Seremaea
1
Iahova Mikes Seremaea Mei Be Provet Nan
Seremaea 1:1-10, 17-19; 17:5-10; 20:5
Sepinien xil xa ladi e vanuvei ak be na Seremaea. Xi tehe nat Hilkia xa tehe pris tei xa di tepol e taon tahal Anatot xa de tan na vatimol xa mahulong na Bensamin. Melele xa suv toto Sosaea, nat Amon, telaxat mol-Sudah xil huram tol e le (13),* Iahova tesepin rohon mi Seremaea. E Hi di tesepin mini e huram xil vus xa Sehoiakim, nat Sosaea, tehe suv toto e telaxat mol-Sudah xil. Reitin, Iahova di tesepin mi Seremaea tetuxoh melele xa suv toto Sedekaea, nat Sosaea, telaxat mol-Sudah xil huram tei e le (11). E aveti xa tehe lim e huram nen ak, mol-Babilon xil mei latehas tan ni mol-Sudah xil. Latetal xat xil e lateleh vuol ni xil latehe Babilon.
Iahova temei tehiteni minou tehit,
“Seremaea, diamu ni ngan xa natepol ni xouk e vang ninom, natekil kuh xouk ngamu.
Io, diamu ni ngan xa latepesuk, inou natehosei xouk ngamu.
Natehosei xouk tengan mei uhe provet tei navan mi moletin xil te kantri sav xil.”
E nabit rilomun ni mini nabit, “!O Iahova xa obe Hi Reitin! Inou natakil kuh ti sexien te sepinien vengan nabe huram maxoe tei tang.”
E Iahova biteni minou bitene, “Onahiteni ti onahit obe huram maxoe tang. Ha uhe visal moletin xil vus xa nasil xouk tengan ha uhit holesok xil vus xa nasemae ni minuk tengan uhiteni mi xil. Ulum nakan ni xil ti, vengan xa inou, nihusil xatuk e nisikoe xol xouk. Inou, Iahova iaxa di nasepin xiak.”
Di, Iahova tesasa temei etan e mei tetuxoh vulongok e tehiteni tehit,
“Taxeak, naling sepinien navan xil be vulongom.
10 ?Olonge? Taxeak, nabosei xouk tengan uhur xeihen
e ha uhit rat naha xa istal mi moletin xil e kantri xil.
Xosxa uhit nihur rat suv toto te kantri tei e nihas tan ni moletin nan xil,
ma nipol ni.
Xosxa uhit nihu len rute tei e niling moletin sav tei mei ilaxati,
ma nipol ni.
E xosxa uhit nipet rilomun ni kantri tei e nilih rilomun ni naho sae xil,
ma nipol ni mun.
 
17 “!Seremaea, utamea, uvue xatuk e uha! Ha usoh e uhit rat holesok xil vus xa nisemae ni tengan uhiteni. Taxeak, ulum nakan ni moletin xil ti. Vengan xa xosxa ulum mikan taxeak, ma nisak ni xouk ulum ikan pilei sung ni nou pe met xil. 18-19 Seremaea, uteong kuhi ni nou. Moletin xil vus te kantri ak livae itelak: suv toto xil tahal Sudah, eilep nae xil, pris nae xil, itel moletin xil vus mun. E xil lisakras lavas tan ni xouk vengan xa inou nisikoe xolok. Taxeak, di nasa xeihen minuk tengan umei uxoni vioh te xeih tei xa mikapis xol taon tei. Io, umei uxoni pos e ri nim xa nggeih xa lapol ni ni aean. Inou niteh meulien e xouk. Inou, Iahova iaxa di nasepin xiak.”

*1:2:

1:3: