2
Rosakras rovalohosai ran vurohien onen Ahi munak romundem maen longlongien onen
Sakini, veni more longlongien usil Natin Ahi vi anatin, rehelei kati keke rehehuli kati ka rehermaentei rendemien orer nasesaitei rani. Mengkatien keil koa angelo keil avit luvati min avu orer keil telamu avi anatin. Ka koakeil armusiltei vuo arlong kattei akur mahien koa mal avakuri. Umen 7:38,53; Kal 3:19 ?Ka munak avu keil orer asakras avalohosai ran mahien enek, hemukave suk en ir munak rehendem maen mari longlongien ekek usil mukave Ahi mul mutut meatin keil? Mahien koa kilea hemai ven ir hemariso mok. More longlongien enek, Asuv Iesu varei vit luvati. Ka evus, koakeil araengoni avitehit leini keke rokilea vi anatin. Hib 10:29; 12:25 Ka Ahi emun rie lati vi anatin ral min marmari merikel ka metai tateisav keil houlu. Rolesi mun vi anatin ka en sanien keil koa Ninin Votut san retai eni min meatin keil musil rendemien onen Ahi. 1Kor 12:4,11
Ahi rie lat Iesu Kristo keke vamai vahi houlu en tounah vasi vaka en sakvisien ka matien onen
Navong navit usil out netan koa Ahi houmoni hemai hehi heite hau, tahos mikilea eni keke kei rorie lattei angelo keil keke avalosil kati. Veni suval koa Tus Votut viteni en out tai vit,
“?O Ahi, meatin vi isei keke komundem usili?
?Vensa varei kolekat natin meatin mukok?
Ten avong havivis, kosakini vi netan en angelo keil.
Ka katau suk, kosan out ten houhouen mini ka koling vatluvoluv ten hiasuvien en vatin.
Keik koling tounah vasi keil koa komumoni
mul en hen keke valosil kati.” Sam keil 8:4-6 1Kor 15:27
Navong vit, Ahi ling tounah vasi keil koa mul en hen keke valosil kati, rokilea keke tounah tovuol koa kei rolosil kattei. Avaseini keke koanek anatin, kosa, rolesi keke rovitei veah tounah vasi koa amul along kati. Ka roles Iesu koa, ten avong havivi, mai vi netan en angelo keil. Ka kosa, rokilea keke kur out ten houhouen ka vatluvoluv ten hiasuvien mul en vatin veni kei kur sakvisien keil ka mat vinat ir. Anatin, ven more envatien onen, Ahi ling kati keke Iesu hemat en usite onen meatin vasi keil. Plp 2:8-9
10 Tounah vasi keil koa amul, amul keke avatie lat keihoen onen Ahi ka avahati lat isen. Ka mal varei keke Ahi maen Iesu vahisu en sakvisien keil vasakini vamal vavinvin vasi keke vamat voutut meatin keil. Ven koanek, Iesu mai vi houlu en titiali sav keil onen Ahi keke valamun keil avakur hetetamenien one. 11 Iesu ral min koakeil enek koa kei kas motein keil ran tisaen one, Tata one tas. Sakini, Iesu romemoutei vahise keil en tunali ka ahinali keil. Mat 25:40; Mak 3:35; Sion 20:17 12 Veni kei viteni min Ahi vit,
“Inau nihitehiten usiluk min tuak ka ahinkuli keil.
Navong melah ruai out tas, nisan masmasien minuk.” Sam keil 22:22
13 Kei viteni mun vit,
“Niling desien onak en Ahi.” Aesea 8:17 2Saml 22:3; Aes 12:2
Ka viteni mun vit, “Inau ke, ral min titiali keil koa Ahi sani minau.” Aesea 8:18
14 Veni titiali keil enek avi meatin keil koa ave ka rae mul, Iesu mun mai suval keil. Ka matien onen vitan en Temat koa vuli kat keihoen ten matien. Sion 12:31; 1Sion 3:8; Rev 12:10 15 Ka en sise enek, Iesu luvat koakeil metauen ten matien par kat keil en avong vasi ten moulien one.
16 Rokilea keke Iesu romitatei vakataun angelo keil. Kei mita “vakataun koakeil aka en vatiamal onen Ebraham.” Aesea 41:8-9 17 Sakini, mal keke mai suval tunali ka ahinali keil en usite vasi keil. Veni, en sise enek, Iesu mai vilelau en enmahisien ven keil ka mai kataun keil suval asuv houlu onen pris keil koa mul mum vasi tounah koa Ahi ling kati keke voumoni. Kei san moulien onen suval sanien votut tai keke vakas motein meten Ahi keke helele hetahos en keil ka hermundemtei mun usil tisaen keil one. Plp 2:7; Hib 2:14; 1Sion 2:2; 4:10 18 Ka veni kei emun kur sakvisien ka mahien keil, kei kilea vakataun koakeil amul akur sakvisien keil. Hib 4:15

2:2: Umen 7:38,53; Kal 3:19

2:3: Hib 10:29; 12:25

2:4: 1Kor 12:4,11

2:8: 1Kor 15:27

2:9: Plp 2:8-9

2:11: Mat 25:40; Mak 3:35; Sion 20:17

2:13: 2Saml 22:3; Aes 12:2

2:14: Sion 12:31; 1Sion 3:8; Rev 12:10

2:17: Plp 2:7; Hib 2:14; 1Sion 2:2; 4:10

2:18: Hib 4:15