4
Temat misak pis Iesu, e Iesu tamot ti e tesaen
Mat 4:1-11; Mak 1:12-13
Melele xa Iesu be reling Oeisal Sodan, Ninin Eo xa da en midela be uruvuol. E rute ak, Temat di misak pis Iesu melengien be hanutap lu (40). E melele nen ak, Iesu taxanien ti. Ma, e hoxalite te melengien xil ak, mae nggat pupu ni. Hib 4:15
Ve rin ak, Temat mei misak pisi bit, “Xosxa obe Nat Hi reitin, ma usemae ni hat xil ak lihiles mei lihe beret am.”
E Iesu bit rilomun ni mini bit, “!E‑e! Ninapol ni ti namak vengan xa Vanuvei Eo na Hi biteni bit,
‘Moletin misakras vameul e anien kestang.’ ” (Dut 8:3)
Di, Temat del Iesu be nesao e vathu tei, e vatei takes, pisen kantri xil vus te ut etan mini. E misak pisi bit, “Xeihen te kantri xil vus ak de heok. E inou nakila nasa rati mi moletin eah xa ieok bei tengan nasa ni mini. Misak ni, nakila nasa rat lelaxatien te xil itel holesok xil vus xa di en minuk. Mat 28:18 Misak ni, xosxa umot minou tang, ma nisa sen holesok xil ak minuk.”
E Iesu bit rilomun ni mini bit, “Inou ninapol ni ti vengan xa Vanuvei Eo na Hi biteni bit,
‘!Mumot mi Iahova xa be Hi namim,
e mulong xat xi kestang!’ ” (Dut 6:13)
Di, Temat nggur Iesu be Serusalem e milingi misoh e rute tei xa be nesao pupu e taep te Nim Eo na Hi. E rute ak, Temat misak pisi bit, “Xosxa obe Nat Hi reitin, uhut uhe tan. 10 Vengan xa Vanuvei Eo di biteni bit,
‘Hi isemae ni masxaxa nan xil
tengan mei lisikoe xolok.’ (Sam 91:11)
11 E,
‘Xil lipo xatuk itel hexil
tengan onasip hat ti ni lem.’ ” (Sam 91:12)
12 E Iesu bit rilomun ni mini bit, “!E‑e! Ninapol ni ti, vengan xa Vanuvei Eo biteni mun bit,
‘Munasak pis Iahova ti xa be Hi namim
tengan mukameti xa xi di mi xamim.’ ” (Dut 6:16) 1Kor 10:9
13 Melele xa Temat misak pis Iesu e rin xil vus, be relingi ha ituxoh melele sav xil xa pus mesal tengan vasak pisi. Hib 4:15
Iesu pol kokot ni polien nan e moletin xil te hal Nasaret lasin ni
Mat 4:12-17; 13:53-58; Mak 1:14-15; 6:1-6
14 Melele xa Iesu be reling uruvuol, xi polu ni xeihen na Ninin Eo, e dilomun be provins te hal Kaleli. Longeongen usili mikapis e ut ngasen xa di sangas visal rute ak. 15 Xi ba be nim te pispisien na Siu xil e di pispisi mi moletin xil en. E ngan xil vus xa lalonge lapet rat hisen.
16 Iesu mikakao ba duxoh taon te hal Nasaret, rute xa tematu en. E Sabat, Iesu be nim te pispisien nggoni ngan taxa di pol vehakut ni. E melele xa mea misoh tengan vavuli Vanuvei Eo na Hi, 17 xil lasa vanuvei na provet Aesea mini e xi buli bit,
18  “Ninin Eo na Hi Suv di mise xat nou,
vengan xi tehosei nou tengan nihit longeongen hos nan mi ngan xil xa labe hoeo.
Xi tesil inou namei tengan namiteni mi moletin xil xa ladi e nim te xeih
ha vexil vamase.
E nihiteni mi ngan xil xa metexil bar mei liketeh rilomun.
E nihiteni mi ngan xil xa ladi pe he mosav xil xa limeluv liha.
19  Xi tesil inou tengan nihithiteni xa Iahova tehosei melele nen ak
tengan itutou ni moletin nan xil en.” (Aes 61:1-2) Aes 58:6
20 Melele xa Iesu buli bus, boh xol vanuvei ak, di, misa rilomun ni ba mi moletin te tutouen, e dotan tengan vapispisi mi moletin xil. Melele xa met moletin xil vus xa lateti e nim ak da en, 21 Iesu biteni mi xil bit, “Vanuvei Eo na Hi xa mutelong nou natevuli, taxeak tang, sepinien xil teni mei be reitin.”
22 Moletin xil xa lalong pispisien hos xil xa di misa ni mi xil lamesep ven e lapet rati ve sepinien nan xil. E di, rute e xil lanem male ni labit, “!Ei! Xi be nat Siosep tang.” Luk 3:23; Sion 6:42
23 Iesu bit rilomun ni mi xil bit, “Nakila xa muhiteni minou sepinien matu xa bit, ‘Tokta, upol ni ngenom xil mu mei lilonge ihos rilomun,’ vengan xa iemim bei tengan nipol inggak, e metimal xati navan, holesok xil vus xa mutelonge xa natepol ni e taon te hal Kapaniam tengan muke reitin e nou ixo en. Mat 4:13; Sion 2:12 24 E nabiteni reitin mi xamim, provet tovuol tamu xa ngenen xil latehur pilei e metimal nan xati. Sion 4:44 25 Tetiamu, e melengien xil na provet Ilaetsa, us tenamus ti huram tehe tol e rute, e moletin xil vus, mae teat xil. Tem 5:17; 1King 16:1,7; 17:1; 18:1 E, e mol‑Isrel xil, tunau xil latehe holu. 26 E Hi tesil Ilaetsa teha mi tunau tei xa tave te hal Isrel ti. Xi de metimal te hal Sarevat sangas visal taon te hal Saedon.* 1King 17:8-16 biteni xa tunau ak teke reitin xa Ilaetsa tehe provet tei na Hi e tetutou ni. 27 Teimun, e melengien xil na provet Elisa, moletin holu te hal Isrel latehur mesien leporsi. E Elisa tenapol ni ti tenbexil vamese, xi tepol ni Neman te hal Siria kestang xa tenave te hal Isrel ti tenben mei temese rilomun.” 2King 5:1-14 biteni xa Neman teke reitin e sepinien na Provet Elisa xa Hi ihur rati ra mesien nan.
28 Melele xa moletin xil xa ladi nim te pispisien lalong sepinien nan, xil vus iexil mikati ven. 29 Ma latamea, lameru xati be reling metimal nae, e ladela labe seri meteh xa de haxot te metimal nae vengan xa labit lativin rat Iesu vamot vaha en. 30 E Iesu, xi biles, e mikakao nggo hilaep te vanut moletin xil ak. Di, be reling xil e nggusil suse nan ba.
Iesu nggol rerat ninin tesa ra moletin tei
Mak 1:21-28
31 Di, Iesu be metimal te hal Kapaniam xa de provins te hal Kaleli. E Sabat, Iesu di pispisi mi moletin xil inggak. Mat 4:13; Sion 2:12 32 Moletin xil lamesep ni pispisien nan xil vengan xa di bit kil koute teni mi xil nggoni ngan xa nggo Hi vari. Mat 7:28-29; Sion 7:46 33 E melele nen ak, moletin tei xa ninin tesa da en de vangit nim te pispisien. Xi mikei nggeih xat Iesu bit, Mat 8:29; Mak 1:23-24; 5:7; Luk 8:28 34 “!Ei, Iesu, ngan Nasaret! ?!Obit upol ni naha mi xamem!? ?Omei inggak tengan omu vin xamem? !Inou nakilak, xouk obe Moletin Eo na Hi vari!” Luk 4:41; Sion 6:69
35 Iesu mike xat ninin tesa ak bit, “!Utat votei! !E uhe reling moletin ak!” Ninin tesa bas tan ni moletin ak pe met moletin xil vus. Di, be reling moletin ak e neta ti taxula.
36 Moletin xil vus lamesep e di lasis xil mun tang labit, “?Hisit pispisien eah xiak? !Moletin ak di misepin del xeihen, e melele xa misepin nggeih mi ninin tesa xil, lalong xati e labe reling moletin xil!” 37 Ma longeongen usil Iesu mikapis ut ngasen xa de sangas visal metimal te hal Kapaniam.
Iesu mileh rerat mesien ra moletin xil holu
Mat 8:14-17; Mak 1:29-34
38 Melele xa Iesu be reling nim te pispisien te hal Kapaniam, be tim sa moletin tei, hisen Saemon Pita. Melele xa duxoh tim san, milonge xa avu atou kokon na Saemon Pita, ven minggan pupu. Ma lasis Iesu tengan vatal rati ra mesien nan. 39 Ma Iesu be visali e misemae ni mesien ak bit, “!Uhe relingi!” E, vatei takes, atou ak milonge bos, mitamea, e ba pol ni anien ae.
40 E melele xa eai minu e Sabat bus, moletin xil lakila lapol ni neta. Ma moletin xil holu laleh tua nae xil xa lamesei lamei visal Iesu. Xi miling hen e xil kekes e pol ni ngan xil vus ak mei labos. 41 E melele xa Iesu nggol rerat ninin tesa xil ra moletin xil holu, lamuis kei ba mini labit, “!Xouk obe Nat Hi reitin!” E xi misep xol xil tengan linasepin ti vengan lakila xa xi be Mesaea xa Hi tehosei. Mat 8:29; Mak 3:11; Luk 4:34; Mak 3:12
Iesu di pispisi e nim te pispisien xil
Mak 1:35-39
42 E visuvong nen, e makoe roroh, Iesu mika sen be uruvuol. E melele xa moletin xil latapus ti, laba tengan lalang ni. Melele xa lakameti, lasak pisi tengan ladak kesi nave reling xil ti. 43 E Iesu biteni mi xil bit, “Niha nihithiten longeongen hos usil lelaxatien na Hi mi moletin xil e rute sav xil mun. Vengan xa Hi tesil inou namei tengan napol ni hisit polien xil ak.” Luk 8:1
44 Ma Iesu be metimal xil na Siu xil e dit bithiten longeongen hos na Hi e nim te pispisien nae xil. Mat 4:23

4:2: Hib 4:15

4:6: Mat 28:18

4:12: 1Kor 10:9

4:13: Hib 4:15

4:19: Aes 58:6

4:22: Luk 3:23; Sion 6:42

4:23: Mat 4:13; Sion 2:12

4:24: Sion 4:44

4:25: Tem 5:17; 1King 16:1,7; 17:1; 18:1

*4:26: 1King 17:8-16 biteni xa tunau ak teke reitin xa Ilaetsa tehe provet tei na Hi e tetutou ni.

4:27: 2King 5:1-14 biteni xa Neman teke reitin e sepinien na Provet Elisa xa Hi ihur rati ra mesien nan.

4:31: Mat 4:13; Sion 2:12

4:32: Mat 7:28-29; Sion 7:46

4:33: Mat 8:29; Mak 1:23-24; 5:7; Luk 8:28

4:34: Luk 4:41; Sion 6:69

4:41: Mat 8:29; Mak 3:11; Luk 4:34; Mak 3:12

4:43: Luk 8:1

4:44: Mat 4:23