19
Ahi selus min me-Isrel keil en Vatihou Senae
Eksodas 19:1-8,16-20
1-2 Me-Isrel keil amemea ran out Revidim ka amual taveah neli. Ka en avati etel kati katau en avong koa amemea ran out Isip, me-Isrel keil umai en out volvol vesesal en tavoite ten Vatihou Senae. Ka amumon votevav keil one en out enek. Ka Mosis vina en vatihou vaselus min Ahi.
Iahova mul en hou ka vise vit, “Mosis, kihita kihiteni hemukok min me-Isrel keil kihit: ‘Kami miles asa keke inau, Iahova, namumoni min me-Isip keil. Ka milesi mukave nakur kami mimai mirokol inau ekok en keihoen ka envatien suval veivakum kur titan en apouen. Sakini kosa, munak mihelong kat rek ka mihousil kat mengkatien keil onak, mihehi meatin keil kati onak. Anatin keke tounah vasi en out netan vi onak, ka kami suk, envatien onak hel en kami helohlin meatin sav keil ten out netan. Dut 4:20; 7:6; 14:2; 26:18; Taet 2:14 Kami mihehi vangi meatin kati onak koa hehi votut ka miheha netan minau suval vangi pris keil koa hiasuvien onak hel en moulien onami.’ ” 1Pit 2:9; Rev 1:6; 5:10
Navong Iahova selus mini evus, Mosis mita ris netan ka vise ruain meatin keil. Tounah vasi koa Iahova viteni mini, kei vit meseini min keil. Navong meatin keil alonge, avit, “Tahos, mehoumon tounah vasi keil koa Iahova viteni.” Evus, Mosis vina ris, vit mesein selusien one min Ahi.
 
16 Evus, en avong etel, en visokon teni, voulul muroh ka ahil vil. Mari mahmah tai kistal ka mutaluh koe vatihou nesa. Evus, mari amaru tai musel keih. Tounah keil ekek sakin meatin vasi keil amaleilei ka ametau houlu en out koa amumon tavolin keil ome eni. Dut 4:11-12; Rev 4:5 17 Mosis mulamun keil amea ran out amumon votevav ome ien, ka uva avahisu min Ahi. Keil vasi uva ka avati keil en tave hou. 18 Alesi keke Iahova mita en Vatihou Senae suval ahang ka mul rupas mutaluh koe usite vasi keil teni. Out kulul keih ka rupas vina nesa suval vane. 19 Verien ten amaru mul musel keih vis keih imok, mul mita vesesal ven keil. Mosis selus min Ahi, ka Ahi vit kesi en voulul. 20 Iahova mita en hoite ten Vatihou Senae, ka vise Mosis vahina vahisu mini en out enek. Sakini, Mosis veou vina.

19:5: Dut 4:20; 7:6; 14:2; 26:18; Taet 2:14

19:6: 1Pit 2:9; Rev 1:6; 5:10

19:16: Dut 4:11-12; Rev 4:5