10
Sanien tas koa Iesu Kristo sani en usite onen meatin keil vinvin ten avong vasi
Mengkatien keil telamu koa Mosis sani min me-Isrel keil avi niniven enges. Anatin, avi niniven ten tounah koa vi anatin ka tahos imok koa mul en out nesa koa hemai. Mukonek, vati sanien votut keil koa asani en sua vasi sakras vasakin koakeil umai ven Ahi avamai avamal avavinvin vasi en meten. Veni, vahit koakeil uva netan min Ahi avato ran tisaen keil one anatin, keil avarlongtei mun vatisa ven tisaen ka avarsantei mun sanien votut keil vaha mini. Ka sanien votut keil koa asani en sua vasi mul mumon meatin keil amundem kati keke tisaen one mul veah. Veni ran buluk ka nani keil sakras valah lat vasin tisaen keil ran meatin keil. Lev 16:15,21; Hib 9:13 Sakini, navong Kristo mul mai en out netan, kei viteni min Ahi vit,
“Sanien keil ka tounah koa amuniti va minuk em rovattei.
Ka kosak mesein aven venau.
Koseseini varei navong amunit vuseri en out ten sanien votut,
vuo uas buluk ka sipsip keil vasakin methos onom val en keil.
Ka inau naviteni minuk navit, ‘Inau ke.
O Ahi, numai keke num housil rendemien onom,
hesuval koa amutisi mul en Tus Votut usil inau.’ ” Sam keil 40:6-8
En selusien ekek, Kristo viteni vit, “Sanien keil ka tounah koa amuniti va minuk em rovattei. Koseseini varei navong amunit vuseri en out ten sanien votut, vuo uas buluk vuo sipsip keil vasakin methos onom val en keil.” Tounah keil enek avi asa koa amul asani musil mengkatien telamu. Sam 40:6 Evus, Kristo viteni mun vit, “Inau ke. O Ahi, numai keke num housil rendemien onom.” Sakini, navong Iesu san kei suval koa viteni katau, suval koa kei ling seh en sanien votut keil telamu, ka san moulien onen vahi sanien votut ten lisenges keke vakur vulie. Sam 40:7 10 Anatin, veni Iesu Kristo mum musil rendemien onen Ahi, navong san sasen ten aven mini, sanien onen sakin ir romai romuto ran tisaen keil. Sanien tas onen en usite onen meatin vasi keil vinvin ten avong vasi. Hib 9:12,28
11 En usite ten umen one, pris keil vasi amumon umen one en avong vasi. Ka asan vati sanien keil lises en avong vasis koa asakras avalah lat tisaen keil. Eks 29:38 12 Ka en usite onen Kristo, kei san sanien votut tas onen koa vinvin vahul lat meatin vasi keil ran tisaen keil one ten avong vasi. Ka navong sani evus, “kei rondan en usite matu onen Ahi.” Sam keil 110:1 Mat 22:44; Mak 16:19; Umen 2:34; Efes 1:20; Hib 1:3; 8:1; 12:2 13 Ka kei mul veah ekonek “hetokol avong koa Ahi heling vativieh keil onen en hen.” Sam keil 110:1 14 Veni, ral min sanien tas, kei mumon koakeil amuto ran tisaen keil one umai amal avinvin vasi en meten Ahi ten lisenges.
15 Ka Ninin Votut emun san selusien koa rie lati keke koanek anatin. Mulamu viteni vit,
16  “Hatkatien takeih hau koa numoni hetal min meatin keil onak en avong enek hemukok:
Inau, Iahova, niling mengkatien onak keil il en tine,
ka nitis kati hel en rendemien one.” Seremaea 31:33 Hib 8:10
17 Ka evus viteni vit,
“Anatin, nirleletei mun hetisa en keil ven tounah keil koa amumoni romaltei,
ka nirmundemtei mun tisaen keil one koa va kat keil.” Seremaea 31:34 Hib 8:12
18 Sakini, navong methos onen Ahi mul tuai en meatin keil, irsantei mun sanien votut keil vasakini varleletei mun vatisa en keil ven tisaen keil one.
Ven sanien koa Iesu sani, rokilea rovamai vesesal ven Ahi
19 Sakini, tuak ka ahinkuli keil, veni ran Iesu mumon sise ven ir, rehermetautei keke rovaha vesesal ven Ahi en out koa vi votut vis vi votut imok. Hib 4:16 20 Veni navong aven metetal ka mat, kaliko koa ring koe meatin keil arvatei vesesal ven Ahi sipasi usite elu ka sehen sise maluv ven ir. 21 Ka kosa, Iesu mai vi asuv houlu onen pris keil en eim onen Ahi koa vi hetetamen imok ka mul mulomal en usite orer. 22 Sakini, rehemai vesesal ven Ahi hetal min tina koa muto ka demkatien koa vi anatin. Navong romai vesesal veni, reheilea keke suval Kristo kukuvin ran en ir ka sakin tiner neim muto ran rendemien keil tatisa, ka kei kas motein aver hae ral min oai koa mutolas. Esek 36:25; Efes 5:26 23 Sakini, rendemien orer nalanglangotei, ka rehuli kat demkatien orer hekeih koa roviteni rovit romul roling desien orer mul ien. Rehoumoni hemukonek veni rokilea rovandesin Ahi koa mul mum vasin hatkatien keil onen. Hib 4:14 24 Ka tahos rehendem usili mukave rokilea rovakekataun ir keke er hehathat ir ka rehoumon sakien keil koa hetahos. 25 Ronalokoveintei sakien ten lahruaien, suval koa tei keil amul amumoni. Ka rehesel kat ir hehi houlu mok, veni romul rolesi keke avong ten amairisien onen Asuv mul mai vesesal.
26 Anatin, rehelekati, veni munak rokilea en anatinien usil Iesu Kristo tuai, ka romules romumon tisaen, sanien tovuol emun vasakin ir rovato ris ran tisaen keil orer. Hib 6:4-8 27 Sakini, mal keke koakeil amules amumon tisaen keil il imetau hehi houlu navong arosin avong koa Ahi helei rahit usite one ka hesan mahien min keil hehit iha en Ahang koa sakras vavus koa hean lin vativieh keil onen. Aes 26:11 28 Vi anatin keke navong meatin tai rali koteh mengkatien keil onen Mosis ka “meatin elu vuo etel avit leini vi anatin,” Duteronomi 17:6 Dut 19:15 arrie lattei mun enmahisien mini, asan matien mini. 29 Veni koanek vi anatin, mihendem usil asa koa hekistal en meatin koa kilea anatinien usil Kristo, ka mules mumon tisaen. Meatin enek rie lati keke mul lei sesein Natin Ahi. Kei mul kur heisav en ran Iesu koa sakin hatkatien takeih hau onen Ahi mai vi anatin, ka koa sakin kei mai mutolas en meten Ahi. Ka kei mul selus tisa va kat Ninin Votut koa rie lat more envatien mini. Sakini, anatin keke asa koa hekistal en vati meatin koa mukonek hetisa revi mok. Eks 24:8; Hib 13:20 30 Koanek hehi anatin veni rokilea Ahi koa viteni vit, “Inau Iahova varei naviteni keke nisa kes asa koa amumoni. Anatin, inau nisakin keil ian heite ten sakien tisa one.” Duteronomi 32:35 Rom 12:19 Ka viteni mun vit, “Iahova helei rahit usite onen meatin keil onen.” Duteronomi 32:36 Sam 135:14 31 Sakini, rehelei kati, veni, munak rehehi vati meatin keil koa hemukonek, hetisa vis hetisa mok navong reheha en hen Ahi koa moul.
32 Sakini, mihendem ris sakien keil onami mulamu, navong milei kilea meneai onen Ahi. Mihendem risi mukave milehkao houlu ven sakvisien keil koa mikuri ven demkatien onami, koa mikuri ral min rendemien koa tetaveah. 33 Avong houlu meatin tisa keil aselus tisa kat kami ka apurun kami en meten mesav keil. Ka minametautei keke mivapil vatal min koakeil akur vati sakvisien keil enek. 1Kor 4:9 34 En avong mulamu enek, kami emi mahis koakeil amul en eim takeih. Ka navong kavmen san mahien min kami veni mivi Kristin keil ka amaen meatin keil umai alah vasin tounah onami, mimaen revi min keil ral min sien. Mimaeni veni mikilea keke tounah onami ten demkatien hel lisenges ka tahos vis tahos imok mulin tounah koa akuri. 35 Sakini, kosa, minametautei, veni vi anatin keke uite ten koa mihekuri ven demkatien onami hetahos imok. 36 Mihesakin rendemien onami hetaveah keke mikilea mivoumon asa koa Ahi en vati. Veni hemukonek, mihekur asa koa kei vat kati. Luk 21:19; Hib 6:12 37 Koanek suval Tus Votut viteni koa vit,
“Avong havivi sesuk,
ka kei koa mul mai hemai anatin ka hertountei.
38  Ka kei koa musil Ahi ral min demkatien, kei hemai hemal en meten ka hemoul lisenges.
Ka Ahi rositei ven meatin koa metau ka viles eris.” Habakuk 2:3-4 Aes 26:20; Rom 1:17; Kal 3:11
39 Ka ir rorvitei meatin keil koa rovametau, rovahiles eris, ka rovavuol. !Vuo! Ir rovi koakeil romulomal keih en demkatien orer ka Ahi mul san moulien ten lisenges min ir.

10:4: Lev 16:15,21; Hib 9:13

10:8: Sam 40:6

10:9: Sam 40:7

10:10: Hib 9:12,28

10:11: Eks 29:38

10:12: Mat 22:44; Mak 16:19; Umen 2:34; Efes 1:20; Hib 1:3; 8:1; 12:2

10:16: Hib 8:10

10:17: Hib 8:12

10:19: Hib 4:16

10:22: Esek 36:25; Efes 5:26

10:23: Hib 4:14

10:26: Hib 6:4-8

10:27: Aes 26:11

10:28: Dut 19:15

10:29: Eks 24:8; Hib 13:20

10:30: Rom 12:19

10:30: Sam 135:14

10:33: 1Kor 4:9

10:36: Luk 21:19; Hib 6:12

10:38: Aes 26:20; Rom 1:17; Kal 3:11