98
Iahova vi asuv houlu ten out netan
!Mihesau en souen hau tai min Iahova!
!Kei mumon tounah keil koa atahos imok!
Kei sasen vitan en vativieh keil onen
ral min keihoen ka hivotutien onen.
Iahova rie lati keke keihoen onen mulin teisav keil
ka vothot eni keke mul vae en usite onen meatin keil onen keke voutut keil en meten meatin vasi keil ten out netan.
Kei en rovobongentei vatie lat envatien onen min me-Isrel keil,
ka lisenges kei mum vasin hatkatien keil onen.
Meatin keil ten out vasi netan alesi
mukave keihoen onen Ahi orer mulin teisav keil.
 
Meatin vasi keil ten out netan, mihesau hetal min sien heha min Iahova.
Mihemakul en sien ka mihemasmas Ahi hetal min souen keil.
Mihouas kitar ka mihesau min Iahova,
mihemasmasi hetal min souen keil.
Mihouh amaru ka mihemakul en sien,
mihoumoni heha min Iahova koa vi asuv houlu orer.
 
Atas ka tounah vasi keil koa amul ien, amakul en masmasien min Ahi.
Out netan ka tounah vasi keil koa amoul ien, amusau mini.
Oai mul mue en sien min Ahi
ka eang en vatihou keil mul muhuh en souen keil.
Tounah vasi keil enek asi keil
veni Iahova mul mai keke vahi asuv houlu ten out netan.
Ahi helosil kat revi tounah vasi keil ten out netan,
ka helei rahit usite one en sakien ten maluen ka anatinien.