2
Temat Misak Pis Siob Vatei Mun
1 Vatei, e ut nesao, masxaxa xil lamei tengan lasoh rilomun pe met Iahova, e Temat mun be xil. 2 Ma Iahova misisi bit, “?Xouk onggo xave omei?”
Temat bit rilomun ni bit, “Nanggok, naba xor, e naborang nabe ut xil ngasen e ut etan.”
3 Ma Hi misisi bit, “?Xouk otepus Siob, moletin hos te polien navan? Moletin tovuol e ut etan di valong xat nou e vamal vaxoni xi. Xi di mot minou e di mingguxou kuhi ve sexien nan xil tengan napol ni ti neta nasa. Xouk otesis nou, ma namaenuk tengan opangei votei ni tang. E tave ti neta xa mak, xi di tamu nggusil sexien xil xa memese pe metok.”
4 E Temat bit rilomun ni mini bit, “Moletin tei minem usil tenben mili sein holesok sav xil nan. E xi mikila isa vuol ni xil tengan vameul. 5 E xosxa usasa utuxoli e upurun tenben, ma nakila xa taxeak tang, isuholuk pe metom.”
6 Ma Iahova biteni mi Temat bit, “!Bos tang! Namaen xi de hem, e onahasi ti tang namat.”
7 Di, Temat be reling Iahova e ba pol ni menuk xil xa tellep mistal ba xat tenbe Siob xil vus, nggo vatin nesao ba duxoh kaelen xalu e tan. 8 Ma Siob ba, e ba dotan de vul meas e rute xa di ladin tisok xil en. Di, minggur mavulut neta tei xa mikan, e di misi papas menuk nan xil ni.
9 Di, atou nan bemei visali e biteni mini bit, “?Xouk di tamu onggur xat sexien hos nam xil? !Bos mak mu tengan usuhol Hi tang e umat!”
10 E Siob bit rilomun ni mini bit, “!Xouk di osepin nggoni atou tei xa mitalang! Xir raleh holesok xil xa bos ra he Hi. ?E midep? ?Rasakras raleh holesok xil mun xa misa?” E tave ti neta xa longpangasien na Siob nggeih pupu, xi tenavit ti neta vasa vaha ni Hi.
Timue Tol na Siob Latomei Tengan Latsa Esaeen Natel Mini e Siob Miseputut ve Longpangasien Nan
11 Melele xa longeongen usil longpangasien na Siob mikapis e rute xil vus, timue nan tol latelongeong ni. Hiseatel be Elivas tahal Teman, Bildat tahal Suah, e Sofar tahal Namah. Melele xa latlongeong ni, latomei vituei e latepol ni nenemien natel tengan ha latsa esaeen natel mini e latopet rat nenemien nan ni sepinien natel. 12 Melele xa mei latodi tamu sotin, latopus Siob e lattapus kil ti. E melele xa latomei sung sangas, latpus kila e latlonge misa tova tang ve timue natel. Ma latodang ven nggeih, latdal papas eising natel, e latso vul meas be nesao e mikiri ba xat vatiatel. 13 Ba latdi kat visali melengien lu e he sav (7). Ladit votei tang e latave relingi ti vengan latpusi xa longpangasien xa Siob mingguri eilep pupu.