Matiu
Sepinien xa Diamu te Matiu
Visi iaxa tetis sepinien ak?
Melele xa Iesu tepol kokot ni pispisien nan xil e di tetal rerat meseien ra moletin xil hao, moletin xil holu di latehusili. E melele nen ak, Iesu di tekakao e taon tahal Kapaniam, e tepus Siu tei xa di teleh takis ra Siu sav xil tengan vasa ni vahe kavmen tahal Rom, hisen Matiu Livae (Mat 9:9). Tumulen xa xi tetisi di biteni xa melele xa Iesu tepusi e tekesi, vatei takes, xi testokovein polien nan e tehusil xati. Di, e melele xa Iesu tehe ut nesao, Ninin Eo mei tepolu e Matiu e eloheoh sav xil mun. Ma lateha latehithiten longeongen hos usil Iesu Kristo mi moletin xil (Polien 2:4,43). Matiu tetis vanuvei ak usil meulien na Iesu e huram 63 AD (huram 63 xa dutou ni poten na Iesu).
Visi iaxa tevuli sepinien ak tetiamu?
Matiu tetis vanuvei ak teha mi mol-Isrel xil vengan holu e xil latake reitin ti xa Iesu iaxa be xi xa Hi tehit xati tetiamu tengan isa ni imei. Misak ni, Matiu en tehei tengan vapisen ni xa holesok xil xa provet xil te oltestamen latehit usili e rin te meien, meulien, e mea rilomunen na Iesu mei tehe reitin.
Matiu tetis sepinien xil ak veneh?
Matiu en tehei vapisen ni xa meien na Iesu tehusil xat naha xa Hi tehit xati usil meien na suv toto xa isa ni imei tengan vatutou ni mol-Isrel xil - Matiu tetis kuh holesok xil xa testal e meulien na Iesu e tepisen ni xa di nggusil naha xa provet xil tetiamu latehit usili e oltestamen:
* Iesu texo vatimol na Ebraham (Mat 1:1) e tehusil hitxatien xa Hi tepol ni tetela (Sen 22:18) tengan 'vatimol nan xil lihe suse te tuxolxatien na Hi iha mi vanut moletin xil vus te ut etan.'
* Iesu texo vatimol na suv toto Deved (Mat 1:1) xa tehusil hitxatien xa Hi tepol ni tetel Deved (2 Sam 7:13) tengan 'lelaxatien na ngan xil xa listal e vatimol nan iloh sal ha vuma ... hoxalite teni ihe tovuol.'
* Iesu, ninen tehe atul maxoe tei xa takil ti mu tiramue (Mat 1:18) texoni ngan taxa Hi tehit xati texo provet Aesea (Aes 7:14).
* Iesu, latpesi e metimal tahal Betlehem (Mat 2:1) texoni ngan taxa Hi tehit xati texo provet Maeka (Maek 5:2).
* Eilep tatei xil xa latehur kilakilen texo suse na hitu xil latexo ist e latemei e Isrel tengan lalang ves 'tuvava xa latpesi be suv toto na Siu xil' (Mat 2:2) vengan xa xil latepus hitu nan mei testal texoni ngan taxa Hi tehit xati texo provet Balam (Nam 24:17).
* Tuvava Iesu teha tete kantri tahal Isip vuteili (Mat 2:14-15) texoni ngan taxa Hi tehit xati texo provet Hosea (Hos 11:1).
* Sion Baptaes mei misak mesen suse na Iesu (Mat 3:1-3) texoni ngan taxa Hi tehit xati texo provet Aesea (Aes 40:3).
* Iesu tepisen ni xa xi pipin tengan vahur polien na Hi texo sexien xa temaen Sion vabaptaes ni (Mat 3:16-17). Hi tepisen ni xa temaal pupu ven, e tetutou ni ngan ak, Iesu teha tepol kokot ni polien nan xil.
* Melele xa Iesu tehur sakpisien xil texo he Temat (Mat 4:1-11), tepisen ni xa Iesu tenamot ti e tesaen, e tesoh kil tetel sepinien na Hi.
Matiu en tehei vapisen ni xa Iesu bemei tengan vapispisi mi moletin xil usil naha istal e meulien nae melele xa Hi mei ihe Suv Toto nae - Matiu teling pispisien xil na Iesu lateti e vanut pispisien lim (5):
* E hu tei, Iesu tepispisi mi moletin xil usil sexien xil xa momal tengan moletin xil lihuri melele xa Hi mei ihe Suv Toto e meulien nae (Mat 5:1-7:29).
* Iesu tepispisi ni xa sakpisien xil e melengien xil te xeih ti imei e meulien na ngan xil xa Hi mei be Suv Toto nae (Mat 10:1-42).
* Iesu tepispisi ni mi moletin xil usil sexien xa Hi mei ihe Suv Toto na moletin xil (Mat 13:1-52).
* Iesu tepispisi usil visi iaxa be eilep mak mu e ngan xil xa Hi be Suv Toto nae (Mat 18:1-35).
* Iesu tepispisi usil sakpisien e melengien xil te xeih xa ti imei mi ngan xil xa Hi be Suv Toto nae (Mat 24:1-25:46).
Matiu en tehei vapisen ni xa Iesu tehur xeihen texo Hi xa mili xeihen savsav xil e ut etan - Matiu tetisi xa Iesu 'tetal rerat meseien xil vus ra moletin xil' (Mat 4:23). Xi tetisi mun xa Iesu tepol ni temak tengan vasak ni naha xa Hi tehiteni texo provet Aesea mei vahe reitin (Mat 8:17).
* Iesu tehur xeihen teli meseien leporsi (Mat 8:3); meseien xa ri moletin mat (Mat 8:13; 9:6); meseien xa moletin ven mitin (Mat 8:15); e teli meseien savsav xil mun (Mat 8:16; 9:22,35; 12:13,15; 14:36; 16:30).
* Iesu tehur xeihen tengan vahol rerat ninin tesa xil vahe reling moletin xil (Mat 8:16,33; 9:33; 12:22; 15:28; 17:18).
* Iesu tehur xeihen tengan vasak ni votiang e oei lalilong xat raen (Mat 8:27).
* Iesu tehur xeihen tengan vasak ni ngan xil xa lamat, mei lameul rilomun (Mat 9:25).
* Iesu tehur xeihen tengan vasak ni ngan xil xa vurange bon, mei lalongeong rilomun, e ngan xil xa labe vut, mei lasepin (Mat 9:29,33; 12:22).
* Iesu tehur xeihen tengan vasak ni ngan xil xa metexil bar mei laketeh rilomun (Mat 21:34).
* Iesu tehur xeihen tengan vahangan moletin xil holu vatel anien xa hokorong tang (Mat 14:25: 15:36).
* Iesu tehur xeihen tengan vasa halesil vaha ni neta ngan (Mat 21:19).
Matiu en tehei vapisen ni xa vat xil na mol-Isrel xil latesin pispisien xil na Iesu e iexil ti tenavei laling neketen nae en e lavusil xati - Melele xa Iesu tepol kokot ni polien nan xil, mol-Isrel xil lamaal ven. E melele xa di tepol teha vuma, vat xil na mol-Isrel xil latesin ni e latepol ni texeih mini.
* Vat xil na mol-Isrel xil latehit tamal ti melele xa Iesu tesepin e rin na Hi tehit Hi naketeh ti mun nasa mi moletin xil ve tesaen nae xil (Mat 9:3).
* Vat xil na mol-Isrel xil latehit tamal ti xa Iesu di teanien tetel moletin tesa xil (Mat 9:11).
* Vat xil na mol-Isrel xil latehit tamal ti xa moletin xil holu latemaal pupu ve holesok xil xa Iesu di tepol ni (Mat 9:34).
* Vat xil na mol-Isrel xil latehit tamal ti xa Iesu tenahusil xat sexien matu nae xil ti (Mat 9:14; 12:2,14; 15:2).
* Vat xil na mol-Isrel xil latehit xeihen na Iesu texo Temat (Mat 12:24; 16:1).
* Vat xil na mol-Isrel xil latehit tamal ti xa Iesu di tesel xat xil ve sexien nae xil (Mat 19:3; 21:23,46; 22:15,23,35; 23:1-39).
Matiu en tehei tengan vapisen ni xa sakpisien xil e maten na Iesu tehusil xat naha xa Hi tehit xati tehit istal - Matiu tetis kuh holesok xil xa testal e sakpisien e maten xa Iesu tehuri. Xi tepisen ni xa holesok xil ak tehusil xat naha xa Hi tehit usili texo provet xil tetiamu e oltestamen.
* Hi tehit xati (Sam 118:22-23) xa vat xil na mol-Isrel xil lisin Iesu (Mat 21:42).
* Hi tehit xati (Aes 6:9-10; Sam 78:2) xa moletin xil linalong kil ti pispisien nan xil (Mat 13:13,34).
* Hi tehit xati (Sak 9:9; Sam 118:26) xa Iesu iloh ixo dongki tei ixoni suv toto tei melele xa mei istal e taon tahal Serusalem (Mat 21:4-11).
* Hi tehit xati (Sam 41:9) xa timue hos tei na Iesu xa di lateanien vituei, xi vari isa rati ihe he elu nan xil (Mat 26:23-24).
* Hi tehit xati (Sak 11:12-13; Ser 19:1-13; 32:6-9) xa lixal rat meulien na Iesu ni silva mani ihe hanutap tei e he xalu mun (30) (Mat 26:15; 27:3).
* Hi tehit xati (Sak 13:7) xa moletin xil na Iesu lilesae relingi (Mat 26:31).
* Hi tehit xati (Aes 53:8) xa melele xa lilepis Iesu e kot, linapol ni ti namal mini e litela tengan ha imat (Mat 27:1-2).
* Hi tehit xati (Aes 53:7) xa Iesu itat votei melele xa liso sepinien eah iha xati (Mat 27:12).
* Hi tehit xati (Aes 50:6) xa moletin xil liti e likus valnaon (Mat 26:67; 27:30).
* Hi tehit xati (Sam 22:14-18) xa liti xat Iesu ite eivave e liso daes tengan liseti eising nan xil (Mat 27:35).
* Hi tehit xati (Sam 69:21) xa melele xa maruru iat Iesu, xil lisa uaen xa mikon mini (Mat 27:34).
* Hi tehit xati (Sam 22:7-8) xa moletin xil lingue xat Iesu e lisisi tengan itutou ni xi tasen (Mat 27:40).
* Hi tehit xati (Aes 53:12) xa Iesu ihur longpangasien itel moletin tesa xil e isis ve ngan xil xa di lapurun ni (Mat 27:38).
* Hi tehit xati (Sam 22:11) xa istokovein Iesu melele xa xi ti ilong pangas xi (Mat 27:46).
* Hi tehit xati (Aes 53:9) xa liling tiei na Iesu ite rute xa di ladihin ngan xil xa holesok nae holu en (Mat 27:60).
* Hi tehit xati (Sam 16:10) xa namaen ni ti Iesu nate von maten, e tiei nan navolel ti e vul (Mat 28:6).
Vatit nenemien tei te vanuvei ak de Matiu 5:17
Iesu pispisi mi moletin xil bit, “Munanemi ti munahit inou namei tengan naso rerat Rae xil na Mosis e pispisien xil na provet xil vaha. !E-e, tamak ti! Natamei ti tengan naso rerat xil. E namei tengan nisak ni naha xa rae xil ak di lasep usili mei ihe reitin.”
Naha iaxa de sepinien ak?
1. Meien na Iesu nggusil xat naha xa Hi tehit xati (Mat 1:1 - 4:11)
E provins tahal Kaleli
2. Iesu pol kokot ni polien nan e bit usil sexien xa Hi mei ihe Suv Toto na moletin xil (Mat 4:12 - 7:29)
3. Iesu pisen xeihen na Hi xa mei ihe Suv Toto na moletin xil (Mat 8:1 - 11:1)
4. Moletin xil lasin ni tengan Hi mei vahe Suv Toto nae (Mat 11:2 - 16:12)
E suse vahe Serusalem
5. Iesu bue xat moletin nan xil ve sakpisien xil xa ti imei e xil (Mat 16:13 - 20:34)
E Serusalem
6. Moletin xil lasin Iesu e iexil ti tavei tengan lavusili (Mat 21:1 - 23:39)
7. Iesu pispisi mi moletin nan xil usil mea rilomunen nan e sakpisien xil xa ti imei e xil (Mat 24:1 - 25:46)
8. Vat na mol-Isrel xil lapol ni suse tengan Iesu vamat vaxo en (Mat 26:1-75)
9. Maten na Iesu (Mat 27:1-66)
10. Iesu mea rilomun ra maten e be ut nesao (Mat 28:1-20)
1
Vatimol na Iesu Kristo* Tumulen ak de Luk 3:23-38 mun
Ngan ak be vatimol xil na Iesu Kristo, xa tehe tei e vatimol na suv toto Deved tetiamu, xa tehe tei e vatimol na Ebraham tetiamu.
Ebraham, xi tehe tame Aesak,
xa tehe tame Siekob,
xa tehe tame Sudah tetel tuneli xil.
Sudah, xi tehe tame Peres xal Siera, xa ninexalu Tamar,
E Peres, xi tehe tame Hesron,
xa tehe tame Ram.
Ram, xi tehe tame Aminatap,
xa tehe tame Nashon,
xa tehe tame Salmon.
Salmon, xi tehe tame Boas, e ninen Rehab,
E Boas tehe tame Obed, e ninen Rut.
E Obed tehe tame Tiese,
xa tehe tame suv toto Deved.
 
Suv toto Deved, xi tehe tame Solomon, e ninen tehe tunau na Uraea.
Solomon, xi tehe tame Rehoboam,
xa tehe tame Abitsa,
xa tehe tame Asa.
Asa, xi tehe tame Sehosevat,
xa tehe tame Sehoram,
xa tehe tame Usaea.
Usaea, xi tehe tame Siotam,
xa tehe tame Ehas,
xa tehe tame Hesekaea.
10 Hesekaea, xi tehe tame Manase,
xa tehe tame Amon
xa tehe tame Sosaea.
11 E Sosaea, xi tehe tame Sekonaea e tuneli xil.
E melele nen ak, mol-Babilon xil mei latehas tan ni mol-Isrel xil e lateleh rerat xil latehe Babilon.
 
12 Ngan xil sung ak, xil labe avu xil xa latetutou ni melele xa mol-Isrel xil latehe Babilon:
Sekonaea, xi tehe tame Seltil,
xa tehe tame Serubabel.
13 Serubabel, xi tehe tame Apiut,
xa tehe tame Eliakim,
xa tehe tame Asor.
14 Asor, xi tehe tame Sadok,
xa tehe tame Akim,
xa tehe tame Eliud.
15 Eliud, xi tehe tame Eliesar,
xa tehe tame Matan,
xa tehe tame Siekop.
16 Siekop, xi tehe tame Siosep,
xa tehe tiramue na Meri,
xa tehe nine Iesu,
xa latekesi ni Kristo xa Hi tehit xati tehit isa ni imei.
17 Mak ma, melele xa labuli vatit avu xil ladi vatimol na Iesu, Ebraham tetuxoh suv toto Deved, lakameti xa latehe hat e le tei (14). E lakameti xa Deved tetuxoh melele xa mol-Isrel xil latehe Babilon, vatit avu xil ak latehe hat e le tei (14). E melele xa mol-Isrel latehe Babilon tetuxoh melele xa Kristo tepot e ut etan, vatit avu xil ak mun latehe hat e le tei (14).
Iesu Kristo Tepot e Ut Etan* Tumulen ak de Luk 2:1-7 mun
18 Ngan ak be tumulen usil naha xa testal tetiamu ni melele xa Iesu Kristo latepesi. Meri, nine Iesu, xi latesikoe xole ngamu tengan mei ihe atou na Siosep. E melele xa lutnati vituei ti mu, latekameti xa Meri teti tuei ni tuvava texo xeihen na Ninin Eo. 19 Vengan xa Siosep, tiramue na Meri, sexien nan xil momal pe met Hi, xi tenemi tehit isil rati. E xi en titavei vapol ni Meri vahe unoun pe met moletin xil. Ma xi bit xalu lalitasil e suse xa moletin xil linakil ti.
20 E melele xa Siosep di tamu minem usil rin ak, masxaxa tei na Hi Suv mei mistal mini e metuveen tei e biteni mini bit, “Siosep, tei e vatimol na suv toto Deved tetiamu, ulum nakan ti tengan ovur Meri vahe atou nam, vengan xa tuvava xa di ni nggo xeihen na Ninin Eo. 21 Meri iling horamue ak, e xouk uling hisen ihe 'Iesu' xa koute teni be 'Iahova di miteh meulien', vengan xa xi iteh meulien e moletin nan xil ra tesaen nae.”
22 Holesok xil ak mei mistal tengan vapol ni sepinien xa Hi Suv tehiteni texo provet nan mei vahe reitin xa bit,
23  “!Muteong kuhi! Ate-maxoe tei xa takil ti mu tiramue,
xi iti ni tuvava tei.
Ti, ilingi ihe malohos e liling hisen ihe 'Imanuel',
xa koute teni be 'Hi di mi xir'.” (Aes 7:14)
 
24 Melele xa Siosep milale, xi pol nggusil naha xa masxaxa na Hi Suv tesemae ni mini. Xi nggur Meri be atou nan e ludi vituei. 25 E xi tapat ti vatela ba duxoh melele xa Meri miling horamue nan. E melele xa miling horamue ak, Siosep miling hisen be Iesu.

*^ Tumulen ak de Luk 3:23-38 mun

*1:17: Tumulen ak de Luk 2:1-7 mun