Miheha ris ka mihehiteni min Sion asa koa meraengoni ka melesi. Metovar keil akilea avalele, koakeil asakras avoual amual, koakeil akur mesaien ten leprosi ave tahos eris, koakeil ralinge vonhon araengon tounah, koakeil umat amoul eris, ka koakeil avi livere amul along more longlongien onen Ahi. Aes 35:5-6; 42:18; 61:1 Ahi hetokol kat koakeil armottei en demkatien one venau.” Rev 3:21; 12:11; 14:12
Navong meatin keil onen Sion uva, Iesu selus min vangi meatin keil usili vit, “?Navong miva en out volvol keke mivales Sion Baptis, Mat 3:5 mimundemi mivales vati meatin sa? ?Miva keke mivales meatin koa rokeihtei suval oumunai tetaveah koa sakras valomal navong eang mul muhi? !Vuo! ?Ka asa varei mivit mivaha mivalesi? ?Meatin tai koa musin en mormore eisin keil? !Vuo! Veni meatin keil koa amusin mukonek aro en mari eim omon asuv houlu keil. ?Alhiteni minau, miva keke mivales asa varei? ?Provet tai? !Anatin! Ka naviteni min kami keke meatin enek vi hetetamen imok mulin provet sav keil. Mat 14:5; 21:26; Luk 1:76 10 Veni Sion vi tai koa Tus Votut vit usili vit,
‘Kilesi. Inau nisila eiloheh onak helamu enuk.
Kei heha mau keke vasak mesein sise ten amaien onom.’ Malakai 3:1 Mak 1:2; Luk 1:76; 7:27; Sion 3:28
11 “Anatin eli naviteni min kami, meatin sav tovuol koa avasi en out netan koa vahi hetetamen imok valin Sion Baptis. Ka meatin kuren tai koa maen Ahi ten out nesa vahi asuv houlu onen, kei marite mok mulin Sion en meten Ahi. 12 En avong Sion mul vitehiten selusien onen Ahi rokol kosa, Ahi mul sakin hiasuvien onen vamai vakeih imok, ka koakeil akeih akapil ral mini. Luk 16:16 13 Veni tus keil onen provet vasi keil telamu ral min mengkatien keil onen Mosis aselus usil hiasuvien enek onen Ahi rokol avong koa Sion emai. 14 Ka munak kami mivasi kami keke mivakur anatinien eni, Sion vi Ilaetsa koa Ahi vat kati keke hesila hemai. Mal 4:5; Mat 17:10-13; Mak 9:11-13; Luk 1:17; Sion 1:21 15 Munak ralingomi mul, mihetaengon revi selusien koanik. Mat 13:9,43; Mak 4:9,23; Luk 8:8; 14:35; Rev 2:7; 13:9
16 “?Kami, meatin keil ten avong kosa, misuval asa? Kami misuval titiali keil koa arondan vesesal en out tahulhulien. Ka tei en keil amul avisohiso va min titiali sav keil avit,
17 ‘Navong komai memuas kitar en sien,
kami emi rovattei keke mivahol vatal min komai.
Ka navong komai memurang suval melonge tisa,
kami emi rovattei keke mivouai vatal min komai.’
18 Kami misuval titiali keil veni emi rovattei inau vuo Sion emun. Navong Sion Baptis emai, kei mul val ran anien keke vahis ka romuntei uaen, ka kami miseseini mivit, ‘!Sion, ninin tisa mul ien!’ Mat 3:4; 9:14 19 Ka evus, navong inau, Natin Meatin, numai, nakanian ka namun uaen. Ka kami misesein inau mivit, ‘!Ales meatin ekek! Kei vi meatin taanien ka meatin tamunmunien. Kei mul vise meatin ten takis ka meatin tatisa keil en tuak.’ Mat 9:14; 9:11; Luk 15:1-2; 19:7 Ka meatin keil ilei kilea isei mul musil meteisauen onen Ahi ka en heite teni koa mul kistal en moulien onen.”
Iesu selus keih kat meatin keil koa aseseini Luk 10:13-15
20 Evus, Iesu selus keih kat meatin keil ten taon keil koa kei mumon merikel keil houlu en mete. Veni avaseini alesi, arvilestei moulien one ran sakien tatisa keil one. 21 Kei viteni vit, “!Aue li! !Hetisa min kami, meatin keil ten out Korasin! !Ka hetisa mun min kami, meatin keil ten out Betsaeta! Veni kami milei sesein merikel koa namumoni en metomi, Ahi hesan mahien hehi houlu mok min kami. Munak meatin keil ten out Taer ka Saedon Aes 23:1-8; Soel 3:4-8; Amos 1:9-10; Sak 9:2-4 koa arvitei Siu, avales vati merikel keil koa namumoni en metomi, tuetin tuai, avasin en musi eisin ka avativin vulimeas en vate vatie lati keke avahiles ran tisaen keil one. Esta 4:1; Rev 18:19 22 Ka anatin eli naviteni min kami, en Avong koa ilei revi usite vasi onen meatin keil, Ahi en hemahis meatin keil ten out Taer ka Saedon helin kami. 23 ?Ka kami, meatin keil ten out Kapaniam, mimundemi keke Ahi hehati lat kami miheha en out nesa? !Vuo! !Kei heson kami miheha netan, en Ahang koa sakras vavus! Munak meatin keil ten out Sodom Sen 19:24-28; 2Pit 2:6; Siud 1:7 avales vati merikel keil koa namumoni en metomi, taon one val veah vatokol kosa. 24 Ka anatin eli naviteni min kami, en Avong koa ilei revi usite vasi onen meatin keil, Ahi en hemahis meatin keil ten out Sodom helin kami.” Mat 10:15; Luk 10:12
Iesu san masmasien min Ahi ven meatin kuren keil koa amul akur anatin eni Luk 10:21-22
25 En avong enek, Iesu viteni vit, “Tata, keik kovi Asuv ten out nesa ka ten out netan. Namasmasuk houlu mok veni keik koling suain tounah keil enek ran koakeil avi meteisau ka akileile. Ka korie lat aneite teni min koakeil asuval titiali koa arsukul revitei. 1Kor 1:26-29 26 Anatin Tata, koanik mul musil asa koa keik em vati vakistal. Anatin.”
27 Navong Iesu vis evus, viteni min meatin keil vit, “Tata onak ling tounah vasi en hek. Mat 28:18; Sion 3:35; 13:3; 17:2; Plp 2:9 Meatin keil arlei kileatei Natin Ahi, Tamen enges lei kilea eni. Ka meatin keil arkileatei en Ahi, Natnali enges kilea eni. Ka koakeil enges Natnali enek en vati vahothot en Tamen min keil, keil emun ilea eni. Sion 1:18; 10:15
28 “Almai venau, kami keil koa milonge mah ven tounah tameas koa mimul mivousi en moulien onami, ka inau nisan sehien min kami. Hib 4:1,10-11 29 Mihelong kat nau ka mihousil kat nau, veni inau namerau ka rendemien onak va netan. Hesakini, mihehotin sehien en moulien onami. 30 Ven hihiseien onak rokeihtei ka tounah koa nilingi en kami keke mivoumoni hemelalas.” 1Sion 5:3

^ Luk 7:18-35

*11:2: Asuv houlu Herod son Sion va en eim takeih en Mat 4:12.

11:2: Mat 14:3

11:3: Mal 3:1; Mat 3:11; Sion 1:15,27; 6:14; Umen 19:4; Hib 10:37; Rev 1:4,8

11:5: Aes 35:5-6; 42:18; 61:1

11:6: Rev 3:21; 12:11; 14:12

11:7: Mat 3:5

11:9: Mat 14:5; 21:26; Luk 1:76

11:10: Mak 1:2; Luk 1:76; 7:27; Sion 3:28

11:12: Luk 16:16

11:14: Mal 4:5; Mat 17:10-13; Mak 9:11-13; Luk 1:17; Sion 1:21

11:15: Mat 13:9,43; Mak 4:9,23; Luk 8:8; 14:35; Rev 2:7; 13:9

11:18: Mat 3:4; 9:14

11:19: Mat 9:14; 9:11; Luk 15:1-2; 19:7

11:19: Luk 10:13-15

11:21: Aes 23:1-8; Soel 3:4-8; Amos 1:9-10; Sak 9:2-4

11:21: Esta 4:1; Rev 18:19

11:23: Sen 19:24-28; 2Pit 2:6; Siud 1:7

11:24: Mat 10:15; Luk 10:12

11:24: Luk 10:21-22

11:25: 1Kor 1:26-29

11:27: Mat 28:18; Sion 3:35; 13:3; 17:2; Plp 2:9

11:27: Sion 1:18; 10:15

11:28: Hib 4:1,10-11

11:30: 1Sion 5:3