M̃aki Nap̃a Pol
Siria Pan
PILIMON
Visayuena Na Tusi Nene
Suniena plas na tusi nini
Pilimon naga pe yaru na lelagaena tai, a naga sup̃e kiena yaru na yum̃ae korenena tai nap̃a kiena kia Onesim̃as. Onesim̃as pure petan kiena sup̃e nap̃a Pilimon, pa sike garu pulkumali keviu nap̃a Rom, ana e lele nene naga m̃eke loyum̃a na logeviowaena ea. A e yo nene naga pitawa amio Pol, a pogos nap̃a sike amio Pol naga pimi pe yaru kiena Yesu. Ana Pol siri m̃aki tai pa Pilimon, piyun tania vena naga monar were Onesim̃as wasup̃e im̃asu sike amio naga. Pol pisa pa Pilimon, sape nagane Onesim̃as pimi pe yaru kiena Yesu rui, a popon naga sinena kar re, ana naga viewoia a werear sina vena ve yaru na yum̃ae korenaen sina. Ana yoko naga ve ve yaru na yum̃aena koren rega, naga imi ve wenla ruru napo komin lalua asikol la amio Yesu Kristo.
Komp̃asnen tusi la na nini
Viena p̃esa 1-3
Pol mieluar Pilimon komin kiena yum̃aena 4-7
Pol piyun m̃areran pa Pilimon vena were si Onesim̃as 8-22
Visena maro 23-25
1
Pol siar kiena visena pa Pilimon
Inu Pol, nesiri ke m̃aki nene pan ko Pilimon. Nanagane nesike e pupia pulkumali nae Rom, a komin nap̃a nekila ke yum̃aena kiena ne Yesu Kristo, la amligan inu nesike e yum̃a naloge viowaena e nini na wa. Kieta wolai nap̃a, Timote, naga sike amio inu e nini na wa, ana imimi lua mepisa pokolulagi pona pokolemalo pan ko, nap̃a ita ga teloka temiyum̃ae ke pa Sup̃e taaga ga, Kolosi 4:17a kiamimi visena imimi lua sanene pan ke m̃ena ga vineta nene, Lewia, a yaru na kieta p̃egasia nene, Akip̃as, nap̃a naga pe yaru m̃arera na kilaen mara e lepas na yum̃aena kiena ne Sup̃e, amio p̃egas kiena ne li nalelagaena tap̃ena lala nap̃a asum̃a apiora ke e mom̃a yum̃a.
Imimi lua memlen mesape Arimata Ntewa, a kieta Sup̃e Yesu Kristo, lalua aligan kiela lemamiena a sum̃arena sike amio amiu e yo nap̃a asike ea.
Sinesiena a naviawaena kiena ne Pilimon naga keviu manene pap̃isi
Wolai Pilimon, pogos nap̃a nesitom̃al ko e kiau leniena lala, silaga nesum̃a nepisa ke potena pan Ntewa vanon ko. Na nene komin nap̃a nemloge rui nap̃a la apisayu kiom̃a p̃elaga wo, asape kiom̃a naviawaena e kieta Sup̃e Yesu m̃arera po pap̃isi, a kiom̃a sinesiena pan nalelagaena lala, keviu manenea. Nemlen wo ko ke, nesape pogos nap̃a ko osum̃a okianlua ke kiom̃a naviawaena pa yaru tap̃ena lala, p̃isi na kila la akilia manene laa sane e navisa ruruena nowo la nap̃a ita kieta, nap̃a temla Kristo e kieta malena lala. Ee, Pilimon, kiom̃a sinesiena wo naga sum̃a kila ke li nalelagaena wa lala, la sinela la amloge po pap̃isi, a pogos nap̃a nemloge, suri nene kila nemloge po sina, a kila inu m̃ena nekekara pap̃isi.
Pol naga piun m̃areran pa Pilimon vena were si kiena yaru na yum̃aena nene Onesim̃as
Ana Pilimon, sineun nesape neviun suri tai van ko. E pupia yum̃aena kiena ne Kristo nap̃a nesum̃a nekila ke ne, pona mesmesun ruru ga nap̃a nevisa ruru ga van ko nevisave popon ko okila ve sanene ve sanene, ana taveve p̃elaga na sinesiena, pe sineun re nevis m̃arera ve sanene van ko poli. Nanagane, in na nepimi nepe yermarua ke narui, nesike e yum̃a nakoaena vanon Yesu Kristo, ana sineun nesape neviun ga tan ko, visae ko okekaran nap̃a otam̃an suri nene nap̃a nesape neviun tan ko.
10  Kolosi 4:9Yaru tai sike e nini, pogos nap̃a nesike pa e yum̃a naloge viowaena sanini rui, ana nesumon yaru nene pimi e Kristo, a nanagane nesum̃a nepisu ke yaru nene sa ga naruu tai. Yaru nena Onesim̃as, nap̃a sumo pe kiom̃a yaru na yum̃aena tai, siraunia naga pure petan ko, pimi e yo nini. 11 Ee, yaru nene, kiena kia kana kinas sape “kila yum̃aena wo,” ana nesitom nesape nanua sumo, naga sum̃a kila kiom̃a yum̃aena pe po ruru re poli. Ana nanagane, nap̃a pilon kiena malena rui, nemlelaga nesape naga kilia kila yum̃aena wo lala na iila koena, a naga kilia kila m̃ena ga yum̃aena na iila inuena.
12 Ana, nanagane nesape neligan si Onesim̃as wasup̃e ke sina ga im̃asu pum̃a narui, sa nap̃a nemlalua ga kiau malena komp̃asia nane nemligan pim̃asu pum̃a ne. 13 In na nekekaran nesape popon naga sum̃a ga amio inu e nini, vena iila inu e pogos m̃arera nini nap̃a nem̃eke e yum̃a naloge viowaena vanon lologena wo, a visae naga kila sanene, sa nap̃a naga kus lelem̃a, naga kila yum̃aena tai pan inu nap̃a torokin ko okila van inu.
14 Ana pe pon re nom̃areran naga vena naga sike amio inu sanene poli, vanon nap̃a ko na omninue ga. Sineun nesape visae ko okila kiau yum̃aena wo tai sanene van inu, p̃isi na ve vanon re ga nap̃a nem̃areran kon poli, ana vanon kiom̃a sinesiena wo a kiom̃a sinewoena ga. Ya nap̃a yoko Onesim̃as kila, naga pe kiom̃a nap̃a ovisawalia.
15 Lelaga nap̃a Onesim̃as naga pur matan ko, ana ane kilia, pona Ntewa kila naga pur matan ko yam plas ga sanene yo, vena visae wasup̃e ke sina ga imi pum̃a, p̃isi na naga ve kiom̃a lue narui, vano vano-o tap̃atete p̃isi. 16 Sanene komin nap̃a nanagane, p̃isi na naga wasup̃e ke sina ga pum̃a, naga ve ve sa re si yaru nayum̃ae kiom̃aena, ana naga wasup̃e pum̃a sane womla tai e Yesu, nap̃a sanene na po manenea. Sineu si naga keviu pap̃isi rui, sa ga wolai tai, a nemlelaga nesape p̃isi na sinem̃a si naga vano vano-o vap̃isi, komin naga pe kiom̃a yaru p̃isi rui, a metavania, nanagane naga pimi pe womla m̃ena ga. 17 Suri ne na nene nesape neviun tan ko. Visae ko opisu inu sa nap̃a ita lua tepe wolai, a ita lua tepe yaru nakilaen yum̃aena taaga ga, sineun nesape oure si Onesim̃as wasup̃e im̃asu pum̃a, sa ke ga nap̃a visae neim̃asu pum̃a, p̃isi na ko okekara vap̃isi nap̃a oure inu neim̃asu e mom̃a yum̃a. 18 A visae Onesim̃as naga pinaun kiom̃a suri tai, pona kila kare kiom̃a suri tai, pona ya sina, ana p̃isi na inu ga nevisuveve suri la nene.
19 Visena nene inu ke ga Pol narui nesiri ke ga e lum̃au, sane kiau navisaarena tai van ko, nesape visae sinom̃ania, p̃isi na neul plan make kiena lapui vetan ko. Ana pona ko osum̃a ositom̃al ke nap̃a ko m̃ena ga kiom̃a pupia lapui tai nap̃a sike e inu, nap̃a kiom̃a malena wetelu, komin nap̃a inu na nekila ko otol malena nene e pogos nap̃a nemlologon lologena wo pan ko.
20 Ve sanene, sineun nesape okila yum̃aena wo nene van inu nap̃a nesum̃a nepiun ke tan ko e kia kiena ne Sup̃e. Wolai, visae okila ve sanene, p̃isi na neloge sineu wo sina vap̃isi, nap̃a malena wo kiena ne Kristo naga sum̃a miyum̃ae ke sanene e kieta malena lala.
21 Pe nemaraun re nap̃a nesiri visena la ne sanene van ko poli, komin nap̃a nekilia ruru po rui nap̃a p̃isi na ko okila taveve ya nap̃a nepiun tan ko. Ee, nekilia m̃ena ga nesape pona p̃isi na okila m̃ena ga wo laa sane yo, vano taulu kiau naviunena nene.
22 A nesape neviun ke m̃ena ga suri tap̃ena tai tan ko, nesape awis, okila ruru m̃au lele na monena tai e mom̃a yum̃a, komin nap̃a nesum̃a nekila ke kiau sitomena m̃arera nesape ve ve piavi re, p̃isi na Ntewa naga tam̃an inu nowasup̃e ke sina ga neimi pun amiu, sa nap̃a amiu asum̃a apiun ke tania e kiamiu leniena lala.
Visena maro kiena ne Pol pa Pilimon
23  Kolosi 1:7, 4:12Ep̃ap̃ras nene, nap̃a naga m̃ena ga imimi lua mesike e yum̃a nakoaena e nini vanon Yesu Kristo, naga pisa pisape Ntewa visa ruru ko. 24  Yum̃aena 12:12,25, 13:13, 15:37-39; Kolosi 4:10, Yum̃aena 19:29, 27:2; Kolosi 4:10, Kolosi 4:14; 2Tim 4:10, Kolosi 4:14; 2Tim 4:11A yaru tap̃ena la nene, Mak, a Aristakas, a Timas, a Luk, nap̃a la amiila inu keviu pap̃isi e yum̃aena, la m̃ena ga apisape la asitom̃al ko ke e kiela leniena lala. 25 A nanagane, kiau leniena sanini, nesape lemamiena kiena ne Sup̃e Yesu Kristo naga sike e losinemiu la punu ga.
Inu, Pol.

1:2 Kolosi 4:17

1:10 Kolosi 4:9

1:23 Kolosi 1:7, 4:12

1:24 Yum̃aena 12:12,25, 13:13, 15:37-39; Kolosi 4:10, Yum̃aena 19:29, 27:2; Kolosi 4:10, Kolosi 4:14; 2Tim 4:10, Kolosi 4:14; 2Tim 4:11