13
Selkatien keke rovalong kat hetetamen keil veni Ahi varei ling keil en vulie
Mal keke meatin vasi keil onen Ahi ilong kat hetetamen keil ten kavmen, veni Ahi maen hetetamen vasi keil akur keihoen one ka kei varei ling keil amul en vulie. Taet 3:1; Pro 8:15; Sion 19:11 Meatin koa sesein hiasuvien onen hetetamen keil mul sesein asa koa Ahi ling kati. Ka koakeil amumoni amul aleh mahien en keil sase eris. Veni koakeil amumon sakien keil tetahos asakras avametaun hetetamen keil ten kavmen. Vi koakeil enges koa amumon sakien tatisa keil koa ametaun keil. Sakini, munak emi rovattei mivametaun hetetamen keil enek, mihoumon asa koa hetahos. Hesakini, keil ilele hetahos en kami. 1Pit 2:13-14; 3:13 Veni Ahi ling hetetamen keil ten kavmen avahi meatin keil toumien onen vakataun kami. Ka munak mimum tisa, mal keke mihemetaun keil, veni keihoen koa Ahi lingi en he keke avasan mahien min meatin keil one vi anatin. Anatin, keil amum musil rendemien onen Ahi ka amul asan mahien min koakeil amum tisa. Rom 12:19 Veni koanek anatin, mal keke mihelong kat hetetamen keil ekek ten kavmen, roviteis veni mimetaun mahien koa akilea avasani, ka veni mikilea emun keke sakien enek mal en meten Ahi.
Sakini, mal keke mihehul takis keil onami min hetetamen keil veni amul amumon umen one suval koa avi meatin toumien keil onen Ahi. Anatin, mihehul vasin asa koa mal keke avakuri. Mihehul takis min hetetamen keil teni, ka mihehul takis ten tounah koa meatin sav avuli ran kami min hetetamen keil teni. Ka mihetie lat houhouen min keil vasi. Mat 22:21; Mak 12:17; Luk 20:25
Selkatien keke meatin keil onen Ahi um housil sakien ten envatien
Mihehul vasin asa koa mal ka minoumontei kaon en meatin sav keil. Kaon tanges koa mal keke hel lisenges, sakien koa mirie lat envatien min kami eris. Veni munak mirie lat sakien ten envatien min meatin sav keil, suval mimul milong kat mengkatien vasi keil onen Ahi. Kal 5:14; 1Tim 1:5 Mengkatien keil onen Ahi asuval koanek: “minakurtei ahin vuo meatin onen hanu sav, minouastei meatin namat, minahenantei tounah onen meatin sav, ka envatien onami nalentei tounah onen meatin sav.” Eksodas 20:13-17 Dut 5:17-19,21; Mat 19:18 Ka mengkatien savsav vasi keil emun amul en mengkatien tas ekek koa vit, “Envatien onom hel en meatin sav keil hesuval koa keik em vat keik eris.” Levitikas 19:18 Mat 5:43; 19:19; 22:39; Mak 12:31; Luk 10:27; Kal 5:14; Tiem 2:8 10 Munak emi vat meatin sav keil, misakras mivoumon tounah vatisa min keil. Sakini, envatien vi sise koa mikilea mivalong kat vasin mengkatien keil koa Ahi sani. Mat 22:40
11 Anatin, mihousil sakien ten envatien veni avong koa Ahi houtut ir mai vesesal. Sakini, mihele ran matilien onami veni mikilea keke, kosa, avong koa Ahi houtut ir vesesal imok en avong koa rokur rohtoh en demkatien orer. Efes 5:14; 1Tes 5:6-7 12 Anatin, vongien koa taveah vesesal vavus ka meneai mul mai ke. Sakini, rehelokovein sakien keil ten mankoli, ka rehesin en ir en sakien tetahos keil ten meneai suval koa avi eisin tavaeen orer. 1Sion 2:8; Efes 5:11 13 Rehelekat revi en sakien keil orer keke amal vinvin ven meatin keil koa amul amual en meneai. Ronoumontei ale keil tatisaso vuo ronamunmuntei, ronoumontei natisa natal min hanu sav koa rortetalihetei vatal mini, vuo ronoumontei sakien koa tisa en aver, ka ronaseltei vuo ronahi elutei en meatin sav keil. Luk 21:34; Efes 5:18 14 Ka hetahos imok keke mihekur suvalien onen Asuv Iesu Kristo, ka minamaentei mun sakien tisa keil ka envatien keil ten out netan analeh rendemien onami. Kal 3:27

13:1: Taet 3:1; Pro 8:15; Sion 19:11

13:3: 1Pit 2:13-14; 3:13

13:4: Rom 12:19

13:7: Mat 22:21; Mak 12:17; Luk 20:25

13:8: Kal 5:14; 1Tim 1:5

13:9: Dut 5:17-19,21; Mat 19:18

13:9: Mat 5:43; 19:19; 22:39; Mak 12:31; Luk 10:27; Kal 5:14; Tiem 2:8

13:10: Mat 22:40

13:11: Efes 5:14; 1Tes 5:6-7

13:12: 1Sion 2:8; Efes 5:11

13:13: Luk 21:34; Efes 5:18

13:14: Kal 3:27