Nehemaea
8
Esra vuli mengkatien keil onen Ahi min me-Isrel keil
Nehemaea 8:1-2,5-6,8-10,12-18
Navong me-Isrel keil aro semau en out kati one avati oulu (7) tuai, en avong koa tai ten avati koanek, meatin keil alah ruai en taon ten out Serusalem en out ten lahruaien vesesal en meteau ten vieh koa avise en Meteau ten Vulioai. Navong alah ruai evus, avis Esra koa vi tiser tai ten mengkatien|Tiser keil ten mengkatien onen Mosis keil onen Mosis keke helah tus ten mengkatien keil onen Mosis koa Iahova sani min me-Isrel keil ka hehuli min keil. Sakini Esra lahi mai ven meatin keil ekek: amo keil, atou keil, ehon keil ka atouli keil emun koa akilea tounah.
 
Esra mai mulomal en avet tai nesa, out koa meatin keil vasi akilea avalesi. Ka navong vue tus enek, keil amea amulomal. Evus, Esra viso keih min meatin keil enek vit, “!Mihemasmas Iahova, Ahi koa vi hetetamen imok!”
Ka meatin keil akukuvin he vina nesa ka avit kesi avit, “!Anatin! !Anatin eli!” Evus, uva netan min Iahova, aretengeiril ka nae vita rokol atan.
 
Evus, navong Esra mul vuli mengkatien keil onen Ahi en selusien ten Hibru, tei en pris keil avit leini min meatin keil en selusien ten Arameak ten out Babilon. Amumoni mukonek keke selusien teni vamai vailea revi en meatin keil koa akilea selusien ten Arameak.* Veni me-Isrel keil aro tuetin en kantri ten out Babilon, houlu en keil arkileatei mun selusien kati one koa vi Hibru, keil akilea en selusien ten Arameak enges.
Navong meatin keil along kilea asa koa mengkatien onen Ahi mul viteni, keil alonge tisa houlu ka amurang veni akilea keke armusiltei. Sakini, Nehemaea koa vi meatin ten kavmen, pris Esra koa vi tiser ten mengkatien keil onen Ahi, ka koakeil akistal en vatiamal onen Livae koa amul avisein meatin keil aviteni avit, “Kami, me-Isrel keil, minalongtei natisa ka minatangtei mun. Kosa vi avong votut onen Iahova, Ahi onami.”
10 Evus, Nehemaea viteni min keil vit, “Kosa, miheha ris teim sami, mihoumon ale tai. Ka mihesan tei anien ka uaen min koakeil anien ae rovinvintei. Mihoumoni hemukonek veni kosa vi avong votut onen Iahova, Ahi orer. Ven koanek, minalongtei mun natisa veni sien koa Iahova hesani min kami hesakin kami mihelomal hekeih, avaseini avong keil takeih imai.”
 
12 Sakini, meatin keil vasi uva ris teim se ka akanian revi ka amun hati uaen, ka hati anien ae tei, asani va min meatin sav keil. Me-Isrel keil alonge tahos veni, kosa, keil along kilea selusien onen Ahi koa avuli min keil.
13 En visokon, asuv keil ten mari vatiamal keil vasi onen me-Isrel keil, ral min pris keil ka koakeil akistal en vatiamal onen Livae, keil vasi umai ruai ven Esra, tiser ten mengkatien keil onen Ahi. Keil umai ris avalong vilei selusien koa mul en tus ten mengkatien keil onen Mosis. 14 Ka navong kei mul vuli tus koa Mosis mutisi min keil, avotini keke Iahova meng kat me-Isrel keil keke umon votevav keil ome mal en avong amumon mari ale tai en avati koa vi oulu (7) ten sua vasi. Lev 23:33-36,39-43; Dut 16:13-15 15 Navong keil alonge mukok, asuv keil ral min meatin sav keil koa umai, asan selusien va min meatin keil ten out Serusalem ka meteimal sav keil avit, “Ir rehoumon votevav keil housil mengkatien keil onen Mosis. Sakini, miheha en hou keil ekek ka mihelah ai keil en vatiai keil koa amukok: vati olip, vati mertal, vati maman, vati paen, vati vipi ka vatiai savsav keil koa ouai keil amul ien.”
16 Sakini, meatin keil along kati ka uva arei ai keil ka alah risi umai. Evus, keil amumon votevav keil ome en out vasi keil: nesa en hoi eim one koa vi aet, vuo neim en teahu one, vuo tei en meatin keil koa amumon ome vesesal ven Eim Votut onen Ahi. Ka koakeil koa mun, amumon ome en out ten lahruaien vesesal en Metareh ten Vulioai vuo en out ten lahruaien vesesal en Metareh onen Efrem. 17 Meatin keil vasi koa akistal ran hen me-Babilon keil ka umai akur ris atan kati ose, keil vasi amumon votevav keil ka aro ien. Avong Sosua, natin Nun, mulamun rohtoh en me-Isrel keil avakur atan koanek rokol avong enek, keil armusiltei mengkatien koanek. Sakini, asi keil houlu veni alei kilea esuk sise one.
18 Avong oulu (7), me-Isrel keil aro en votevav keil ome, ka en meneai vasi, alah ruai ka Esra vuli selusien ten tus ten mengkatien keil onen Mosis min keil. Ka en avong koa vi outel (8) en keil, umai out tas keke avoum ekor en ale enek vasuval koa mengkatien keil onen Mosis viteni.

*8:8: Veni me-Isrel keil aro tuetin en kantri ten out Babilon, houlu en keil arkileatei mun selusien kati one koa vi Hibru, keil akilea en selusien ten Arameak enges.

8:14: Lev 23:33-36,39-43; Dut 16:13-15