Eklisiastes
1
Tounah vasi ten out netan vi heisav enges
Eklisiastes 1:1-11
Selusien keil ekek avi selusien onen Solomon, Meatin Tahihiseien, koa vi natin asuv houlu Deved ka asuv houlu onen me-Isrel keil koa ro en taon ten out Serusalem.
Meatin Tahihiseien viteni vit,
“Umen vasi keil orer vi heisav vis vi heisav enges.
Anatin, tounah vasi koa romul romumoni en moulien orer hemai hehi heisav enges.”
En avong vasi en moulien onom kolehkao en umen onom en out netan ekek.
?Ka kovotin asa en keite teni? Matien enges.
Vangi meatin tai, avas keil en out netan, amoul ka umat,
ka vangi meatin sav umai akes vulie.
Ka out netan lises mul vatte tas, tounah tovuol mul viles.
En avong vasi, meteiai mea ka muloh va vio … vita munu.
Evus, kalah eris vina en vulin keke hemea ris.
Eang emun, toio mai ka va, ka lengav emun mai ka va,
keilu lukarali heisav va vio … luva ris en vulealu.
Oai keil amue uva en atas, ka atas sakras vahilelau.
Oai mul mea mai vi ous. Evus, ous enek mus vita netan ka mue eris vita en atas.
Tounah vasi rovilestei, mul vatte tas.
Avek mah en sakien keil enek, ka nasakras emun mahiten etai tounah usili.
Meter lele va vio … ka en vati vales tei ris tounah emau.
Ralinger longlong va vio … ka en vati valonglong tei ris emau.
Tounah vasi koa mai rohtoh, hemai ris hekistal.
Ka tounah koa meatin tai mumoni tuai, meatin sav hemai houmoni hesuvali.
En out vasi netan, tounah tovuol vahi heite hau.
10 ?Mukave? Tounah etai koa meatin kilea vahiteni vahit, “Lesi mau, koanek vi tounah hau tai.”
Vuo, kistal tuai mulamu en avong koa arvasitei mau ir.
11 Meatin keil ten kosa armundem usiltei asa koa kur out mulamu.
Ka koakeil imai ikatau en ir, irmundem usiltei asa koa kur out kosa.
Ka sakien enek heha vio … keite teni hetovuol.