2 Timoti
Sepinien xa diamu te 2 Timoti
Visi tetis uvei ak?
Pol tetis sepinien ak e huram xa tehe sangas ni 67 AD xa tehe sepinien kor nan. Melele xa tetis sepinien tetiamu teha mi Timoti xal Taetas, di tesao ni vanut Kristin xil e taon holu. E melele xa tehe Rom, latetel xati e lateso ni tehe nim te xeih (1:8,16). Xi telonge tesa, e neta sav xa temak, neketen nan di tamu texeih (1:12). Misak ni, tetis uvei tei mun teha mi Timoti tehit imei isao ni vatei mun. Ti, xi iha imat sung e he mol-Rom xil (4:9-13).
Visi iaxa tevuli uvei ak tetiamu?
Pol tetis uvei ak teha mi Timoti (1:2), e en tehei ngan xil te sias tahal Efeses mun lilonge (4:22). Sepinien xa Diamu te 1 Timoti di bit kila xa Timoti tehe visi.
Pol tetis uvei ak veneh?
Pol en tehei vapus rilomun ni Timoti - Pol tekila xa navehi ti lihasi imat (4:6-8), misak ni bit vapus rilomun ni Timoti, iti, imat sung e he mol-Rom xil (1:4; 4:9,21).
Pol en tehei vasel xat Timoti ve melele xil xa nggeih di bemei - Pol tepus kila xa melele xil xa nggeih di bemei, misak ni en tehei tengan Kristin xil lisoh ixeih e neketen nae (1:8; 2:3).
Pol en tehei vasel xat Timoti tengan vaxuxou kuhi ve pispisien nan xil - Pol tesis Timoti tengan vaxuxou kuhi ve pispisien nan melele xa di misetu ni sepinien na Hi (1:14), e itit ni ngan xa ti ihit rat longeongen hos na Hi mi moletin xil (3:14; 4:2).
Pol en tehei vasel xat Timoti vatei mun usil moletin xil te luvosen - Moletin xil te luvosen lateti tamu visal Timoti, ma Pol tesel xat rilomun ni tengan nahusil xat xil ti e nangor ti natel xil (2:16-26).
Vatit nenemien tei te uvei ak de 2 Timoti 2:15
Mak ma, xouk, Timoti, upol imal melele xa di opispisi ni sepinien te reitinen na Hi mi moletin xil. Mak ma, ukila usoh ixeih pe met Hi ixoni moletin te polien tei xa tave unoun ti ni polien nan.
Vatit nenemien tei mun te uvei ak de 2 Timoti 3:16-17
Sepinien xil vus xa di Vanuvei Eo, nenemien xil vus teni nggo Hi. Sepinien xil ak bos te pispisien, te selxatien, te sepkilaen usil suse xa momal, e te pispisi mi moletin xil tengan linapol ni ti mun sexien xil xa misa. Nggo sexien xil ak, Vanuvei Eo di misak xat moletin xil na Hi tengan likila lipol vuol ni polien hos xil vus.
Naha de uvei ak?
1. Pispisien xil usil ngan xil xa di langgur polien na Hi (1:1-2:26)
2. Selxatien ba mi Kristin xil tengan lisoh ixeih ve melele xil xa nggeih di bemei (3:1-4:22)
1
Inou Pol iaxa nadis uvei ak. Inou nabe eloheoh tei na Iesu Kristo nggusil nenemien na Hi xa bit xati xa isa meulien sal mi ngan xil xa di laling neketen nae e Iesu Kristo.
Nadis minuk Timoti xa onggoni natuxuli hos tei. Nasis tengan eheien, esaeen, e tomat na Hi Tamer e na Iesu Kristo xa be Suv nar iti e meulien nam.
Pol Misel Xat Timoti tengan Ital Xat Kuh Polien xa Hi Misa ni Mini
Timoti, e vongien e melengien, ieok di tabovorong ni xouk ti e sisen xil navan e di names Hi ve xouk. Hi ak iaxa di nanggusil xati, nggoni ngan xa avu navan xil tetiamu di latepol ni, e nakila namusil xati nggo sexien xa nakila nabit momal pe meten. Nanem xat simetom xa temereh melele xa rutetasil, e ieok bei tengan nipusuk rilomun e isak ni nou nipolu ni sien. Nanem xat neketen hos nam xa be reitin. Neketen ak nggoni neketen hos na avu nam Loes e na ninom Iunis. E nakila xa de xouk mun. Ve rin ak nasel xatuk tengan utit ni ti upol itel sanien xa Hi tesa ni minuk melele xa natetuxol xatuk. Sanien ak nggoni upang na Hi e meulien nam e bos xa uhui xati tengan ileluv mei ihe eilep mu. Upol ixeih vengan Ninin Eo xa Hi tesa ni mi xir misak ni ulixir takan ti. Ninin Eo nan pol ni xir rapol vituei del xeihen nan, tengan eheien nar iti e mosav e mikila raxuxou kuhi ve sexien nar xil.
Mak ma, onahe unoun ti tengan ovit rat sepinien xil usil Iesu xa be Suv nar. E onahe unoun ni nou ti mun xa nade nim te xeih vengan inou nabe moletin na Iesu. !E-e! Itel xeihen xa Hi misa ni minuk, xouk mun uhusil suse te longpangasien ixoni nou ve longeongon hos usil Iesu. Hi mileh rerat xir ra tesaen e misa meulien hu mi xir. Xi mikes xir tengan mei rave moletin nan, e tave ti ve naha xa xir di rapol ni. !E-e! Xi pol ni mak nggusil nenemien nan e ve eheien hos nan mi xir. Tetiamu ni melele xa Hi tepeas ni ut etan, xi tehit xati xa xi isa Iesu mei ihe suse tengan isak ni eheien hos nan mei istal mi xir. 10 E xosali, hitxatien nan mei mistal be reitin e melele xa Iesu Kristo temei e ut etan e teteh meulien e xir. Xi bas tan ni xeihen te maten, e longeongen hos teni pisen suse te meulien hu mi xir.
11 Ma vengan Hi ien bei tengan longeongen hos ak ihe ut xil vus, xi tehosei nou mei nabe eloheoh nan tengan nihit rati mi moletin xil vus e nipispisi ni reitinen nan mi xil. 12 Ma ve rin ak, iaxa inou di nalong pangas nou ven e nim te xeih ak. Inou natanexo ti vengan nakil kuh ngan xa inou naling nenesien navan da en. E nakil kuhi xa xi nggur xeihen pipin tengan isikoe xol naha xa xi milingi e heok tengan ti nipol ni ituxoh melele Iesu itilomun en. 13 Xouk mun utal xat kuh sepinien te reitinen xa natepisisi ni minuk ngamu. Holesok xil xa otepus nou natepol ni e otelong nou natehiteni, xouk mun upol ni. E utal xat sexien xil te neketen e eheien ixoni ngan xil xa di langgusil xat Iesu Kristo. 14 Longeongen hos xa ongguri be neta ngan xa bos pupu. Misak ni, uketeh xole e uxuxou ven ihos itel tutouen na Ninin Eo xa de xir.
15 Xouk otelong kila xa tua navan xil e provins tahal Esia, nggoni Fukelas xal Hemonggenes, xil vus latetasil reling nou ngamu. 16 Onesiforas, xi kestang bemei visal nou e melele nen xil ak, e di pet rat nenemien navan. Nasis Hi tengan isa hosien mini itel ngenen xil vengan xa xi tave unoun ti tengan mei vasao ni nou e nim te xeih ak. 17 Io, melele xa tetuxoh taon xa eilep tahal Rom xi telang ni nou ba vuma tekamet rute xa inou nada en. 18 E melele sav mun xa di natepol e taon tahal Efeses, xouk okil kuhi mak xa xi tetutou ni nou tehe holu. Misak ni, di nasis tengan Suv Iesu ipisen esaeen mini e melele xa xi imei rilomun en e ilepis moletin xil.