1 Melengien vahis mei mitavi, Hi bit vasak pis Ebraham. Ma mikesi bit, “!Ebraham!”

E Ebraham bit rilomun ni bit, “!O-o, inou iaxale!”

2 Hi biteni mini bit, “Uhur horamue nam xati Aesak, xa eheien nam di en, e utela mulihe tan tahal Moraiah. E rute ak, e vathu tei xa nipisen ni minuk, uhasi e utin ni ihe sanien tei nam minou.”

3 Ma di, melele xa ut milan, Ebraham mikamet dongki san e misak mesen ni. Di, nggur Aesak del moletin te polien nan lu, mileh viton ap, e misak mesen holesok xil. Latsak mesen ni bus, latobe rute xa Hi tehiteni mini. 4 Latkakao ba vuma ... e melengien tol nen, Ebraham pus rute xa Hi tehiteni mini xa be sotin vuteili tamu. 5 Melele xa pusi mak, biteni mi moletin te polien nan xalu bit, “Multi tak itel dongki ak. Horamue xai ihe xamel malihe rute xa da iaxor, e ha malimot mi Hi. Ti, malitilomun malimei visal xamil.”

6 Ebraham miling ap te sanien de vatuvu Aesak tengan vapoe, e xi po tiei del vatupang. Melele xa di luka vituei luba, 7 Aesak mikes tamen bit, “!Tata!”

Ma tamen bit, “?Natuxoli, naha?”

Aesak misisi bit, “Ap del vatupang xiak. ?E sipsip xa raltin ni ihe sanien ievi?”

8 Ebraham bit, “E rin te sipsip te sanien, Hi iaxa ipus rin ak.” Ma xalu luka vituei luba.

9 Melele xa luduxoh rute xa Hi tehiteni mini, Ebraham mileh hat xil, pol ni hor te sanien ni e miso ap ba xati. Di, bar xat horamue nan e milingi por xat ap xil ak. 10 Di, milihi rat tiei nan tengan vata xoteh hiraen. 11 E vat takes, masxaxa na Iahova mikesi nggo ut nesao bit, “!Ebraham, Ebraham!”

E xi bit rilomun ni bit, “!O-o, inou iaxale!”

12 “Onahas vin horamue nam ti. Onapol ni ti neta naxuia. Taxeak, nakila xa xouk di ulum mikan ni Hi del merereen e di oteong xati, vengan xa xouk otnakenin horamue nam ti mi Hi, horamue nam xati xa be tei takes.”

13 Ebraham miketeh e pus nani tei xa be vuran xa be malohos, hon minggon de vanut holiei xil. Misak ni, milal rat ao ra Aesak e ba po nani mei minggoles horamue nan. Di, da xoteh hiraen e din ni sung be sanien eo nan ba mi Hi. 14 Ebraham miling his rute ak be 'Iahova Saerah' xa koute teni be 'Iahova ipus rin ak'. E sepinien ak, moletin xil di labiteni duxoh xosali labit, “E vathu na Iahova, xi vari ipus rin ak.”

15 Di, masxaxa na Iahova misepin mi Ebraham nggo ut nesao vatei mun bit, 16 “Hi biteni mak: E hisok xa nabe Iahova, nipol ni hitxatien itel xouk vengan xa xouk otnakenin horamue nam ti ra nou, horamue nam xati xa be tei takes. 17 Ve rin ak, reitin li, nabit xati xa nituxol xatuk ihe eilep. Nipol ni vatimol nam xil xa listal lixo xouk lihe holu xa lihe holu pupu. Xil lixoni hitu xil te tilang hat e lixoni suhon xil te tas. Nam xil lihas vuol ni elu nae xil e lihur sein tan nae. 18 Vatimol nam xil lihe suse te tuxolxatien navan iha mi vanut moletin xil vus te ut etan. Ngan ak ihe sanien navan minuk vengan xa otelong xat nou.” 19 Ebraham xal horamue nan ludilomun lube visal moletin te polien nan xalu. E latdilomun latbe tim satel e Bersiba. E lateti e rute ak huram holu.

Melele xa huram na Serah tetuxoh handred tei hanutap tei e lu e he sav mun (127), xi temat. Ebraham tetesi e tehit ha vatihin ni e tesakras vengan xa tan xati nan tehe tovuol tamu. Tesak ni, texal rat tan tei xa vangihat teta en ra moletin tei te rute ak. Di, tepo tiei na atou nan ba telingi teta en.

Huram tol mei tetavi, e melele xa huram nan Aesak tetuxoh hanutap lu (40), xi tetali sung tetel atou tei tahal Haran, hisen Rebekah. Xi tehe atuli na Betuel xa be nat Nahor, tuneli Ebraham. Tave nousav ti, avu Ebraham temat e horamue nan xalu, Aesak xal Ismael, lutepo tiei nan ba lutelingi tete vangihat tetel tiei na atou nan. Melele xa Ebraham temat, huram nan tetuxoh handred tei, hanutap tol e le tei mun bus (175).