Galatians
Leta
Paul Mo Ulia Isana Mara
Galatia
Leta Nike
Na rani tiroma leta nike mo vano isana kalesia hin jara atu Galatia, Paul mo lo verea mo memera isara moiso vara enia mo silera hin Retir̃uhu tataholo atu sei Iesu mo lo silea isana tiroma. Retir̃uhu sei hasena, enia hina varar̃uhu (1.1–10). Haranike enia hina aulu matan te tamlohi la lo verea vara reti non Paul mo halu na Retir̃uhu non God matan enia tamlohi halu.
Paul enia vahar̃ule varar̃uhu non Iesu. Iesu mo r̃ulea isana tamlohi la sopo levosahi God. Patu tamlohi na vao kalesia matan Jerusalem la lo avulahi hin Paul peresi na nona Retir̃uhu (1.18–2.10). Paul mo reti isan Peter na rani matea Antioch, matan mo vaileji na vujangi non Retir̃uhu, matan mo lo tametame na tavtavuin Israel la lo toho peresia (2.1–18).
Paul mo vujangia vara rasua hin Kr̃isto, enia hasena malele tataholo vara tamlohi la lavi na mauri mo materi hinia. Enia malele sei God mo silea isan Abraham tuai (3.1–4.31).
‘Matan hin leu atu na lo usuria, na mate matan leu atu, matan vara a pa mauri hin God, enau na mate peresi Kr̃isto na nona talopeilopei. Nake mo sopo enau sei na lo mauri, pani Kr̃isto enia mo lo mauri hiniau.’ (2.19–20)
Hin Puku Nike
1. Vahar̃ule Varar̃uhu, Retir̃uhu Varar̃uhu (1.1–10)
2. God mo vir̃oni Paul vara i nona vahar̃ule (1.11–24)
3. Paul mo mele tahe na Retir̃uhu (2.1–21)
4. Rasua enia malele varar̃uhu mata tamlohi la juri (3.1–4.31)
5. Tanumen God mo rever̃a na opoia (5.1–6.10)
6. Isoiso retireti (6.11–18)
1
Retireti Tiroma Non Paul Isara
Leta nike, enau Paul na ulia, enau vahar̃ule matea, pani mo sopo na r̃omr̃omi tamlohi teni tea la vir̃oniau vara a vahar̃ule, mo vono. Iesu Kr̃isto hasena peresi God Tama la toviau, God sei mo lo sauteterahi Iesu na mateia.
Ale la vorai nike peresiau, kama sohai na nomam retioloolo isamim kamim vao kalesia na jara tari Galatia. Na lo usiusi vara God Tamar̃a enia Moli Iesu Kr̃isto vara la sile na nora r̃omr̃uhu peresi na nora tamata isamim. Iesu mo hase silea vara i mate mata nor̃a hehe vara i jurir̃a r̃a materi na suihan sasati na varama nake, usuri na masalon nor̃a God Tamar̃a, hasohaso tavera enia nona, mata rani tui tui tarea. Amen.
Retir̃uhu Enia Matelete
Na mar̃urahi jea, matan vila r̃uhu purongo, ka rovo isan haratu mo tovi kamim na nona r̃omr̃uhu non Kr̃isto, ale ka lo posi vano na retir̃uhu tinapua, mo sopo mele te retir̃uhu tinapua, pani na levosahia vara tamlohi hai la vai na r̃omimim la lo kaka. La opoia vara la vai na retir̃uhu non Kr̃isto i mele tinapua.
Pani vara kamam teni te angelo na tuka i lo retivujavujangi na retir̃uhu matea mo sopo tataholo hin haratu kama lo retivujavujangi kamim hinia moiso, talai tavera non God i pa toho isana. Sohena kama pete verea tiroma moiso, ale na mele verea vara, tea mo lo retivujavujangi na retir̃uhu tinapua isamim, ale mo sopo na retir̃uhu sei ka lavia tiroma moiso, talai tavera non God i pa toho isana.
10 Ka r̃om vara na lo reti sohena matan vara tamlohi, teni God la avulahi hiniau matana? Teni ka hitea vara na lo vaihitea vara a vai na tamlohi la avulahi hiniau? Vara a lo vaihitea vara a vai na tamlohi la avulahi hiniau, i pa vujangia vara enau na sopo slev varar̃uhu matea non Kr̃isto.
Vujangi Non Paul Mo Tai Isan Kr̃isto
11 La vorai peresi na vevorai, na opoia vara ha levosahia vara Retir̃uhu atu na lo retivujavujangi hinia, enia mo sopo tai isana tamlohi. 12 Matan na sopo lavia isan te tamlohi teni tea mo sopo vujangiau hinia, pani na lavia matan Iesu Kr̃isto mo vujangia isaku.
13 Matan ka rongoa moiso, vara mauriku mo sohena sava tiroma, na lo usuri na posposi rasua nona Jew. Ale sohena sava hin pongi atu na lo tipahi r̃ilangi na vao kalesia non God, ale na vaihitea vara a komora. 14 Hin pongi atu, na lo sahe aulu jea na posposi rasua nona Jew, mo jeu na tamlohi tinapua la tautauniku na tahisamam, matan na lo turu r̃ilangi na posposi nona tamamam.
15 Pani na rani na sopo lo vora, God mo tapuhiau moiso, ale mo toviau na nona r̃omr̃uhu, 16 ale enia mo avulahi vara i vujangi Natuna isaku, matan vara a pa retivujavujangi Iesu isana tamlohi r̃or̃oha. Ale na sopo vano vahatea vara a usi rongorongoa isan tea, 17 teni vara a sahe Jerusalem isan la haratu la vahar̃ule tiroma hiniau, pani na vano Arabia, moiso na mele mai Damascus.
18 Ale tauni mo tolu la vano moiso na sahe Jerusalem vara a hite Peter, ale na lo toho isana mata rani mo sangavulu r̃omana mo lima (15).
19 Hin rani atu, na sopo hite te vahar̃ule tinapua, pani James purongo, tasin nor̃a Moli. 20 La hinau sei na lo ulia isamim na nahon God na sopo halu hinira.
21 Moiso na vano na lolon la jara tavera sei mo rua, Syria enia Cilicia. 22 Hin rani atu, vao kalesia hin Kr̃isto la lo toho na vao kalesia tari Judea, la sopo lo levosahiau i r̃uhu. 23 Pani la lo rongo purongoi na sorasora la lo verea lara, “Tamlohi nike natu, tiroma mo lo tipahir̃a, pani nake mo lo retivujavujangi pa rasua sei, tiroma mo vaihitea vara i komoa.” 24 Matan hinau atu, la lo sile na hasohaso tavera isan God mataku.