3
Ahi san tokolkatien keil onen ka en sise ten demkatien, ka rovitei en sise ten mengkatien keil onen Siu keil
1 O me-Kalesia keil, sakien onami mul rie lati keke mivi unu keil enges. ?Vensa varei mimaen meatin keil umai aluvos kami ral min selusien one avit mihousil kat mengkatien onen Siu keil keke mivamai mivahi Kristin keil anatin en meten Ahi? Veni, en metomi, inau navit kilea mukave Iesu Kristo mat en aiveave. 2 Mihehit kilea li minau. ?Ahi san Ninin Votut min kami veni mimusil kat revi mengkatien keil onen Siu keil? Vuo. San Ninin Votut min kami veni miling demkatien onami en more longlongien usil Kristo. 3 ?Sakini, vensa mimul mimumon sakien onen unu keil? Veni, mulamu, mimual rohtoh en sise ten demkatien ka en keihoen onen Ninin Votut. Ka kosa, mimul misak visi mivatokol keite ten sise enek vaka en keihoen onami enges. 4 Munak mihehiles ran sise ten demkatien koa vi anatin, mahien keil koa mikuri tuai ven demkatien onami, mikur heisav eni enges. 5 Ka navong Ahi san Ninin Votut min kami ka mumon merikel keil ven kami, romumontei veni mimusil kat revi mengkatien keil onen Siu keil. Mumoni veni milong more longlongien usil Iesu Kristo ka mikur anatin eni.
6 Rokilea koanek vi anatin veni suval asa koa Tus Votut viteni usil Ebraham vit, “Ebraham ling demkatien onen en hatkatien onen Iahova. Ka ven koanek, Iahova si veni ka les moulien onen mal en meten.” Senesis 15:6 ✡ Rom 4:3 7 Sakini, tahos mikilea keke vi koakeil akur demkatien varei avi vatiamal kati onen Ebraham. 8 Ka Ahi ling kati tuai keke voumon sise keke koakeil arvitei Siu akilea avamai avamal en meten vaka en demkatien. More longlongien koanik, Ahi vit luvati min Ebraham mulamu vit, “Ka keik kihi sise ten tokolkatien onak heha min vatiamal vasi keil ten out netan.” Senesis 12:3 ✡ Sen 18:18; Umen 3:25 9 Ven koanik, tokolkatien onen Ahi mul en koakeil vasi akur demkatien suval koa Ebraham kuri. ✡ Rom 4:16
10 Ka sesendaen tai mul en koakeil vasi asak visi avousil kat mengkatien keil onen Siu keil keke avamal en meten Ahi.* Mengkatien keil onen Siu keil avi houlu ramat, ka meatin tovuol kilea voumon keil vasi. Veni Tus Votut onen Ahi viteni vit, “Sesendaen hel en koakeil vasi armum vasitei tounah vasi keil koa amutis kati en mengkatien keil onen Mosis.” Duteronomi 27:26 11 Rokilea keke meatin tovuol kilea vamai vamal en meten Ahi vaka en mengkatien keil ekek veni rolonge keke, “Koakeil amusil Ahi ral min demkatien, keil amal en meten.” Habakuk 2:4 ✡ Rom 3:20; Kal 2:16; Rom 1:17; Hib 10:38 12 Ka koakeil asak visi keke avamai avamal vaka en sise ten mengkatien keil, keil armusiltei mun sise ten demkatien. Ka sise koa amul ien keih. Koanek suval asa koa selusien onen Ahi viteni koa vit, “Meatin koa san kei keke voumon mengkatien keil onen Ahi, kei houmon keil vasi.” Levitikas 18:5 ✡ Rom 10:5
13 Ka avaseini keke sesendaen tai mul emai en koakeil vasi armum vasitei mengkatien keil onen Ahi, Iesu Kristo sakin ir romaluv ran mahien ten sesendaen koanek. Veni kei kur vasin mahien ten sesendaen orer suval koa amutisi en Tus Votut avit, “Sesendaen mul en meatin koa mat murur en vatiai tai.” Duteronomi 21:23 ✡ Rom 8:3; Kal 4:5; 2Kor 5:21 14 Sakini, ka en asa koa Iesu Kristo mumoni, tokolkatien koa Ahi vat kati min Ebraham kilea vamai en koakeil emun arvitei Siu. Anatin, Iesu kur mahien orer keke rokilea rovakur Ninin Votut vaka en sise ten demkatien. Koanik vi Ninin Votut koa kei vat kati keke hesani min meatin keil onen.
Ahi vat kati keke hesan tokolkatien onen min koakeil enges akur demkatien
15 Tuak ka ahinkuli keil en demkatien, nihit kilea rendemien koanik min kami heka en sakien tai ten moulien orer. Navong meatin elu lumae en lingkatien tai, keilu lumumon hatkatien takeih tai ral min keilu. Evus, lumutis kati ka luling isealu mul ien. Ka navong luretalihe evus, meatin sav emun sakras valing kat etai ris selusien eni, vuo voumoni vamai vahi heisav enges. 16 Ka, suval koanek, navong Ahi mumon hatkatien takeih onen ral min Ebraham, mumoni emun ral min ‘kei koa hekistal eni.’ Senesis 17:7✡ Sen 12:7; 13:15; 24:7 Tus Votut rovitentei vahit mumoni ral min ‘koakeil ikistal eni.’ Veni navong viteni vit ‘kei koa hekistal eni,’ mul selus usil meatin tas. Ka meatin enek vi Iesu Kristo.
17 Namul naselus usil hatkatien koanik keke matie lati min kami keke mengkatien keil koa Mosis sani min Siu keil rosakintei hatkatien takeih koa Ahi mumoni ral min Ebraham vamai vahi heisav enges. Vuo, romukteinek. Veni Ahi mumon hatkatien takeih onen ral min Ebraham mulamu en avong koa san mengkatien keil onen min keil. Anatin, sua handred ehat hanumau tai ka halualim emun (430) mai muli, ka Ahi san mengkatien keil ekek esuk min Mosis. Ka mengkatien keil ekek asakras avoumon hatkatien koa mulamu vamai vahi heisav enges. ✡ Eks 12:40 18 Veni tokolkatien koa Ahi vat kati min Ebraham, kei kur maeni suval sanien tai. Rokurtei veni mum vasi mengkatien keil. Veni, vahit meatin kilea vakur tokolkatien enek vaka en sise sav ten mengkatien keil, voumon hatkatien onen Ahi vamai vahi heisav enges. Ka rolei kilea keke Ebraham kur maen tokolkatien ka en hatkatien onen Ahi. ✡ Rom 4:14; 11:16
19 ?Munak meatin keil umai amal en meten Ahi enges ka en demkatien, vensa suk Ahi san mengkatien keil min meatin keil onen? Ahi san mengkatien keil ekek min me-Isrel keil veni amumon tisaen lisenges. Ka san mengkatien keil ekek min keil keke avalei kilea tisaen keil one vatokol avong koa ‘kei koa hekistal’ en Ebraham, koa Ahi varei vat kati mini, hemai hekistal. Ka mengkatien keil, Ahi sani min angelo keil koa asani suk min Mosis keke vahi ongon vahisein me-Isrel keil eni. ✡ Rom 5:20; Umen 7:38,53; Hib 2:2 20 Navong Ahi san mengkatien onen min me-Isrel keil, sani min keil ka en Mosis enges. Ka navong kei mumon hatkatien takeih onen ral min Ebraham, Ahi, kei sasen enges, mumoni. Sakini, hatkatien takeih onen hetetamen imok mulin mengkatien koa sani ka en Mosis.
21 Vahesa meatin tai hehiteni hehit, “Ahi mul vilehiles rendemien onen veni, mulamu, san hatkatien, ka katau suk, san mengkatien keil onen.” Ka vuo, romukteinek. Veni vahit vahi anatin keke mengkatien mul koa kilea vasan moulien min ir, kilea emun voumon ir rovamal en meten Ahi. Ka mengkatien sakras vasan moulien vuo voumon ir rovamal. ✡ Rom 8:2-4 22 Ka Tus Votut onen Ahi vit kilea eni keke meatin vasi keil ten out netan amul en eim takeih ten tisaen, ka asakras avalong kat mengkatien keil onen. Ahi mumoni mukonek keke kilea voutut moulien onen koakeil vasi aling demkatien one en Iesu Kristo vasuval koa vat kati. ✡ Rom 3:11-19; 11:32
23 Navong Kristo romaitei veah, komai, Siu keil, memul en eim takeih ten tisaen enek, ka vi mengkatien keil onomai varei koa mul lei kokoe en komai. Evus, en avong koa mal, Ahi vothot eni keke meatin tai kilea vamaluv vaha ran eim takeih enek vaka en sise ten demkatien. ✡ Kal 4:3 24 Sakini, Ahi san mengkatien koanik keke helosil kat komai ka hetalimal en komai heha hetokol avong koa Kristo hemai hekistal ka hesakin koakeil aling demkatien one eni imal en meten. ✡ Rom 10:4 25 Ka veni Kristo mai tuai, komai, Siu keil, koa meling demkatien onomai eni tuai mermultei mun en hehen mengkatien koanik.
26 Ka kami vasi koa miling demkatien onami en Iesu Kristo mivi titan Ahi keil anatin. ✡ Sion 1:12 27 Veni navong avi baptaes en kami en isen Iesu Kristo, rie lati keke mikapil ral min Kristo ka mikur moulien hau suval koa mimusin en kami en eisin hau tai. ✡ Rom 6:3; 13:14 28 Sakini, rovitei tounah munak meatin tai vi Siu vuo rovitei Siu, maluv vuo vi slev tai koa mul en hen mesav, vi meahos vuo ahin. Anatin, rovitei tounah veni kami vasi mikapil vituai ral min Iesu Kristo tuai ka mimai mivi vangi meatin keil tas. ✡ Rom 10:12 29 Sakini, navong mikapil vituai ral min Iesu Kristo, mimai mivi titan Ebraham keil, ka mihekur tokolkatien keil koa Ahi vat kat rohtoh eni mini.✡ Rom 4:13