12
Reheleisungein sakien keil onen Iesu Kristo
Meatin keil ekek arie lati keke demkatien one en Ahi keih. Ka suval koa keil amul rahit ir ka amul amakul en sien navong ales ir romuloh en lohlohien ten demkatien. Sakini, en vati sakien koa meatin ten lohlohien mul lokovein tounah vasi koa meas kati, mal keke ir rehelokovein demkoen vasi keil koa meas kat ir ka tisaen koa mul par kat ir. Hevus, reheloh hekeih en lohlohien koa Ahi ling ir eni hetal min rendemien keke rehetokol keite teni. 1Kor 9:24 Reheling meter en Iesu koa mulamun ir en sise ten demkatien, ka koa sakini mai mal vinvin vasi en meten Ahi. Ka veni kei lei kilea sien koa hekuri hekatau, kei kur rendemien koa tetaveah ka maeni vaha vamat en aiveave. Kei romemoutei keke vakur vati matien koa vamukonek koa onen meatin tisa keil. Sakini, navong mat, Ahi vati lati ka maeni rondan en out ten mari houhouen en usite matu ten vulin ten keihoen onen. Sam 110:1; Mat 22:44; Mak 16:19; Umen 2:34; Efes 1:20; Hib 1:3; 8:1; 10:12
Iesu kur sakvisien houlu en hen koakeil amumon tisaen, ka kuri ral min rendemien koa tetaveah. Sakini, navong kami milonge tisa, mihendem usil kei keke rendemien onami namottei ka minalokoveintei demkatien koa mikuri. Navong mimul milehkao ral min tisaen, mihendem kati keke rami romuetei veah ka mirmattei veni. Ka emi navobongentei selusien ten selkatien koa selus min kami suval mivi titan Ahi keil koa vit,
“Titak, kitaengon revi navong Iahova mul ralimal enuk.
Ka rendemien onom namottei navong mul san mahien minuk.
Veni Iahova mul ralimal en koakeil vasi envatien onen mul en keil,
ka mul san mahien min koakeil kulat keil avi titan keil kati.” Proveb 3:11-12 Rev 3:19
Navong mimul mivisu en sakvisien keil, mihekuri hetal min rendemien koa tetaveah hesuval koa Ahi mul ralimal en kami. Ka minalongetei natisa, veni Ahi mul mumoni min kami suval koa mivi titan keil kati. Veni titiali tovuol koa tata onen varralimal entei. Dut 8:5; 2Saml 7:14 Ka munak Ahi roralimal entei kami suval koa mumoni en titiali vasi keil onen, mul rie lati keke mumoni min kami suval mivi titiali keil ten sise enges ka mirvitei titan kati keil. Navong tata orer keil ten out netan aralimal en ir, rovouhou min keil. Mukonek, mal imok keke reheling rendemien orer heha netan keke rehousil rendemien onen Tata orer koa ro en out nesa keke rehekur moulien ten lisenges. Nam 16:22; 27:16 10 Veni tata orer keil ten out netan aralimal en ir ten avong havivi enges musil asa koa mal en rendemien one. Ka Ahi, kei mul ralimal en ir vakataun ir keke voumon ir rovahi votut vasuval koa kei vi votut. 11 Navong aralimal en ir ven tounah, rorsitei ir veni. Anatin, mul sakin ir rolonge tisa. Ka katau eni, navong avisein ir en asa koa mal, rokilea rovales heite teni koa mul kikistal en moulien orer koa vi tomat ka maluen. Tiem 3:17-18
12 Sakini, mihesakin hemi hekeih houm ka alomi hekeih helomal. Aesea 35:3 13 Ka “mihelei kati keke ualien onami hemal,” Proveb 4:26 keke koakeil amusil kami koa amemerau vuo asakras avoual revi en demkatien one, keil anasavoitei ka anamot. Vuo, keil imai ikeih tamun.
Selkatien keke ronaseseintei more envatien koa Ahi mul rie lati min ir
14 Mihesak visi mivato en tomat vatal min meatin vasi keil, ka mihesak visi keke moulien onami hehi votut. Veni koakeil arvitei votut asakras avales Ahi Asuv. Sam 34:14; Rom 12:18 15 Mihelei kati keke minahilestei tinomi ran Ahi koa kur revi kami ven more envatien onen. Veni rotahostei keke koakeil amumoni mukonek, rendemien tatisa onen napuruntei meatin sav houlu nasuval ahing koa mul purun suain vatiai sav keil. Dut 29:17 16 Mihelekati keke tovuol en kami namatil vituai natal min hanu sav ka nandem maentei tounah keil onen Ahi nasuval koa Esao mumoni. Veni kei salem en vulin moeite en pelet ten anien tanges. Sen 25:29-34 17 Ka kami mikilea eni keke, katau suk, Esao en vati vakur tokolkatien ten moeite, ka sakras. Kei lesi keke, avaseini mis roha veni, ahho tovuol emun keke vahiles asa koa kei mumoni tuai. Sen 27:30-40
18 Kami mirmaitei en Vatihou Senae vasuval me-Isrel keil telamu amumoni.* Koanik mul selus usil asa koa kistal en me-Isrel keil en Eks 19 ka Dut 5. Mirvatei en out tai koa mikilea mivalesi ka mivatokoli. Mirlestei mari ahang koa mul mukan, mahmah koa malikelik koa mul rupan, ka eang tai koa muhuh keih. Eks 19:16-22; 20:18-21; Dut 4:11-12; 5:22-27; Eks 19:12-13; Dut 9:19 19 Kami mirlongtei amaru koa musel keih, ka mirlongtei ren Ahi koa selus keih ramat koa mul sakin koakeil alonge ametau ka apeah keke Ahi herselustei mun hemal en keil. 20 Veni me-Isrel keil ametau houlu mok navong along mengkatien koa vit, “Munak tounah tai mai rokol vatihou koanek, miheov vini, avaseini vi meatin vuo tirendan tai.” Eksodas 19:12-13 21 Anatin, Mosis emun lesi ka metau vit, “Namul namaleilei en metauen.” Duteronomi 9:19
22 Ka kami mirmaitei en vatihou ten metauen koa mukonek. Kami mimai ven Hou Saeon en out nesa, taon ten out Serusalem nesa koa onen Ahi koa moul lisenges. Mimai ven angelo keil onen koa avi houlu vis avi houlu mok koa amul alah ruai keke avahati lat isen ral min sien. Kal 4:26; Rev 21:2; 5:11 23 Mimai keke mivalah ruai vatal min titiali sav keil onen Ahi koa akur tokolkatien houlu suval avi moeite keil, koakeil amutis kat ise en tus onen Ahi en out nesa. Kami mimai ven Ahi, koa mul lei rahit usite onen meatin vasi keil. Ka mimai en out koa ninin onen koakeil amal vinvin vasi en meten Ahi amul ien. Luk 10:20; Sen 18:25; Sam 50:6 24 Ka mimai ven Iesu koa mum en usite onen meatin keil en meten Ahi musil hatkatien takeih hau onen. Sen 12:2-4; Hib 7:22; 8:6; 9:15; 1Pit 1:2 Ran Iesu mul vis Ahi keke helele hetahos en ir. Sakini, ran Iesu tahos imok mulin ran Ebel, koa vis Ahi vasan sesendaen tai. Sen 4:10
25 Sakini, mihelekati keke minalong seseintei kei koa mul selus min kami. Mihendem kati keke me-Isrel keil koa along sesein selkatien onen Ahi en out netan, keil arlohosaitei ran vurohien onen. ?Veni koanek anatin, kami koa mimul misesein ren Ahi koa mul selus min kami ka en out nesa mihelohosai rani hemukave? !Misakras varei! Hib 2:1-3; 10:28-29 26 En avong koa Ahi selus ka en Vatihou Senae, ren kulul en out netan. Eks 19:18; Sats 5:4; Sam 68:8 Ka kosa, kei vat kati tuai vit, “Nulul en out vasi avong tamun, ka hervitei out netan enges, nulul en out nesa emun.” Haggai 2:6 27 Selusien koa vit, “avong tamun” mul vit kilea keke tounah vasi koa Ahi mumoni, kei houlul eni ka heling seh eni keke hetovuol emun. Hesakini, tounah keil enges koa asakras avoulul eni iles.
28 Ahi mul sani min ir hiasuvien tai koa sakras voulul. Sakini, mal vinvin rehemasmasi hehi houlu mok ka reheha netan mini en houhouen ka metauen. 29 Veni Ahi orer kur keihoen koa suval mari ahang tai koa kilea van lin tounah vasi. Dut 4:24; 9:3; Aes 33:14

12:1: 1Kor 9:24

12:2: Sam 110:1; Mat 22:44; Mak 16:19; Umen 2:34; Efes 1:20; Hib 1:3; 8:1; 10:12

12:6: Rev 3:19

12:7: Dut 8:5; 2Saml 7:14

12:9: Nam 16:22; 27:16

12:11: Tiem 3:17-18

12:14: Sam 34:14; Rom 12:18

12:15: Dut 29:17

12:16: Sen 25:29-34

12:17: Sen 27:30-40

*12:18: Koanik mul selus usil asa koa kistal en me-Isrel keil en Eks 19 ka Dut 5.

12:18: Eks 19:16-22; 20:18-21; Dut 4:11-12; 5:22-27; Eks 19:12-13; Dut 9:19

12:22: Kal 4:26; Rev 21:2; 5:11

12:23: Luk 10:20; Sen 18:25; Sam 50:6

12:24: Sen 12:2-4; Hib 7:22; 8:6; 9:15; 1Pit 1:2

12:24: Sen 4:10

12:25: Hib 2:1-3; 10:28-29

12:26: Eks 19:18; Sats 5:4; Sam 68:8

12:29: Dut 4:24; 9:3; Aes 33:14