4
Koakeil aling demkatien one en Iesu Kristo ikur tokolkatien koa Ahi vat kati min Ebraham ka min ir koa rovi titan keil
Keke mahit kilea min kami, nihiteni hemukok. En teim tai, ehon tai kilea keke, en avong tai koa hel hemai, tounah keil koa amul en hen tata onen imai ihi onen. Ka avaseini mukok, navong vi titiali veah, kei suval slev tai en usite koa rokurtei keihoen en teim onen tata onen. Tounah keil koa amul en hen tata onen, meatin sav keil alosil kati hetokol avong koa tata onen ling kati keke heha en hen natnali. Koanik suval ir etin. Navong rorkurtei veah demkatien, suval koa rovi titiali keil veah, ka romusil sakien ka mengkatien keil ten out netan. Ka mengkatien keil ekek alei kokoe en sakien keil orer suval rovi slev keil teni enges. Kal 3:23; Kol 2:20 Ka, en avong kati koa Ahi ling kati tuai keke hekistal ien, kei sila Natnali mita en out netan ka en ahin tai. Ka avasi vi Siu tai koa mul en hehen mengkatien onen Siu keil. Efes 1:10; Sion 1:14; Rom 1:3 Ahi sila keke vasakin ir koa romul en hehen mengkatien keil rovamaluv rani. Ka sakin ir romaluv keke kilea vakulat ir rovamai rovahi titan keil keke rokilea rovakur tokolkatien keil vasi koa vat kati keke vasani min onen keil. Kal 3:13; Rom 8:15
Ka veni mimai mivi titan Ahi, kei san Ninin onen Natnali emai ro en tinomi. Ka Ninin Votut koa rie lati keke mivi titiali keil onen anatin mul vise Ahi en usite onami vit, “Tata, tata onak eli.” Rom 8:15-16 Sakini, kami mirvitei mun slev keil. Ka mivi titiali keil kati onen Ahi. Ka mihekur tokolkatien vasi keil koa kei vat kati keke titan keil ikuri. Rom 8:17; Kal 3:29
Pol sel kat Kristin keil keke anahilestei ran sise ten demkatien koa amul ien
Navong kami, me-Kalesia keil, mirkileatei veah Ahi, mivi slev keil onen ahi keil koa arvinvintei keke meatin keil avahise keil en ahi ka avaha netan min keil. 2Kron 13:9; Aes 37:19; Ser 2:11; 1Kor 8:4-6 Ka, kosa, mimai mikilea en Ahi anatin. Vuo hetahos imok nihiteni keke Ahi mai kilea en kami. ?Sakini, vensa emi vati mivahiles ka mivousil ris mengkatien keil ten out netan ka sakien heisav keil koa sakras voutut kami? ?Vensa emi vati mivamai mivahi slev keil teni hati tamun? 10 Nalonge keke mimul mivouhou revi min avong votut keil en wik keil, en avati keil, ka en sua keil emun suval etin Siu keil amul amumoni veni mimundemi keke hesakin kami mihemai mihemal en meten Ahi. 11 Nametauni keke tounah vasi keil koa navisein kami eni ka namumoni en kami hemai hehi heisav enges. 12 Sakini, napeah kami, tuak eli keil en demkatien, keke mihemai mihesuval inau koa namaluv ran keihoen ten mengkatien keil. Ka mihendem kati keke navong numai ven kami mulamu, navong mirmusiltei veah mengkatien keil onen Siu keil, inau numai nasuval kami etin. 1Kor 2:3
Navong numai rohtoh ven kami, mimumoni tahos minau. 13 Mihendem kati keke numai en provins ten out Kalesia veni mesaien tai mul purun avek. Ka sakini, nakilea navitehiten more longlongien min kami. 14 Ka avaseini keke mesaien onak mumoni keih min kami keke milei kat inau, mirpuruntei inau ka mirseseintei nau. Kami mikur revi inau suval navi angelo tai onen Ahi, vuo suval navi Iesu Kristo varei. 15 Ka en avong enek kami emi vati mok keke mivakataun inau. Namundem kati keke misak mesei keke mivakulat metomi keke mivasani minau munak sakien enek kilea vakataun inau en mesaien onak. ?Ka envatien koa mirie minau mulamu va kave? 16 ?Mukave, numai mahi vativieh vatal min kami veni naviten anatinien onen Ahi min kami? Amos 5:10
17 Siu keil ekek koa amusil kat mengkatien keil enges, umai asak visi avahou lat kami. Ka armultei avoumoni keke avakataun kami. Vuo. E vati avasakin kami mivahi vativieh en inau koa namusil kat anatinien keke mikilea mivahou lat keil imok en rendemien onami. 18 Sakien koa meatin tai mul vou lat meatin sav vi more sakien tai munak mumoni musil rendemien koa tahos. Koanek anatin en avong vasi ka roviteis navong namul vesesal ven kami. 19 Envatien onak mul en kami suval mivi titiali keil onak. Ka kosa, nalonge mah ven kami hatte tamun suval koa navi mama onami. Veni suval eisiluk mul mah ven kami hetokol avong koa sakien keil onen Kristo hemai hekistal en moulien onami. 20 Ek vati maha mato vatal min kami keke nakilea mahiles selkatien takeih onak vamai vahi selusien tetahos. Ka namul naselus mukok min kami veni namundemko houlu ven sakien keil onami.
Koakeil amusil kat mengkatien avi slev keil teni, ka koakeil amusil kat demkatien amaluv revi
21 Kami koa emi vati keke mivousil mengkatien keil onen Siu keil, hetahos mihelong asa koa aviteni en tus ten mengkatien koa Mosis mutisi. 22 Veni kei mutisi keke Ebraham, natnali elu. Kur tai ka en ahin koa vi slev. Ka kur natnali tamun ka en ahin koa maluv. Sen 16:15; 21:2 23 Natnali koa kuri ka en slev, avasi musil rendemien onen meatin keil enges. Ka natnali koa kuri ka en ahin koa maluv, avasi musil hatkatien onen Ahi. Rom 9:7-9 24 Ahin keilu ekek luvi tatavolien tai usil hatkatien takeih elu koa Ahi mumoni koa luteisav en keilu. Hatkatien takeih koa Ahi mumoni en Vatihou Senae ral min mengkatien keil onen, koanek suval Hakar. Veni koakeil amusil mengkatien keil ekek umai avi slev keil teni suval natin Hakar emun vi slev. Rom 8:15; Kal 5:1 25 Ka kosa, Hakar vi mama onen koakeil aro en out Serusalem. Koanek anatin veni keil amul semau amusil kat mengkatien keil koa Ahi sani min me-Isrel keil navong kei mumon hatkatien takeih ral min keil en Vatihou Senae en kantri ten out Arebia. 26 Ka Serusalem hau mul en out nesa koa maluv ran tounah keil ten out netan ekek. Ka koakeil amusil hatkatien takeih hau iha ito ien. Veni ir koa romaluv ran keihoen ten mengkatien keil ekek ka roling demkatien orer en Kristo, ir rosuval natin Serah koa maluv. Hib 12:22; Rev 3:12; 21:2,10 27 Koanik suval asa provet Aesea mutisi navong vit,
“Kisik, keik koa titam tovuol.
Kisau hetal min sien, keik koa korlongtei veah eisilum val vamah ven etai tivava.
Veni titiali keil onen ahin koa vi lumalum ihi houlu mok
helin titiali keil onen ahin koa meatin kuri.” Aesea 51:1
28 Tuak ka ahinkuli keil, ka en sise ten demkatien, kami mimai mivi titiali keil ten hatkatien koa Ahi vat kati min Ebraham suval Aesak. Rom 9:7; Kal 3:29 29 Ka Siu keil koa avi slev ten mengkatien keil asuval Ismael koa avasi ka en rendemien onen meatin keil enges. Veni Ismael sak visi vapurun Aesak koa avasi ka en rendemien onen Ninin onen Ahi, suval etin sakien koa Siu keil amul asak purun kami eni kosa. Sen 21:9 30 ?Ka Tus Votut viten sa usili? Mul viteni vit, “!Sila lat slev enek keilu natnali luvaha! Veni natin slev enek herkur etai tounah onen tata onen. Ka tounah keil vasi koa mul en hen hehi onen natin ahin enges koa maluv.” Senesis 21:10 Sion 8:35 31 Tuak ka ahinkuli keil en demkatien, ir rorsuvaltei titiali onen ahin koa vi slev. Ka rosuval titiali onen ahin koa maluv. Kal 3:29

4:3: Kal 3:23; Kol 2:20

4:4: Efes 1:10; Sion 1:14; Rom 1:3

4:5: Kal 3:13; Rom 8:15

4:6: Rom 8:15-16

4:7: Rom 8:17; Kal 3:29

4:8: 2Kron 13:9; Aes 37:19; Ser 2:11; 1Kor 8:4-6

4:12: 1Kor 2:3

4:16: Amos 5:10

4:22: Sen 16:15; 21:2

4:23: Rom 9:7-9

4:24: Rom 8:15; Kal 5:1

4:26: Hib 12:22; Rev 3:12; 21:2,10

4:28: Rom 9:7; Kal 3:29

4:29: Sen 21:9

4:30: Sion 8:35

4:31: Kal 3:29