14
Iesu sak revi meatin tai ran mesaien onen en Sabat
En Sabat tai, Iesu va vaanian en teim onen avat tai onen Farasi keil. Ka Farasi sav keil umai ka amul alei kankan eni keke avalesi munak houmon tounah tai koa hermaltei en Sabat vasakini akilea avakuri vaha en kot one veni. Luk 11:37 Ka en avong enek meatin tai koa aven mul reptep mai neim ka mulomal en meten Iesu. Sakini, Iesu viles les tiser keil ten mengkatien keil onen Mosis ka Farasi keil ka vis keil vit, “?Mengkatien orer maen ir rovasak revi meatin tai ran mesaien onen en Sabat, vuo romaentei?” Luk 6:9 Ka keil aro raeng enges. Arviten etai tounah. Sakini Iesu rokol meatin enek ka mumon aven mai tahos eris. Evus, Iesu sila lati va.
Evus, Iesu viteni min keil vit, “?Munak tai en kami, titan tai vuo buluk osen mot vita en avul tai en Sabat, kei houmon sa? Hatte hetas hekulati. ?Mukave? ?Koanek anatin?” Mat 12:11; Luk 13:15 Ka keil asakras avahit kes selusien onen. Mat 22:46; 23:6
Iesu vihisei keke Ahi hehati lat meatin koa ling rendemien onen vita netan
En anien enek, Iesu lei kilea keke meatin keil ekonek amul alei kan more out tatondanien keil vahi one. Sakini, viten tatavolien enek min keil vit, “Navong meatin tai sisil enuk kovaha en anien ten tetaliheien tai, konakalahtei konakur more out tatondanien koa onen hetetamen keil. Veni hertahostei enuk munak asisil en meatin tai koa vi hetetamen imok mulinuk. Pro 25:6-7 Veni navong hemai, meatin koa sisil en kamil hemai hehiteni minuk hehit, ‘Kimea ka kimaen hetamen koanek hekur vulum.’ Hemukonek, kimemou kimea ka kiha kitondan en out koa tisa. 10 Ka munak asisil enuk, kiha kitondan en out tatondanien koa rotahos ramattei. Hemukonek, meatin koa sisil enuk hemai venuk ka hehit, ‘Tuak, amai nesa ka kitondan en more out tatondanien ekok.’ Hesakini, meatin ten eim enek hehouhou minuk en meten meatin vasi keil. 11 Veni koakeil avati lat sase en keil, keil iha netan. Ka koakeil aling rendemien one vita netan, Ahi hehati lat keil ihina nesa.” Mat 23:12; Luk 18:14
12 Iesu viteni mun min meatin koa sisil eni vit, “Munak komumon mari anien tai, konasisil entei tumali keil, vuo meteimal onom, vuo koakeil koa tounah one houlu koa aro vesesal venuk. Veni keil akilea avasisil enuk eris, ka kikur ris asa komumoni min keil. 13 Vuo. Navong komumon mari anien tai, hetahos imok kisisil en koakeil avi livere, koakeil asakras avakaka, koakeil usiave mat, ka koakeil emun mete var. 14 Veni keil asakras avasa kes asa koa keik komumoni min keil. Hemukonek, Ahi hetokol katuk ka hesa kes uite teni en avong meatin keil koa amal en meten imoul eris ran matien.” Sion 5:29
Iesu viten tatavolien tai usil mukave meatin houlu koa Ahi sisil en keil irvatei en mari anien koa houmoni Mat 22:1-10
15 Navong Farasi tai koa mul en mari anien enek long selusien keil onen Iesu, kei viteni vit, “!Hetahos varei min ir vasi koa reheanian vituai en avong koa Ahi hesakin hiasuvien onen hel en out netan!” Luk 13:29
16 Navong Iesu long hasien onen Farasi enek, kei viten tatavolien koanik mini vit, “En avong tai, hetamen tai en vati voumon mari anien tai. Sakini, kei sisil en meatin keil houlu. 17 Ka mal en avong ten anien enek, kei sila slev tai onen keke vaha vahiteni min koakeil sisil en keil vit, ‘Almai, veni tounah keil ten anien enek mesei tuai.’
18 “Ka keil vasi aseseini avaha veni amul amundemi keke tounah savsav keil one hetetamen imok muli anien onen. Tai en keil vit, ‘Navul atan tai ka niha mau nisao eni. Sakini, nasakras eli mamai.’
19 “Tamun vit, ‘Navul buluk halualim (10) keitinek keke avaleh aean vatei atan osak, ka ek vati maha masak vis keil. Sakini, nasakras eli mamai.’
20 “Tamun eris vit, ‘Inau naretalihe keitinek, sakini nasakras mamai.’ 1Kor 7:33
21 “Sakini, slev enek va ris vit mesein selusien keil one min asuv onen. Ka hetamen enek tin tisa houlu, ka viteni min slev onen vit, ‘!Kiha lah! Kiha en sise keil ten taon koanik, ka kikur koakeil avi livere, koakeil asakras avoual, koakeil mete var, ka koakeil emun usiave rotahostei.’
22 “Rovitei tuetin, slev mai ris veni ka viteni vit, ‘Asuv, namumon tounah vasi tuai koviteni, ka out vinvin veah ven meatin tei ris emau.’
23 “Sakini hetamen enek viteni mini vit, ‘Kiha en out vasi ka kusil sise vasi keil ka kihise meatin keil avamai, vasakin teim onak vahil revi en meatin keil. 24 !Ka naviteni minuk, koakeil nasisil en keil mulamu, hetovuol en keil hean vis anien koanik!’ ” Navong Iesu kanian evus, kur ris sise onen va.
Iesu vihisei keke meatin koa en vati vousil kati, helamu, hendem revi
25 En avong tai, vangi meatin keil amul amusil Iesu, ka kei viles ka viteni min keil vit, 26 “Munak meatin tai en vati vousil kat inau, kei en hehat nau imok helin tata onen, mama onen, ahin onen, titan keil, tunali keil ka ahinali keil, ka moulien onen emun. Munak hermukteinek, kei sakras vamai vahi meatin onak. Dut 33:9; Mat 10:37-38; 16:24; Mak 8:34; Luk 9:23; 18:29; Sion 12:25 27 Koakeil e rovattei avakur mahien vuo avamaen mesav keil avati kat keil en aiveave venau, keil asakras avamai avahi meatin keil onak. Mat 10:38; 16:24; Mak 8:34; Luk 9:23
28 “Munak tai en kami en vati voumon mari eim tai, kei hetondan emau ka hendem usil mani teni hetokol mani koa hemukave. Hevus, kei helesi munak mani onen vinvin vuo rovinvintei voum vasin eim enek. 29 Munak hermukteinek, kei houmon hatte enges teni ka hermum vasitei. Sakini meatin vasi koa ilesi, iselus rohtoh eni ihit, 30 ‘Kei mum rohtoh en eim onen, ka sakras voum vasi.’
31 “Vuo hesuval asuv houlu tai koa kur meatin keil onen heite taosen halualim (10,000) keke avavae vatal min asuv houlu sav tai koa mul mai ral min meatin keil onen heite taosen hanumau tai (20,000). Kei hetondan emau ka hendem revi munak kei kur keihoen vinvin vavae vaha kat asuv houlu enek. 32 Munak lei kilea keke rokurtei keihoen vavinvin, kei hesila lat tei en meatin keil onen iha iles asuv houlu enek navong mul veah soutin keke avaselus vis etai sise ten tomat. 33 En sakien enek, kami vasi mihendem revi. Munak misakras mivalokovein tounah vasi onami keke mivousil kat inau, misakras mivamai mivahi tai en meatin keil onak.”
Iesu viten tatavolien tai usil mukave meatin koa musili ka, evus, lokoveini suval sol koa kasien teni vuol rani Mat 5:13; Mak 9:50
34 Ka Iesu sel kat vangi meatin keil vit, “Kami misuval sol. Sol tahos. ?Ka munak kasien teni vuol rani, akilea avaling risi vamukave? 35 Sol enek rotahostei ven etai tounah, tahos imok keke avasoni vaha. !Munak ralingomi mul, mihetaengon revi!” Mat 11:15; 13:9; 13:43; Mak 4:9,23; Luk 8:8

14:1: Luk 11:37

14:3: Luk 6:9

14:5: Mat 12:11; Luk 13:15

14:6: Mat 22:46; 23:6

14:8: Pro 25:6-7

14:11: Mat 23:12; Luk 18:14

14:14: Sion 5:29

14:14: Mat 22:1-10

14:15: Luk 13:29

14:20: 1Kor 7:33

14:26: Dut 33:9; Mat 10:37-38; 16:24; Mak 8:34; Luk 9:23; 18:29; Sion 12:25

14:27: Mat 10:38; 16:24; Mak 8:34; Luk 9:23

14:33: Mat 5:13; Mak 9:50

14:35: Mat 11:15; 13:9; 13:43; Mak 4:9,23; Luk 8:8