2
Iesu viles oai mai vi uaen en tetaliheien tai
1 Avong elu muli va. Ka en avong etel (3) eni, meatin keil en meteimal ten out Kena amul amumon anien ten tetaliheien tai. Mama onen Iesu mul ral min keil. 2 Ka asisil en Iesu ka meatin keil onen emun keke avamai avaanian vatal min keil en tetaliheien enek. 3 Navong amul akanian, mama onen Iesu long kilea keke uaen tovuol emun avasani min meatin keil. Sakini, va ven Iesu ka viteni mini vit, “Uaen tovuol emun. ?Kokilea kovakataun keil eli?”
4 Ka Iesu vit kesi mini vit, “Mama, usite oralu tovuol ien. Avong kati keke mahothot enau min meatin keil keke navi isei romaitei veah.”✡ Sion 7:30; 8:20
5 Ka mama onen va viteni min meatin keil toumien vit, “Kami mihoumon asa koa kei hehiteni min kami.”✡ Sen 41:55
6 En usite tai, Iesu les mari veioai ahetai (6) koa Siu keil asieni en oai keke akilea avakas motein tounah keil one vato vousil mengkatien keil one. Tetai en keil vinvin avasieni en lita handred tai (100).✡ Mak 7:3-4; Sion 3:25 7 Navong lesi, Iesu viteni min meatin keil toumien vit, “Alsien mari veioai keil ekek en oai.” Ka asieni vil rokol onge nesa. 8 Amumoni evus, Iesu viteni min keil vit, “Miheseh oai enek en kap tai, ka mihesani min avat ten mari anien enek keke hemun visi.” Sakini, amumoni suval koa kei viteni.
9 Ka navong avat mun vis oai enek, muni vi uaen ka reingeingeni keke ka kave. Ka meatin keil toumien koa aseh oai enek akilea. Sakini, avat enek vise meatin koa retalihe 10 ka selus tahos mini vit, “Meatin sav keil koa amumon mari anien keil, mulamu, amul asani min meatin keil uaen koa tahos koa mani teni keih. Ka navong meatin keil amunmun houlu ka armun kileatei mun kasien teni, asan uaen koa rotahos ramattei min keil. Ka keik, kovuli kat uaen koa tahos imok keke kokilea suk kovasani min komai vakatau.”
11 Sakini, en taon ten out Kena, Iesu mum rohtoh en merikel tai onen. En out enek, kei vothot en hetetamenien onen ka meatin keil onen aling demkatien one eni.✡ Sion 4:54; 20:30; Luk 9:32; Sion 1:14; 12:41
12 Tetaliheien evus, Iesu, mama onen, tunali keil, ka meatin keil onen uva en taon ten out Kapaniam. Ka aro ekonek avong vahis.✡ Mat 4:13
Iesu likat rasilin meatin tisa keil ran Eim Votut✡ Mat 21:12-13; Mak 11:15-17; Luk 19:45-46
13 Avong ten Anien ten Mul Laui mai vesesal koa Siu keil houlu uva en out Serusalem keke avoumon sanien votut keil teni. Sakini, Iesu ka meatin keil onen emun uva.✡ Sion 6:4; 11:55 14 Ka navong Iesu va en teahu ten Eim Votut, votini keke meatin keil houlu amul asalem en buluk, sipsip, ka aman keil avahi sanien votut keil. Ka meatin sav keil houlu amul arondan en avet one ka amul akekes en mani onen meatin keil. 15 Navong Iesu les tounah koa meatin keil amul amumoni, tin vepeng. Sakini, kur mavuli rop keil koa mul netan, vili keil out tas mai tetaveah ka keih, ka likat rasilin buluk ka sipsip keil vasi ran teahu ten Eim Votut ral mini. Evus, Iesu va ven meatin keil koa amul akekes en mani ten kantri sav keil mai vi mani onen Siu keil, viles avet keil one, ka rang lin mani koa mul ien va netan. 16 Ka en koakeil asalem en aman keil, vul kat keil vit, “!Allah tounah keil onami ka alva! !Minoumontei mun teim onen Tata onak namai nahi out tahulhulien tai!”✡ Luk 2:49
17 Navong meatin keil onen ales asa koa Iesu mul mumoni, amundem kat asa koa Tus Votut viteni koa vit, “O Ahi, veni navouhou houlu en Eim onom, tinok vepeng va kat koakeil arvouhou revitei mini.” Sam keil 69:9
18 Ka navong hetetamen keil onen Siu keil ales asa koa Iesu mumoni, amutimanin ka aselus keih mini avit, “?Isei maenuk kovoumon sakien keil ekek? Munak vi anatin keke kokur keihoen vinvin keke kovoumoni, kumon etai merikel mevalesi.”
19 Iesu vit kesi min keil vit, “Munak mihou rasilin Eim Votut ekek, inau num kesi en avong etel (3).”✡ Mat 26:61; 27:40; Mak 14:58; 15:29; Umen 6:14
20 Hetetamen keil amutimanin avit, “!Ekovei! Meatin keil amum sua hanumau elu ka ahetai emun (46) keke avoumon Eim Votut enek. Ka kovit keik kokilea kovoum kesi en avong etel enges. !Vuo, kosakras!”
21 Ka navong Iesu vit usil Eim Votut, mul selus usil aven.✡ 1Kor 6:19 22 Katau suk, navong moul eris ran matien, meatin keil onen amundem kilea selusien onen enek. Sakini, akur anatin en selusien onen Iesu ka asa koa Tus Votut viteni usili.✡ Luk 24:6-8; Sion 12:16; 14:26
Iesu rie lati keke kilea en rendemien onen meatin keil
23 Navong Iesu mul veah en out Serusalem en avong ten Anien ten Mul Laui enek, meatin houlu ales merikel koa mumoni ka aling demkatien one eni.✡ Sion 7:31; 11:47-48 24 Ka Iesu rokurtei anatin keke demkatien one eni vi anatin veni mundem kilea asa koa mul en rendemien onen meatin vasi keil. 25 Meatin tovuol vahit kilea mini, veni kei mundem kilea tuai tounah vasi koa meatin keil amul amundem usili ka asa koa keil e vati.