3
Sakien tetahos onen elda keil
Selusien matu koanik vi anatin: ‘Munak meatin etai en vati vahi elda tai ten Sios; asa koa en vati tahos imok.’ Sakini, meatin koa vit vahi elda, sakien onen hemukonek: sakien onen mutolas, ahin onen tas, vi meatin koa musil rendemien koa tetahos, mul lei kat revi sakien keil onen, ka vi vati meatin tai koa meatin sav keil akilea avouhou mini. Vi vati meatin koa kur revi meatin sav en teim sen, ka kilea vahisein meatin sav en selusien onen Ahi. Taet 1:6-9 Rovitei meatin tamunmunien vuo meatin tatituen, sakien onen merau enges. Rovitei meatin tason selusien takeih ka rovitei uti mani. Kei mul losil kat revi teim onen ka titiali onen keil avouhou mini ka along kat ren. Veni munak meatin sakras valosil kat revi onen keil, hemukave suk helosil kat revi meatin keil onen Ahi? Kei rovitei heite hau en demkatien onen en Ahi. Veni munak demkatien onen vi heite hau, kei kilea vahilelau en rendemien ten hetetamenien. Hemukonek, Ahi hesan mahien mini hesuval koa sani min Temat ven vati sakien enek. Sakien onen mul sakin meatin vasi keil koa armusiltei Ahi akilea keke kei vi meatin koa tinahos mul ien. Munak hermukteinek, hemot en avul ten tisaen onen Temat ka hememou en meten meatin sav keil. 2Kor 8:21
Sakien tetahos onen dikon keil
En vati sakien enek, dikon keil emun ihi vati meatin koa meatin sav keil akilea avouhou min keil. Keil arvilehilestei selusien, vuo arvitei uti munmunien vuo uti mani. Keil ihuli kat demkatien one hel en keil ka usili hetal min rendemien koa akilea mal en meten Ahi. Anatinien usil vatte ten demkatien koanik ro kus mulamu, ka kosa, Ahi mul vit leini min ir. 10 Helamu en avong koa meatin tai hekur umen enek, mihelei rahit moulien onen; munak tounah tisa hetovuol eni, kei kilea suk vakur umen ten dikon. 11 Ahin one keil, ihi vati ahin koa meatin keil ihouhou min keil. Irvitei ahin koa mul vitehit usisil. Sakien one housil rendemien koa tetahos ka hehi ahin tai koa meatin sav keil akilea avaling desien one en keil. Taet 2:3 12 Dikon tai, ahin onen hetas, ka heilea helosil kat teim onen hetahos. 13 Dikon keil koa um hetahos ikur houhouen onen meatin sav keil ka irmetautei navong aselus min meatin keil usil demkatien one en Iesu Kristo.
Ahi sakin anatinien onen koa ro suai telamu, mai en mesai
14 Namundemi navit hervitei tuetin, nihat nilesuk. Ka tahos imok namutis leta koanik vat minuk, 15 ven koa munak nitoun, keik kokilea tuai sakien koa koakeil ten vatiamal onen Ahi usili. Ir rokapil vituai en mari Sios onen Ahi koa moul, koa asuval pos ka vatiseng keil teni koa asuv kat selusien ten anatinien onen. Efes 2:19-22 16 Lingkatien suai onen Ahi koa vothot eni min ir usil Iesu Kristo vi hetetamen imok koa vit,
“Kei, mita netan mai vi meatin anatin.
Kei, Ninin Votut san keihoen vatie lati keke kei vi Natin Ahi.
Kei, angelo keil alesi.
Kei, avit usili karahit en out vasi.
Kei, meatin keil ten out netan akur anatinien eni.
Kei, Ahi kuri vina en out nesa ral min muohien ten hetetamenien onen.” Sion 1:14; Mak 16:19; Umen 1:9

3:2: Taet 1:6-9

3:7: 2Kor 8:21

3:11: Taet 2:3

3:15: Efes 2:19-22

3:16: Sion 1:14; Mak 16:19; Umen 1:9