40
Iahova san selusien ten enmahisien min meatin keil onen
Aesea 40:1-5,10-11,18-31
1 Ahi viteni min Aesea vit,
“Kiha ven meatin keil onak,
ka kihati lat rendemien keil one.
2 Kiha kiselus min meatin keil onak ten out Serusalem hetal min envatien,
ka kihitehiteni min keil keke sua keil one ten mahien vus tuai.
Anatin, kihiteni min keil keke mahien koa nasani min keil vinvin tuai ven tisaen keil one.”
3 Evus, keil itaengon rea tai hehiso hekeih hehit,
“En out volvol, mihesak revi sise onen Iahova.✡ Mat 3:3; Mak 1:3; Luk 3:4-6; Sion 1:23
Anatin, en out mes, mihoum motein sise onen Ahi orer.
4 Mihetahin revi poal vasi keil,
ka vatihou keil vasi, miheil lati hehi aet.
Out keil koa vurvuru, mihoumoni hehi aet revi,
ka mihetahin vasi vulvul keil.
5 Hevus, Iahova hetie lat muohien ten keihoen onen
ka meatin keil vasi ilesi en avong hetas.
Tounah vasi keil enek hekistal hehi anatin
veni Iahova varei vat kati.”
10 ?Milesi? Iahova ten Keihoen varei mul mai suval meatin tavaeen tai koa mulin vativieh keil onen tuai.
Kei losil kat out vasi ral min mari keihoen onen.
Mul mai ral min ui umen onen ten vaeen koa vi tounah keil koa lah lati ran vativieh keil onen.
Anatin, kei mai ris ral min meatin keil onen koa kulat keil ran hen vativieh keil onen.✡ Aes 62:11; Rev 22:12
11 Kei hetounat revi en meatin keil onen✡ Esek 34:15; Sion 10:11
hesuval meatin ten sipsip mul rounat en sipsip keil osen.
Anatin, Iahova houmoni min meatin keil onen,
hesuval meatin koa mul vous titi sipsip keil osen ka kav kat revi mul en veimasen.
Anatin, Ahi hesuval meatin tai koa ring meraun sipsip keil osen koa titae keil mul.
18 ?Kami mimundemi keke Ahi suval asa?✡ Umen 17:29
?Asa varei suvali?
19 ?Mukave? ?Kei suval nana koa meatin enges musahi,
ka amosan eni en tounah tetahos keil suval gol ka silva? !Vuo!
20 Ka munak mani ten vati ahi koanek keih ramat,
meatin kilea valei kat ai tai koa keih koa sakras vamande.
Hevus, kei helei kat meatin koa vi meteisau
vasah etai nana koa kilea vahatimal revi ka sakras vamot.
?Iahova suval vati ahi koanek? !Vuo!
21 ?Kami mireingeingeni?
?Mirlongtei asa koa kistal en avong mulamu?
?Mirlongtei veah isei mumon out netan?
Iahova varei mumoni.
22 Kei mul rondan en vulin ten keihoen
nesa mok mulin out netan.
Mul les meatin keil ten out netan avi heisavos suval titin keil.
Ahi mumon out netan ka leh teilang kav koe.
Anatin, leh teilang suval tavolin keke meatin keil avato ien.
23 Ral min keihoen onen, Ahi kilea vou tan en avat keil koa amundemi keil akur keihoen
ka hesakin keil imai ihi heisav enges.
24 Avat keil enek asuval titi holeai keil koa avi heite hau,
koa ason rohtoh en lite ka amoul havivis.
Evus, Iahova mai ven keil suval eang sisil tai,
ka sakin keil amaleles ka amukou,
muh lat keil, ka avupuol.
25 Ahi koa vi votut imok visi vit, “?Inau nasuval asa?
?Isei komal milvinvin?”
26 Mihelele hehina nesa en teilang.
?Isei mumon hitu keil vasi koa milesi?
Hitu keil enek asuval meatin keil tavaeen
koa Iahova mul mulamun keil amemea ka vise retai en keil en eis kati one.
Veni keihoen onen marite,
tovuol en keil vavuol.
27 ?Kami, me-Isrel keil, vensa miselus kutut kat Iahova
ka mivit kei reingeingen sakvisien keil onami?
?Vensa mimundemi mivit Ahi en rovattei vailea
keke kami milong mahien en hen meatin sav keil?
28 ?Mukave? ?Mireingeingeni veah,
vuo mirlong usiltei veah?
Iahova vi Ahi koa mul lises ka lisenges,
ka kei varei mumon out netan.
Aven sakras vamemerau
ka meatin tovuol vailea vasin rendemien keil onen veni mariso ramat.
29 Kei varei mul san keihoen
min koakeil ave memerau ka arkeihtei.
30 Litetai hau keil ka atouli hau keil,
avong tei, ave hememerau ka isavoi navong keihoen one mul vus.
31 Ka min koakeil aling desien one en Iahova ven kataunien,
kei hesan ris keihoen min keil.
Tounah vasi keil koa amumoni ral min keihoen koa hesani min keil hemaes
hesuval veivakum koa mul muka maes en teilang nesa.
Anatin, meatin keil enek ual heha vio … ka ave hermemerautei.
Keil akilea iloh heha vio … ave hermahtei.