4
Ahi vat kati keke meatin keil onen iha ito en out ten sehien
Ka kosa, sehien koa Ahi vat kati keke vasani min meatin keil onen mul veah. Sakini, rehelei kati keke tovuol en kami nalei ras sise onen koa hekuri hetokol out ten sehien enek. Veni ir rolong more longlongien suval keil emun alonge. Ka more longlongien enek rokatauntei keil veni, navong alonge, arkurtei vatal min demkatien. Ka ir koa demkatien orer mul, romul rokur sehien enek suval koa Ahi vat kati vit,
“Navuroh kat keil ka navat kati keke
asakras avaha en out koa nisakin keil avaseh revi eni.” Sam keil 95:11 Hib 3:11; 4:5
Kei viten selusien koanik avaseini keke mum vasi umen onen tuetin tuai navong mum rohtoh en out netan. Rokilea koanek anatin veni en out tai en Tus Votut aviteni avit, “Ka en avong koa oulu (7), Ahi museh ran umen vasi keil onen.” Senesis 2:2 Ka rolesi tuai keke Ahi vit, “Asakras emun avaha en more atan onak koa akilea avaseh revi eni.” Sam keil 95:11 Hib 3:11; 4:1 Koakeil along more longlongien koanik mulamu, keil arkurtei sehien koanek veni along ras ren Ahi. Sakini, sehien enek mul veah keke meatin teisav keil akilea avakuri. Veni koanik anatin, Ahi ling lat avong sav keke meatin keil akilea avamai avakur sehien one. Avong koanik vi kosa. Ahi selus usili sua houlu koa katau eni ka en asuv houlu Deved suval koa rolonge tuai vit,
“Kosa, munak milong ren Ahi,
minalong seseintei.” Sam keil 95:7 Hib 3:7-8
Ka me-Isrel keil arvotintei sehien enek en atan ten out Kenan koa Sosua mulamun keil akuri. ?Veni munak akur sehien one tuai, vensa varei sua houlu katau eni, Ahi vit usil avong sav tai koa keil ikur sehien one esuk eni? Dut 31:7; Sos 22:4 Ka veni koanek anatin, avong tai mul veah koa meatin keil onen Ahi ikur sehien, koa hesuval sehien ten lisenges onen Ahi. 10 Veni, en sakien koa Ahi mum vasi umen onen ka kur sehien ten lisenges, meatin keil onen emun iseh revi ran umen keil one. Sen 2:2; Hib 4:4 11 Sakini, rehesak visi hekeih rovakur sehien enek keke tovuol en ir namot veni long ras selusien onen Ahi suval koa me-Isrel keil telamu amumoni.
12 Sakini rehelong kat selusien onen Ahi, veni keihoen ka moulien mul ien. Selusien onen kan mulin naef koa kan en usite vasi keilu, veni kilea vakirisil en moulien onen meatin tai vaha vio … valin out koa husi mul kapil ral min sin, ka rokol out koa ninin ka rendemien onen mul ien. Anatin, selusien onen Ahi mul kirisil va neim va vio … mul vothot en asa koa mul en tiner ka rendemien keil orer, ka kei mul lei rahiti. 1Pit 1:23; Aes 49:2; Efes 6:17; Rev 19:15; Sion 12:48 13 Tounah tovuol kilea vato suai ran Ahi. Kei kilea en tounah vasi ka hehothot eni hemai en mesai. En avong tai, ir vasi rehelomal en meten ka reheselus mini en usite orer.
Iesu vi asuv houlu onen pris keil ka mulomal en meten Ahi en usite orer
14 Veni tounah vasi enek vi anatin, ka vi anatin emun keke Iesu, Natin Ahi, vi asuv houlu onen pris keil ka va tuai en out nesa keke valomal en meten Ahi en usite orer, rehehuli kati hekeih demkatien koa romul rovit leini rokuri tuai. Hib 3:1; 6:20; 7:26; 8:1; 9:11; 10:23 15 Asuv houlu onen pris keil en usite orer kilea merauen ten aven meatin ka kilea en vamahis ir. Veni kei emun kur sakvisien en sise keil vasi suval ir, ka kei romottei en tisaen. Hib 2:17 16 Ka ven Iesu mul en usite orer, ronametautei keke rovaha ven Ahi koa mul rondan en vulin ten keihoen onen. Sakini, en avong vasi koa er vat kataunien onen Ahi, rehelesi keke hetie lat enmahisien ka more envatien onen min ir. Hib 10:19

4:3: Hib 3:11; 4:5

4:5: Hib 3:11; 4:1

4:7: Hib 3:7-8

4:8: Dut 31:7; Sos 22:4

4:10: Sen 2:2; Hib 4:4

4:12: 1Pit 1:23; Aes 49:2; Efes 6:17; Rev 19:15; Sion 12:48

4:14: Hib 3:1; 6:20; 7:26; 8:1; 9:11; 10:23

4:15: Hib 2:17

4:16: Hib 10:19