1 En avong tai, Farasi ka Satusi keil umai ven Iesu keke avasak visi. Sakini avisi voumon mari tounah tai avalesi vatie lati keke kei ka ven Ahi anatin.✡ Mat 19:3; 12:38; Luk 11:16; Sion 6:30; 1Kor 1:22

2 Ka Iesu vit kesi min keil vit, “Navong meteiai munu, kami mivit, ‘?Kolesi? Teilang vilhili. Mul rie lati keke an hetahos visuvong.’ 3 Ka navong out mulan, kami mivit, ‘Kosa, ous hous veni teilang vilhili ka mahmah keil houlu.’ Milei kilea en sakien ten an keil, ka misakras mivalei kilea asa koa mul kur out en avong kosa. 4 Kami meatin keil ten avong kosa, emi vati mivales etai merikel keke mivakur anatin enau eni. Anatin, emi vati mivalesi veni mikalkali ka milokovein Ahi suval ahin tai koa lokovein meatin kati onen keke vamaen kei min meatin sav. Ka nirmumon etai merikel mihelesi, tanges varei mihelesi koa hehi merikel onen provet Siona.”✡ Mat 12:39; Luk 11:29 Evus, Iesu lokovein keil, vut en vot ka va en out sav ral min onen keil.

5 Navong Iesu ka meatin keil onen arokol usi Mari Oai ten out Kaleli, meatin keil onen amundem kati keke e vobong avakur veret ae. 6 Ka navong amual uva, Iesu viteni min keil vit, “Mihelei kat revi kami ven ‘is’ onen Farasi ka Satusi keil.”✡ Luk 12:1

7 Navong alonge, amul aviteni min keil eris avit, “Kei mul selus min ir usil is veni rorkur etai veret vahi ar.”

8 Ka Iesu long kilea asa amul aselus usili, sakini va vis keil vit, “!Demkatien onami havivi ramat! ?Vensa mimul miselus min kami usil veret koa tovuol? 9 ?!Mirkileatei veah!? ?Emi vobongeni tuai keke navengan amo keil taosen elim (5000) en veret elim enges? ?Ka veiat ehis vilelau keke kami misieni?✡ Mat 14:13-21; Mak 6:34-44; Luk 9:11-17; Sion 6:1-13 10 ?Vuo mukave en avong navengan amo keil taosen ehat (4000) en veret oulu (7) enges? ?Veiat ehis vilelau mules koa kami misieni?✡ Mat 15:32-38; Mak 8:1-9 11 ?Sakini, vensa kami mirkileatei keke narselustei usil veret? Ka mihelei kat revi kami ven is onen Farasi ka Satusi keil.” 12 Sakini akilea suk keke rovitentei keke avalei kat revi keil ven is ten veret, ka ven hihiseien keil onen Farasi ka Satusi keil koa romaltei.* Hihiseien keil onen Farasi ka Satusi keil suval ‘is’ en usite koa amul akapil vituai hihiseien keil houlu koa romal revitei ral min selusien onen Ahi, ka hihiseien keil one mul rokol me-Isrel keil vasi.

13 Iesu ka meatin keil onen amual uva, akistal vesesal en taon ten out Sesaria-Pilipae. Ka en out enek, kei vis onen keil vit, “?Meatin keil aviteni keke inau, Natin Meatin,✡ Dan 7:13 navi isei?”

14 Ka avit kesi mini avit, “Meatin tei avit kovi Sion Baptis.✡ Mak 6:14-15; Luk 9:7-8 Ka teisav avit kovi provet Ilaetsa. Ka tateisav emun avit kovi provet Seremaea telamu vuo provet sav emun.”

15 Ka kei vis keil vit, “?Ka mukave en kami? ?Mivit inau navi isei varei?”

16 Ka Saemon Pita mea vit, “Keik kovi Mesaea. Anatin, kovi Natin Ahi koa moul.”✡ Mat 16:16; Mak 14:61

17 Ka Iesu viteni mini vit, “!Tokolkatien onen Ahi mul tuai enuk, Saemon natin Siona! Veni rovitei meatin keke vahothot enau minuk, ka Tata onak varei en out nesa mumoni.✡ Mat 17:5; Kal 1:15-16 18 Ka naviteni minuk keke kovi ‘Pita’ koa aneite teni vi ‘ahat.’✡ Sion 1:42; Efes 2:20 Ka en ahat koanek, numon Sios onak hel ien. Ka keihoen vasi ten matien sakras vamai vapuruni. 19 Nilingi en hem, ki keil ten hiasuvien onen Ahi. Sakini, asa koa koring koe en out netan, Ahi emun heting koe. Ka asa komaeni en out netan, Ahi emun hemaeni.”✡ Mat 18:18; Sion 20:23 20 Evus, Iesu vit koe min onen keil keih anahitentei min etai meatin keke kei vi Mesaea koa Ahi vat kati keke hesani hemai.✡ Mat 17:9; Mak 9:9

21 En avong enek eva, Iesu vit kilea min meatin keil onen keke kei heha en out Serusalem. Ka navong itokol Serusalem, kei hekur mahien hehi houlu en hen elda keil, asuv keil onen pris keil, ka tiser keil ten mengkatien onen Mosis. Kei vit meseini min keil keke uasi hemat, ka en avong hetel, kei hemoul eris ran matien.

22 Navong Iesu viteni mukok, Pita kur seheni havivi ka selus keih mini vit, “!Asuv, konaselustei namukonek! !Tounah enek sakras vakistal enuk!”

23 Ka Iesu viles, les Pita ka viteni mini vit, “!Komusil rendemien onen Temat, kiha ranau! Komul kosak visi keke kovoumonau masavoi en sise onak veni komusil rendemien onen meatin keil ten out netan enges, ka kormusiltei rendemien onen Ahi.”

24 Evus, Iesu viteni min meatin keil onen vit, “Munak meatin etai en vati vousil nau, kei hesesein moulien onen, hehous aiveave onen, ka housil kat nau.✡ Mat 10:38; Luk 14:27 25 Veni meatin koa en vati vahuli kat moulien onen, moulien enek hevuol rani. Ka munak hemaen moulien onen hevuol venau, kei hehotin moulien koa vi anatin.✡ Mat 10:39; Luk 17:33; Sion 12:25 26 ?Asa tahos munak meatin tai kur tounah vasi ten out netan ka moulien onen mul vuol rani?✡ Mat 4:8-9 !Tounah tovuol! Kei sakras vasan etai tounah keke vakur ris moulien onen.

27 “Inau, Natin Meatin, nimai ris hetal min muohien koa Tata onak hesani minau ka hetal min angelo keil onen. Ka en avong koanek, nisan retai en ui umen min meatin vasi keil housil asa koa keil amumoni.✡ Mat 25:31; Sam 28:4; 62:12; Pro 24:12; Rom 2:6; Rev 22:12 28 Anatin eli naviteni min kami, tei en kami koa mimul mimulomal ekok kosa, mihermattei mau ka mihelesi navong inau, Natin Meatin, nimai hetal min keihoen ten hiasuvien onak.”✡ Mat 10:23