14
Me-Isrel keil aseseini keke avaha avakur atan koa Ahi vat kati min keil
Namba 14:1-10
En vongien enek, me-Isrel keil alonge tisa houlu ka amul amuai. Keil asel kutut kat Mosis ka Eron avit, “Tahos imok munak komai mevamatmat en out Isip vuo en out volvol ekek. ?Vensa Iahova vit vakur ir rovaha en atan ekek? U vinvini ir ka ikur ahin keil orer ka titiali keil emun. Vahit vatahos imok keke rovaha ris en out Isip.” Sakini, aviteni min keil eris avit, “!Rovatie lat etai meatin hemai hehi hetetamen orer ka reheha ris Isip!”
Navong Mosis keilu Eron lulonge, luva netan min Iahova en meten me-Isrel keil. Ka elu en koakeil ales out Kenan: Sosua koa natin Nan, keilu Kelep koa natin Sepuneh, keilu lulonge tisa ka lurali vas eisin omealu. Ka luviteni min meatin keil luvit, “!Atan koa komai melesi tahos imok! Munak Iahova hesi ven ir, kei hekur ir reheha en more atan enek, atan koa tahos imok ka amas mul ien. Minahilestei eisilumi ran Iahova Hib 3:16 ka minametauntei meatin keil koa amul en out enek. Ahi hesakin ir rehouas keil hemae enges veni ro ral min ir ka kulat tounah koa ring koe keil tuai. Anatin, minametautei.” 10 Meatin vasi keil en out enek amul avit avov keitel telvamat. Ka hatte tas, muohien onen Ahi kistal en Eim Tavolin onen en mete.
 
Ahi san mahien min me-Isrel keil vit ual tetoun sua hehi hanumau elu (40)
Namba 14:26-35
26 Iahova viteni min Mosis ka Eron vit, 27 “?Meatin keil ekek isel kutut kat nau hetokol nengeis? !Inau naraengon selkututien keil one vinvin! 28 Milhehit mesein selusien enek min keil milhehit, ‘Navat kati hehi anatin, tounah vasi koa tisa koa lises mimul mivit namumoni min kami, kei varei numoni hemai hehi anatin. Inau Iahova naselus. 29 Kami vasi mihematmat ka teiai keil onami il retai en out volvol ekek. Hib 3:17 Anatin, kami koa misel kutut kat nau, koa sua onami mulin hanumau (20), 30 mihervatei mun en atan en out enek. Anatin keke navat kati nisani min kami, ka mihervatei ien. Kelep enges keilu Sosua luheha en out enek. 31 Kami mivit meatin keil ten out enek ihuli kat titiali onami keil. Ka inau nikur titiali onami keil iha keke umon teim se en atan koa kami milei seseini. 32 Ka kami, mihematmat en out volvol ekek. 33 Titami keil iles ual tetoun en out volvol ekek sua hehi hanumau elu (40). Umen 7:36 Ka ven mirvitei anatin minau, keil ilong mahien hetokol avong koa kami vasi mihematmat. 34 Mihean hei tisaen onami sua hehi hanumau elu (40), sua tai ten avong keil koa avi hanumau elu (40) koa meatin onom keil alei vasin out enek. Miheilea inau suk ka vati vurohien onak. 35 Navat kati keih keke numon tounah ekek min kami, meatin tisa keil koa mimai en rendemien tas va kat inau. Sakini, en out volvol ekek, kami vasi mihematmat. Anatin eli, inau Iahova namul naselus.’ ”
36 Evus, koakeil Mosis rie lat keil keke avaha avalei suain atan enek, koakeil vasi umai ris ka asan selusien tisa va kat atan enek, 37 Sakini, Ahi sakin mari mesaien tai mai ka muas keil umat. 38 Ka, en meatin taleisuaien keil koa uva en atan enek, Sosua (natin Nun) keilu Kelep (natin Sepuneh) enges lumoul.
39 Navong Mosis vit mesein selusien onen Iahova min me-Isrel keil, keil vasi amurang ka amurang. 40 Sakini, out mulan, keil amemea ka asak mesein keil keke avaha avakur atan ten out Kenan, out koa hou keil amul ien. Uva mau ales Mosis ka aviteni mini avit, “Komai melei kilea tisaen onomai. Sakini, reheha rehekur atan koa Iahova vat kati min ir.”
41 Ka Mosis vit risi min keil vit, “?Vensa varei kami mimules mirali koteh mengkatien keil onen Ahi? !Misakras mivakur atan enek! 42 Minahatei, veni Iahova rorotei mun vatal min kami. Minamaen vativieh keil onami anu vini kami en vaeen. 43 En out enek, mihehisu min me-Amelek keil ka me-Kenan keil emun, ka keil isal vini kami hetal min naef tavaeen keil one. Keil umoni hemukok veni kami milokovein Iahova tuai. Sakini, kei emun lokovein kami.”
44 Ka avaseini keke Mosis viteni mukok, keil uva en hou keil ten out Kenan keke avakuri. Uva, avaseini keke Mosis ka Bokis ten Hatkatien Takeih onen Iahova lurmusiltei keil, lumules en out koa amumon tavolin keil ome eni. 45 Ka me-Amelek keil ka me-Kenan keil koa amul en hou keil ekek, umai uvae ral min keil ka amu lin me-Isrel keil. Anatin, keil alikat rasilin keil soutin va rokol out koa avise en Hormah.
 
Evus, me-Isrel keil koa amules aviles ka amusil Mosis ka Eron koa Iahova rie lat keilu keke luvahi avat one. Amusil keilu va vio … rokol avong aro en out volvol sua hanumau elu (40). Ka keil avisu en avong takeih keil houlu en ualien one.

14:9: Hib 3:16

14:29: Hib 3:17

14:33: Umen 7:36